ގިނި ދުށް މީހާ ރަތް މަލަށް ބިރު ގަންނަ ފަދައިން އަދީބް ދެކެ ރައީސް ޔާމީން ބިރު ގަނޭ: މުސްތަފާ

ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، ކުރީގެ ނައިބު ރައީސް އަޙުމަދު އަދީބް ދެކެ ބިރުފުޅު ގަންނަވާ ކަމަށް ރައްޔިތުންގެ މަޖިލީހުގެ ތިމަރަފުށީ ދާއިރާގެ މެންބަރު މުޙައްމަދު މުސްތަފާ ވިދާޅުވެއްޖެއެވެ.

މުސްތަފާ ކުރެއްވި ޓްވީޓެއްގައި ވިދާޅުވީ، ގިނި ދުށް މީހާ ރަތް މަލަށް ބިރު ގަންނަ ފަދައިން އަދީބު ދެކެ ރައީސް ޔާމީން ބިރުފުޅު ގަންނަވާ ކަމަށެވެ. އަދި އެމަނިކުފާނު އެހައި ބިރުފުޅު ގަންނަވަނީ "ގައިމު ކަންތައްތައްކެއް ކުރެވިފައި ހުރީމަ" ކަމަށްވެސް މުސްތަފާ ވިދާޅުވިއެވެ.

މުސްތަފާ ވިދާޅުވީ، އަދީބް މިނިވަން ވެވަޑައިގަންނަވާ ދުވަހަކުން ރައީސް ޔާމީން ހުންނަވާނީ މިހާރު އެމަނިކުފާނު އެ ހުންނަވާ ބާރުވެރިކަމުގައި ނޫން ކަމަށެވެ. ޓްވީޓް ނިންމަވާލައްވަމުން މުސްތަފާ ވިދާޅުވީ އަދީބު މިނިވަންވެވަޑައިގެން، ރައީސް ޔާމީންގެ ބާރުފުޅު ނެތިދިއުމުން މުސްތަފާމެން ފަދަ ބޭބޭފުޅުން ތިއްބަވާނީ އަތްޖައްސަވަން ކަމަށެވެ.

މުސްތަފާ މިފަދައިން ވިދާޅުވިއިރު، އަދީބަށް ކޮންމެހެން ބޭނުންވާ ބޭސްފަރުވާއަށް އަދީބު ރާއްޖެއިން ބޭރަށް ވަޑައިގަތުމުގެ ހުއްދަ ސަރުކާރުން ނުދީ ހިފަހައްޓާފައި ވަނީވެސް އަދީބު ޖަލުން ނެރެފިނަމަ އަދީބުގެ ފާރާތުން މި ސަރުކާރުގެ ސިއްރުތައް ހާމަވެދާނެތީ ކަމަށް ގިނަ ފަރާތްތަކަކުން ޤަބޫލުކުރެއެވެ.