އިސްރާއީލުގެ ވެރިރަށަކީ ޤުދުސް ކަމަށް އެމެރިކާއިން ބަލައިގަތުމާއި ގުޅިގެން ލުބްނާނުގެ ހިޒްބުﷲ ޖަމާޢަތުން ފަލަސްތީނަށް ފޯކަސް ކުރުމަށް ނިންމާފައިވާ ކަމަށް އެޖަމާޢަތުގެ ވެރިޔާ ހަސަން ނަސްރުﷲ ވިދާޅުވެއްޖެއެވެ.

ހޯމަ ދުވަހު ހަސަން ނަސްރުﷲ ވިދާޅުވީ ހިޒްބުﷲ އާއި އެޖަމާޢަތާއި ގުޅިފައިވާ ޖަމާޢަތްތަކުން އިސްރާއީލާއި ކުރިމަތިލާނެ ގޮތްތަކެއް ރާވަން ޖެހިފައިވާ ކަމަށެވެ. އަދި އެމެރިކާގެ 'މޮޔަ' ނިންމުމަކީ އިސްރާއީލުގެ ނެތިދިޔުމުގެ ފެށުން ކަމަށް އުއްމީދުކުރައްވާ ކަމަށް އޭނާ ވިދާޅުވިއެވެ.

އެމެރިކާގެ ނިންމުމާއި ގުޅިގެން ލުބްނާނުގައި އެމެރިކާއާއި ދެކޮޅަށް މުޒާހަރާއަށް ނިކުތުމަށް ހިޒްބުﷲ އިން ގޮވާލާފައިވަނީ މިމަހުގެ 6ވަނަ ދުވަހުއެވެ. އެއާއިއެކު ވެރިރަށް ބެއިރޫތާއި ލުބްނާނުގެ އެކި ކަންކޮޅުތަކުގައި އެމެރިކާއާއި ދެކޮޅަށް މުޒާހަރާތައް ފެށިގެން ދިޔައެވެ. ހޯމަ ދުވަހު ވެސް ބޮޑެތި މުޒާހަރާތައް ކުރިއަށް ދިޔައިރު، އާދިއްތަ ދުވަހު ބެއިރޫތުގައި ހުންނަ އެމެރިކާގެ އެމްބަސީ ކުރިމަތީގައި މުޒާހަރާކުރި މީހުންނާއި ސަލާމަތީ ބާރުތަކާއި ދެމެދު ކުރިމަތިލުންތައް ހިނގާފައިވެއެވެ.

މުހައްލިލުން ބުނާ ގޮތުގައި ޤުދުސްއަށް އެމެރިކާގެ އެމްބަސީ ބަދަލުކުރުމަށް ރައީސް ޑޮނަލްޑް ޓްރަމްޕް ނިންމެވި ނިންމުމަކީ ހިޒްބުﷲ ޖަމާޢަތަށް ދިން 'ހަދިޔާއެކެވެ'. ސަބަބަކީ ހިޒްބުﷲ ޖަމާޢަތުން މިހާތަނަށް އައި އިރުވެސް ފަލަސްތީނުގެ މިނިވަންކަމަށް މަސައްކަތް ކުރަމުން ދިޔަނަމަވެސް، ފަހަކަށް އައިސް އެޖަމާޢާތުން ބޮޑަށް ފޯކަސްކޮށްފައިވަނީ ސޫރިޔާ ހަނގުރާމައަށް ކަމަށްވުމެވެ. އަދި މިހާރު އަނެއްކާވެސް ފަލަސްތީނުގެ މައްސަލައަށް ވަނުމުގެ ފުރުސަތު އެޖަމާޢަތަށް ލިބުނީއެވެ.

ހިޒްބުﷲއަކީ އީރާނުން މަދަދުދޭ، ލުބްނާނުގެ ޝީޢީ ޖަމާޢަތެކެވެ. އިސްރާއީލުން އަދުއްވުންގެ ގޮތުގައި ދެކޭ މިޖަމާޢަތާއި އިސްރާއީލާއި ދެމެދު 2006ވަނަ އަހަރު ހަނގުރާމަ ހިނގާފައިވެއެވެ. އެހަމަލާތަކުގައި 1200އެއްހާ އާއްމުން ލުބްނާނުން މަރުވި އިރު، ހިޒްބުﷲއިން ވަނީ އިސްރާއީލު ސިފައިންގެ 120 މީހުން މަރާލާފައެވެ.

ޤުދުސްއަކީ އިސްރާއީލުގެ ވެރިރަށުގެ ގޮތުގައި ބަލައިގަތުމާއި ގުޅިގެން ދުނިޔޭގެ އެކި ކަންކޮޅުތަކުގައި އެމެރިކާއާއި އިސްރާއީލާއި ދެކޮޅަށް ދަނީ މުޒާހަރާކުރަމުންނެވެ.