ޑެމޮކްރެޓިކް ރިޕަބްލިކް އޮފް ކޮންގޯގެ ރައީސް، ޖޯސެފް ކަބީލާ، 2016 ވަނަ އަހަރުގެ ފަހުކޮޅު ވެވަޑައިގެންނެވި އެއްބަސްވުމާއި އެއްގޮތަށް ސުލްހަވެރިކަމާއެކު މަގާމުން އިސްތިއުފާދެއްވުމަށް އދ ގެ ސެކްރެޓަރީ ޖެނެރަލް ގޮވާލައްވައިފިއެވެ.
އާދީއްތަ ދުވަހުގެ ފަހުގެ ވަގުތެއްގައި އެންޓޯނިއޯ ގުޓަރެސް މިހެން ވިދާޅުވެފައިވަނީ ކަބީލާގެ ވެރިކަމާ ދެކޮޅަށް މުޒާހަރާ ކުރި ހަތް މީހަކު ސަލާމަތީ ބާރުތަކުން މަރާލައި 120 މީހަކު ހައްޔަރު ކޮށްފައިވަނިކޮށެވެ.
ކަބީލާގެ ވެރިކަމުގެ ދެވަނަ ދައުރު 2016 ވަނަ އަހަރުގެ ޑިސެމްބަރު މަހު ނިމިފައިވާއިރު، ވެރިރަށް ކިންޝާސާއާއި އެހެނިހެން ސިޓީތަކުގައި އާދީއްތަ ދުވަހު ކުރި މުޒާހަރާގައި ގޮވަމުން ދިޔައީ ކަބީލާ ވެރިކަމުން ފޭބުމަށެވެ.
މީގެ އަހަރެއްކުރިން ކަބީލާވަނީ އޭނާއަށްފަހު ވެރިކަން ކުރައްވާނެ ބޭފުޅަކު ހޮވުމަށްޓަކައި 2017 ވަނަ އަހަރު ނިމުމުގެ ކުރިން އިންތިޚާބެއް ބާއްވާނެ ކަމަށެވެ.
މިހާރު އެ ވޯޓް ވަނީ 2018 ވަނަ އަހަރުގެ ޑިސެމްބަރު މަހުގެ 23 ވަނަ ދުވަހާ ހަމައަށް ފަސްކޮށްފައެވެ.
މިއާއެކު ރައްޔިތުންދަނީ ގާނޫނުއަސާސީގައި ދައުރު ކަނޑައެޅިފައިވާ ގޮތާ ޚިލާފްވެ ވަޑައިގެން، އިތުރު ދައުރަކަށް ކުރިމަތި ނުލެއްވޭތީ ގާނޫނާ ޚިލާފަށް ވެރިކަމުގައި ހުންނެވުމަށް މަސައްކަތްކުރައްވާކަމުގެ ކަންބޮޑުވުން ފާޅުކުރަމުންނެވެ.
ގުޓަރެސް ނެރުއްވާފައިވާ ބަޔާނެއްގައިވަނީ ކޮންގޯގެ ސިޔާސީ ފަރާތްތަކުން 2016 ވަނަ އަހަރުގެ ޑިސެމްބަރު މަހުގެ 31 ވަނަ ދުވަހު ވީ ސިޔާސީ އެއްބަސްވުމަށް ފުރިހަމަޔަށް އިހުތިރާމް ކުރުމަށް ގޮވާލައްވާފައެވެ. އަދި އެއީ އިންތިޚާބެއް ބާއްވައި ސުލްހަވެރިކަމާއެކު ބާރުތައް ބަދަލުވެ ހަމަޖެހުން ގާއިމްވެގެންދާން އޮތް ހަމައެކަނި މަގުކަމަށް ގުޓަރެސް ވިދާޅުވެފައިވެއެވެ.
މީގެ އިތުރުން ގުޓަރެސްވަނީ ކޮންގޯގެ ރައްޔިތުންނަށް ޚިޔާލު ފާޅު ކުރުމުގެ ހައްގާއި ސުލްހަވެރިކަމާއެކު އެއްވެ އުޅުމުގެ ހައްގު ކަށަވަރުކޮށްދިނުމަށް ގޮވާލާފައެވެ.
ޓެލެކޮމިއުނިކޭޝަން މިނިސްޓްރީއިންވަނީ މުޒާހަރާގެ ކުރިން އެސްއެމްއެސްގެ ޚިދުމަތާއިއިންޓަރނެޓްގެ ޚިދުމަތްކަނޑާލަފައެވެ.
ކޮންގޯގެ ވެރިކަމުގައި 2001 ވަނަ އަހަރުން ފެށިގެން ހުންނެވި ކަބީލާވަނީ،ވޯޓަރސް ރެޖިސްޓްރޭޝަންގެ ކަންކަން ލަސްވުމާއި ގުޅިގެންކަމަށް ވިދާޅުވެ 2018 ވަނަ އަހަރުގެ ޑިސެމްބަރުމަހުގެ ނިޔަލަށް ވެރިކަމުގައި ހުންނަވާނެކަމަށް ވިދާޅުވެފައެވެ.
އިދިކޮޅު ފަރާތްތަކުން ގެންދަނީ ކަބީލާ އިސްތިއުފާ ދެއްވުމަށް ގޮވާލަމުންނެވެ.
