ސީރިޔާއަށް ހަ ބިލިއަން ޑޮލަރުގެ އެހީ ދިނުމަށް ވައުދުވެއްޖެ
މި އެހީއަކީ އަލަށް ލިބޭ ފަންޑިންގ ކަމެއް ނުވަތަ އޭގެ ތެރޭގައި ކުރިން ވައުދުވެފައިވާ އެހީ ހިމެނޭކަމެއް ސާފެއް ނުވޭ
މިދިއަ އަހަރުގެ ބައްދަލުވުމުގައި 12 ބިލިއަން ޑޮލަރު ޖަމާކުރެވިފައި
ސީރިޔާއަށް 2017 ވަނަ އަހަރު 6 ބިލިއަން ޑޮލަރުގެ އެހީ ދިނުމަށް ބައިނަލްއަގްވާމީ އެހީދޭ ފަރާތްތަކުން ބުދަ ދުވަހު ވައުދުވެއްޖެ ކަމަށް އީޔޫއިން ބުނެފިއެވެ.
އެ ގައުމަށް އެހީދޭ ފަރާތްތަކުން ބެލްޖިއަމްގެ ވެރިރަށް ބްރަސަލްސްގައި ކުރިޔަށް ގެންދާ ބައްދަލުވުމަށްވަނީ ސީރިޔާގެ އިދްލިބްގައި ދިން ކެމިކަލް ހަމަލާގެ މައްސަލައިގެ ހިޔަނި އެޅިފައެވެ.
"އަޅުގަނޑުމެންގެ މި ކޮންފަރެންސުން މި ދެނީ ބާރުގަދަ މެސެޖެއް،ސީރިޔާގެ ރައްޔިތުން މާޔޫސްވިއަކަ ނުދޭނަން" އީޔޫގެ އިންސާނީ އެހީއާ ބެހޭ ކޮމިޝަނަރ ކްރިސްޓޯސް ސްޓައިލިއަނައިޑްސް ބައްދަލުވުމުގެ މަންދޫބުންނަށް ވިދާޅުވިއެވެ.
އީޔޫއާއި އދން ބޭއްވި ބައްދަލުވުމުގައި އޭނާވަނީ އެ ތަނަަށް ހާޒިރުވި މަންދޫބުން ވަނީ އެންމެން އެކުގައި މި އަހަރަށް އެކަނިވެސް ހަ ބިލިއަން ޑޮލަރުގެ އެހީ ދިނުމަށް ނިންމާފައިވާކަން ފާހަގަ ކުރައްވައި އުފާ ފާޅު ކުރައްވާފައެެވެ.
ނަމަވެސް އެއީ އަލަށް ލިބޭ ފަންޑިންގ ކަމެއް ނުވަތަ އޭގެ ތެރޭގައި ބައިނަލްއަގްވާމީ މުޖުތަމައުއިން ކުރިން ވައުދުވެފައިވާ އެހީ ހިމެނޭކަމެއް ސްޓައިލިއަނައިޑްސް ސާފުކޮށެއް ނުދެއްވައެވެ.
ބްރަސަލްސްގައި މި ބޭއްވި ބައްދަލުވުމަކީ މިދިއަ އަހަރު ލަންޑަނުގައި ބޭއްވި ބައްދަލުވުމަށްފަހު ބޭއްވުނު މިފަދަ ފުރަތަމަ ބައްދަލުވުމެވެ.
މިދިއަ އަހަރުގެ ބައްދަލުވުމުގައި 12 ބިލިއަން ޑޮލަރު ޖަމާކުރެވިފައިވެއެވެ.
