ގަތަރަށް އެފް15 ބޯޓް އުފައްދައިދޭން 6.2 ބިލިއަން ޑޮލަރަށް ބޯއިންގ ކުންފުންޏާ ހަވާލުކޮށްފި
މި ބޯޓްތައް ގަތުމަށް ގަތަރުން އެމެރިކާއާ އެކު އެއްބަސްވެފައި ވަނީ ޖޫން މަހު
ގަތަރުން ވަނީ އެފް15ގެ 72 ބޯޓް ގަތުމަށް ނިންމާފައި
ގަތަރުގެ އަސްކަރިއްޔާއަށް އެފް15 މަރުކާގެ ހަނގުރާމަމަތީ މަތިންދާބޯޓް އުފައްދައިދިނުމަށް 6.2 ބިލިއަން އެމެރިކާ ޑޮލަރަށް ބޯއިންގ ކުންފުންޏާ ހަވާލުކޮށްފި ކަމަށް އެމެރިކާގެ ޑިފެންސް ޑިޕާޓްމަންޓުން އިއުލާނުކޮށްފިއެވެ.
ޕެންޓަގަން އިން ހުކުރު ދުވަހު ބުނީ އެކި ކޮޅުކޮޅަށް ރޯލްކުރެވޭ މި މަތިންދާ ބޯޓްތައް ތައްޔާރުކުރަނީ އެމެރިކާގެ މިސޫރީގެ ސެއިންޓް ލުއިސްގައި ކަމަށްވާ އިރު 2022 ވަނަ އަހަރުގެ ފަހުކޮޅު ބޯޓްތައް ހަވާލުކޮށް ނިންމާލެވޭނެ ކަމަށެވެ.
މި ބުރުގައި 36 ޖެޓް ވިއްކުމަށް ނިންމާފައިވާއިރު މިއީ ގަތަރުން ގަތުމަށް އިއުލާނުކޮށްފައިވާ އެފް15ގެ 72 ޖެޓްގެ ދެބައިކުޅަ އެއްބައެވެ.
އެމެރިކާ އާއި ގަތަރުން 2016 ވަނަ އަހަރު ފެށި މަޝްވަރާތަކަށް ފަހު ދެ ގައުމުން ވަނީ ޖުމްލަ 12 ބިލިއަން ޑޮލަރުގެ އެއްބަސްވުމެއްގައި ޖޫން މަހު ސޮއިކޮށްފައެވެ.
ގަލްފުގެ ގައުމުތަކުން މަތީ ފަންތީގެ ޓެކްނޮލޮޖީގެ ހަތިޔާރު ގަނެ އެއްކުރަމުންދާއިރު، އަށް ބިލިއަން އެމެރިކާ ޑޮލަރު ޚަރަދު ކޮށްގެން ޓައިފޫން މަރުކާގެ ހަނގުރާމަމަތީ 24 ބޯޓް ގަތުމަށް ވެސް ގަތަރުން ވަނީ ނިންމާފައެވެ.
ޑިސެމްބަރު މަހުގެ 10 ވަނަ ދުވަހު އިނގިރޭސި ވިލާތާ އެކު ވެވުނު އެއްބަސްވުމުގައި ގަތަރުގެ ފަރާތުން އެ ގައުމުގެ ޑިފެންސް މިނިސްޓަރ ޚާލިދު ބިން މުހައްމަދު އަލް އަތިއްޔާ ސޮއިކުރެއްވިއިރު އިނގިރޭސިވިލާތުގެ ފަރާތުން ސޮއިކުރައްވާފައި ވަނީ އެ ގައުމުގެ ޑިފެންސް މިނިސްޓަރ ގޭވިން ވިލިއަމްސަންއެވެ. މިއީ ނިމިދިޔަ ދިހަ އަހަރަށް ވުރެ ދިގު މުއްދަތެއްގައި ޓައިފޫން ޖެޓް ގަތުމަށް ދެވުނު އެންމެ ބޮޑު އޯޑަރެވެ.
ޓައިފޫން ޖެޓްގެ އެއްބަސްވުމުގެ ތެރޭގައި ގަތަރުގެ ވައިގެ ސިފައިންނަށް ތަމްރީނު ދިނުން ވެސް ހިމެނޭ ކަމަށް އެގައުމުން ނެރުނު ބަޔާނެއްގައި ވެއެވެ.
މީގެ އިތުރުން ގަތަރުގެ ވައިގެ ސިފައިންނާއި އިނގިރޭސި ވިލާތުގެ ރޯޔަލް އެއަރ ފޯސް ގުޅިގެން ޖޮއިންޓް އޮޕަރޭޝަން ސްކޮޑްރަންއެއް ފެށުމަށް ވެސް ވަނީ އެއްބަސްވެފައެވެ.
ޖޮއިންޓް އޮޕަރޭޝަން ސްކޮޑްރަންގެ ތެރެއިން 2022 ވަނަ އަހަރުގެ ވަރލްޑް ކަޕްގައި އޮޕަރޭޝަނަލް ކަވަރޭޖް އަދި ވައިގެ މަގުން ސަލާމަތީ ކަންކަން ބެލެހެއްޓުމުގައި މުހިއްމު ދައުރެއް އަދާކުރާނެ ކަމަށް ބުނެއެވެ.
