ޕާޓީގެ ލީޑަރަކު ހޮވުމަށް އިންތިޚާބް ބޭއްވިގެން ދާއިރު އެތެރޭގެ ތަޅާފޮޅުން ހުއްޓާލުމަށް ދެކުނު އެފްރިކާގެ ރައީސް ޖޭކަބް ޒޫމާ ވެރިކަންކުރާ އެފްރިކަން ނޭޝަނަލް ކޮންގްރެސްގެ މެމްބަރުންނަށް ގޮވާލައްވައިފިއެވެ.
ޒޫމާވަނީ އޭއެންސީގެ ކުރިމަގުއޮތީ ނުރައްކަލެއްގެ ތެރޭގައިކަމަށް އިންޒާރު ކުރައްވައި އެކަމާ ހިތްޕުޅު ހަމަޖެހިވަޑައި ނުގަންނަވާކަމަށް ވިދާޅުވެފައެވެ.
ޒުމާއަށް ފަހު ޕާޓީގެ ލީޑަރުކަމަށް ވަޑައިގަތުމަށް އެންމެ ބޮޑަށް ވާދަކުރައްވަމުން ގެންދަވަނީ ނައިބް ރައީސް ސައިރިލް ރަމަފޯސާ އަދި ކުރީގެ ކެބިނެޓް މިނިސްޓަރެއްގެ އިތުރުން ރައީސް ޒޫމާގެ ކުރީގެ އަނބިކަނބަލުން ކޯސޭޒަނަ ދަލަމިނީ ޒޫމާއެވެ.
ކޮންމެ ބޭފުޅަކު މި އިންތިޚާބު ކާމިޔާބު ކުރެއްވި ނަމަވެސް ޒޫމާއަށް ފަހު ވެރިކަމަށް ވަޑައިގެންނެވުމުގެ ފުރުސަތު އެ ބޭފުޅަކަށް ބޮޑުވެގެންދާނެއެވެ. ނަމަވެސް 2019 ވަނަ އަހަރު ބާއްވާ އިންތިޚާބުގެ ކުރިން ޕާޓީގެ އެތެރޭގެ އިންތިޚާބަށްފަހު ޕާޓީ ބައިބައިވެގެން ހިނގައިދާނެކަމުގެ ބިރުވަނީ ހީވެފައެވެ.
ދެން އޮންނަ ރިޔާސީ އިންތިޚާބު ނިމުމާހަމައަށް ރައީސް ޒޫމާއަށް ދައުލަތުގެ އެންމެ އިސްވެރިޔާގެ މަގާމުގައި ހުންނެވޭނެއެވެ. 2009 ވަނަ އަހަރުންފެށިގެން ވެރިކަމުގައި ޒޫމާ ހުންނެވި އިރު އެ ގައުމުންވަނީ ރިޔާސީ ދައުރަކީ ގިނަވެގެން ފަސް އަހަރުގެ ދެ ދައުރުކަމަށް ކަނޑައަޅާފައެވެ.
