ކ. މާލެ
|
3 ޖެނުއަރީ 2018 | ބުދަ 19:07
ރައީސް ޓްރަމްޕް
ރައީސް ޓްރަމްޕް
ބީބީސީ
ފަލަސްތީން-އެމެރިކާ
ފަލަސްތީނަށް ދޭ އެހީ ހުއްޓާލަން ޖެހިދާނެ: ރައީސް ޓްރަމްޕް
 
ފަލަސްތީނުން ސުލްހައިގެ މަޝްވަރާތައް ބޭނުން ނުވާ ކަން އެނގިގެން ދާކަމަށް ވެސް ޓްރަމްޕް ވިދާޅުވި

ފަލަސްތީނަށް ދޭ އެހީ ހުއްޓާލަން ޖެހިދާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފިއެވެ.

ރައީސް ޓްރަމްޕް ޓްވިޓާ މެދުވެރިކުރައްވައި ވިދާޅުވީ އެމެރިކާ އިން ފަލަސްތީނަށް ދޭ އެހީގެ ބަދަލުގައި "ހެޔޮބަހެއް ނުބުނާތާ އެއްވެސް ގޮތަކުން އިހުތިރާމު ވެސް ނުކުރާ ކަމަށެވެ."

ރައީސް ޓްރަމްޕް އިތުރަށް ވިދާޅުވީ ގުދުސްއަކީ އިޒްރޭލުގެ ވެރިރަށް ކަމަށް އެމެރިކާ އިން ބަލައިގަތުމާ ގުޅިގެން ފަލަސްތީނުން ސުލްހައިގެ މަޝްވަރާތައް ބޭނުން ނުވާ ކަން އެނގިގެން ދާކަމަށެވެ. އެމެރިކާ އިން ގުދުސްގެ މައްސަލައިގައި ނިންމި ނިންމުމާ ގުޅޭ ގޮތުން ފަލަސްތީނުން ބުނެފައި ވަނީ އެމެރިކާ އަށް ފަލަސްތީނާއި އިޒްރޭލުގެ މައްސަލައިގައި މެދުވެރިއެއްގެ ރޯލް އަދާ ނުކުރެވޭނެ ކަން ހާމަވާ ކަމަށެވެ.

އެމެރިކާގެ ނިންމުމާ ގުޅިގެން ފަލަސްތީނުގެ ރައީސް މިދިޔަ އަހަރުގެ ޑިސެމްބަރު މަހު ވިދާޅުވެފައި ވަނީ މެދުއިރުމައްޗަށް ސުލްހަ ގެނައުމަށްޓަކައި އެމެރިކާ އިން ހުށަހަޅާ އެއްވެސް ސުލްހައިގެ އެއްބަސްވުމަކަށް ފަލަސްތީނުން އާނބަސް ނުބުނާނެ ކަމަށެވެ.

އިޒްރޭލުން 1967 ވަނަ އަހަރުގެ ހަނގުރާމައިގައި ހިފި ގުދުސްއަކީ އެ ގައުމުގެ ވެރިރަށް ކަމަށް ބުނަމުންދާއިރު އެމެރިކާ އިން މިދިޔަ ޑިސެމްބަރު މަހު ގުދުސްއާ މެދު ނިންމި ނިންމުމާ ގުޅިގެން އދ. ގެ 128 ގައުމަކުން ވަނީ އެކަން ކުށްވެރިކޮށްފައެވެ.

އިޒްރޭލުގެ ވެރިރަށަކީ ގުދުސްކަމަށް އެމެރިކާ އިން ކަނޑައަޅާނެ ކަމަށް ރައީސް ޓްރަމްޕް ވަނީ އެމަނިކުފާނުގެ ރިޔާސީ ކެމްޕެއިނުގައި ވައުދުވެވަޑައިގެންފައެވެ.

ރައީސް ޓްރަމްޕް ފަލަސްތީނަށް ދޭ އެހީ ހުއްޓާލަން ޖެހިދާނެ ކަމަށް ވިދާޅުވިއިރު، އެ ވާހަކަފުޅުގެ ފަހުން، އެމެރިކާ އިން އދ. އަށް ކަނޑައަޅުއްވާފައިވާ މަންދޫބު ނިކީ ހޭލީ ވިދާޅުވީ ފަލަސްތީނަށް އެހީވާ އދ. ގެ ރިލީފް އެޖެންސީ އަށް އެމެރިކާ އިން ދޭ އެހީ ވެސް ހުއްޓާލާނެ ކަމަށެވެ. އެމެރިކާއަކީ އެ އެޖެންސީ އަށް އެންމެ ބޮޑު އެހީދޭ ގައުމެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އަލީ ޔޫސުފް
0%
0%
0%
0%
100%
0%
ކޮމެންޓް