މިޔަންމާގެ އަސްކަރިއްޔާ އާއި ދެކޮޅަށް "އޭއާރްއެސްއޭ" އިން އެއްމަހަށް ހަމަލާ ބަދަލުކުުރުން ހުއްޓާލުމަށް އެއްބަސްވެއްޖެ

މިޔަންމާގެ ރޮހިންޖާ މުސްލިމުންނާ ދެކޮޅަށް އެގައުމުގެ އަސްކަރިއްޔާ އިން ހިންގަމުންދާ ލާއިންސާނީ އަމަލުތަކާ ދެކޮޮޅު ހަދަމުންދާ ރޮހިންޖާ މުސްލިމުންގެ ހަތިޔާރު އެޅި ހަނގުރާމަވެރިން، އަމިއްލަ އިސްނެގުމަށް އެއްމަސް ދުވަހަށް ހަމަލާ ބަދަލު ކުރުން ހުއްޓާލުމަށް އެއްބަސްވެއްޖެއެވެ.

ރޮހިންޖާ މުސްލިމުންގެ ތެރެއިން އުފެދިފައިވާ ހަނގުރާމަވެރި ޖަމާއަތް "ދަ އަރްކަން ރޮހިންޖާ ސެލްވޭޝަން އާރމީ (އޭއާރްއެސްއޭ)" އިން ހަަމަލާ ބަދަލު ކުރުން އެއްމަހަށް ހުއްޓާލާފައިވާ ކަން ހާމަކޮށްފައި ވަނީ އެ ފަރާތުގެ ޓްވިޓާ މެދުވެރިކޮށެވެ. މިގޮތުން އޭއާރްއެސްއޭ ގެ ޓްވިޓާ އެކައުންޓުގައި ބުނެފައި ވަނީ އެ ޖަމާއަތުގެ ހަނގުރާމަވެރި އޮޕަރޭޝަންތައް ވަގުތީ ގޮތުން އެއްމަސް ދުވަހަށް ހުއްޓާލުމަށް އެއްބަސްވާ ކަމަށާއި އެއީ ހާލުގައިޖެހިފައިވާ ރަކައިން ސްޓޭޓަށް އިންސާނީ އެހީ ފޯރުކޮށްދިނުމަށް މަގުފަހި ކުރުމަށްޓަކައި ކަމަށެވެ. އަދި އިންސާނީ ކާރިސާ ކުރިމަތިވެފައިވާ ހުރިހާ މުސްލިމުންނަށް ހުރިހާ ފާރާތްތަކުން ވެސް އެހީވެ ދިނުމަށް އޭއާރްއެސްއޭ އިން ވަނީ ގޮވާލާފައެވެ. އަދި މީގެ އިތުރުން މިޔަންމާ އަސްކަރިއްޔާގެ ލާ އިންސާނީ އަމަލުތައް ހުއްޓާލުމަށް ވެސް ގޮވާލާފަައިވެއެވެ.

ރޮހިންޖާގެ ހަތިޔާރު އެޅި ހަނގުރާމަވެރިން ވަނީ އޯގަސްޓް މަހު 25 ވަނަ ދުވަހު މިޔަންމާގެ ފުލުހުންގެ ޕޯސްޓްއަކަށް ހަމަލާދީ 12 ފުލުހަކު މަރާލާފައެވެ. މިކަމާ ގުޅިގެން މިޔަންމާގެ އަސްކަރިއްޔާ އިން ރަކައިން ސްޓޭޓުގެ ރޮހިންޖާ މުސްލިމުންނާ ދެކޮޅަށް ލާ އިންސާނީ އެތައް އަމަލުތައް ހިންގާ އަދި މުސްލިމުން އެބައިމީހުންގެ ގެދޮރުން ފައްސާލުމަށް ދަނީ މަސައްކަތް ކުރަމުންނެވެ.

މިޔަންމާގެ ރޮހިންޖާ މުސްލިމުންނާ ދޭތެރޭ މިޔަންމާގެ ދައުލަތުން ލާއިންސާނީ އަމަލުތައް ހިންގަމުން ދަނީ އިއްޔެ ނޫނީ މިއަދަކު ނޫނެވެ. ވޭތުވެ ދިޔަ އެތަކެއް އަހަރުތަކުގެ ތެރޭގައި ލާއިންސާނީ އަމަލުތަކުން ސަލާމަތްވުމަށްޓަކައި މިޔަންމާގެ އެތައް ހާސް ރޮހިންޖާ މުސްލިމުން އަވަށްޓެރި ގައުމުތަކަށް އެއްގަމު މަގުން ނުވަތަ ކަނޑުމަގުން ވަނީ ހިޖުރަކޮށްފައެވެ.

މިޔަމަންމާގެ މުސްލިމުންނާއި ދެކޮޅަށް އެގައުމުގެ ސަރުކާރުން ބާރުދީގެން، އަސްކަރިއްޔާއިން ދަނީ ބާރުގެ ބޭނުންކޮށް، މުސްލިމުން ގެދޮރުން ފައްސާލައި، ބައެއް މީހުން މަރައި، އަދި އަންހެން ކުދިންގެ އިއްފަަތް ފޭރި ގަންނަމުންެނެވެ. މިޔަންމާ މީހުން ދެކޭ ގޮތުގައި ރޮހިންޖާ މުސްލިމުންނަކީ އެގައުމުގެ މީހުންނެއް ނޫނެވެ. އެއީ ބަންގްލަދޭޝް އިން ވަގަށް އެތެރެވެގެން އުޅޭ ބައެކެވެ. އެހެން ކަމުން އެމީހުންނަކީ އެކަހެރި ކުރެވި، އެންމެ އަސާސީ ހައްގުތަކުން ވެސް މަހްރޫމް ކުރެވިފައިވާ ބައެކެވެ