އދގެ އެހީގެ ޕްރޮގްރާމަށް ރެކޯޑް އަދަދެއްގެ ފައިސާއަށް އެދިއްޖެ

އދގެ އިންސާނީ އެހީގެ ޕްރޮގްރާމަށް 2018 ވަނަ އަހަރަށް ރެކޯޑް މިންވަރެއްގެ ފައިސާ ހޯދުމަށް އދން އެދިއްޖެއެވެ.

އެ ޖަމާއަތުންވަނީ 22.5 ބިލިއަން އެމެރިކާ ޑޮލަރު ބޭނުންވާ ކަމަށް ހާމަކޮށްފައެވެ.

އދން ނެރެފައިވާ ބަޔާނެއްގައި ބުނެފައިވަނީ އެ ޖަމާއަތުގެ އަމާޒަކީ އިންސާނީ އެހީއަށް ބޭނުންވެފައިވާ 136 މިލިއަން މީހުންގެ ތެރެއިން އެންމެ ނާޒުކު ހާލަތުގައިވާ 91 މިލިއަން މީހުންނަށް އެހީ ފޯރުކޮށްދެވޭނެ ފައިސާ ހޯދުން ކަމަށެވެ.

އެ ޖަމާއަތުން ބުނިގޮތުގައި ހަމައެކަނި ޔަމަނާއި ސީރިޔާގައި ހާލުގައި ޖެހިފައިވާ ފަރާތްތަކަށް އެހީފޯރުކޮށްދިނުމަށް އެކަނިވެސް 10 ބިލިއަން އެމެރިކާ ޑޮލަރުގެ އެހީ ބޭނުންވެއެވެ.

އޭގެ އިތުރުން އެހީއަށް ބޭނުންވާ ގައުމުތައް އެފްރިކާގައިވެސް އަންނަނީ އިތުރުވަމުންނެވެ.

އދގެ ކޯޑިނޭޓަރ މާކް ލޯކޮކް ވިދާޅުވީ ހަމަނުޖެހުންތަކުގެ ސަބަބުން އެފްރިކާ އާއި މެދުއިރުމަތީގައި އިންސާނީއެހީއަށް ބޭނުންވާ މީހުންގެ އަދަދު 5 އިންސައްތަ އިތުރުވެފައިވާކަމަށެވެ.

ފަންޑުގެ ތިންބައިކުޅަ އެއްބައި ހޭދަކުރަން ޖެހެނީ ސީރިޔާއަށްކަމަށްވާއިރު ދާޚިލީ ހަނގުރާމައިގެ ސަބަބުން ސުންނާފަތިވެފައިވާ އެ ގައުމުގެ ތެރޭގައި އިންސާނީ އެހީއަށް ބޭނުވެފައިވާ ފަރާތްތަކަށް 3.5 ބިލިއަން އެމެރިކާ ޑޮލަރުގެ އެހީ ފޯރުކޮށްދިނުމަށްވަނީ ނިންމާފައެވެ. އަދި އެ ގައުމުގެ އަވަށްޓެރި ގައުމުތަކުގައި ދިރިއުޅޭ ސީރިޔާގެ 5.4 މިލިއަން ރެފިއުޖީންނަށް އެހީވުމަށް 4.2 ބިލިއަން ޑޮލަރު ކަނޑައަޅާފައިވެއެވެ.

ދުނިޔެއަށް މިހާތަނަށް ކުރިމަތިވާ އެންމެ ބޮޑު އިންސާނީ މުސީބާތް ކުރިމަތިވަމުން އަންނަ ޔަމަނުގައި ހާލުގައި ޖެހިފައިވާ ފަރާތަތަކުގެ ތެރެއިން އެންމެ ބޮޑަށް އެހީއަށް ބޭނުންވެފައިވާ ފަރާތްތަކުގެ އެހީއަށްއެކަނިވެސް 2.5 ބިލިއަން ޑޮލަރު ބޭނުންވާކަމަށް އދން ވަނީ ބުނެފައެވެ.

އދން ބުނީ އެ ޖަމާއަތުގެ އަމާޒަކީ ޔަމަނުގައި އިންސާނީ އެހީއަށް ބޭނުންވެފައިވާ 20 މިލިއަން މީހުންގެ ތެރެއިން އެންމެ ބޮޑަށް އެހީއަށް ބޭނުންޖެހިފައިވާ ފަރާތްތަކަށް އެހީ ފޯރުކޮށްދިނުންކަމަށެވެ. އެ ހާލަތުގައި ތިބި އެގާރަ މިލިއަނެއްހާ ކުޑަކުދިންގެ ތެރެއިން ތެރެއިން 400،000 އެއްހާ ކުދިންދަނީ ކާޑުބަލި ތަހައްމަލު ކުރަމުންނެވެ.

ކޮންގޯ،އިތިއޯޕިއާ،ނައިޖީރިއާ،ސޯމާލިއާ،ދެކުނު ސޫދާނުގައި އެންމެ ހާލުގައި ތިބި ފަރާތްތަކަށް އެހީ ފޯރުކޮށްދިނުމަށް އެއިން ކޮންމެ ގައުމަކަށް އެއް ބިލިއަން ޑޮލަރު ބޭނުންވެއެވެ.

އދން ބުނީ އަފްޣާނިސްތާނާއި،އިތިއޯޕިއާ،އިރާގު،މާލީ،އަދި ޔޫކްރެއިން ފަދަ ބައެއް ގައުމުތަކަށް އިންސާނީ އެހީ ބޭނުންވާ މިންވަރު ދަށްވެފައިވާ ކަމަށެވެ.