އިނގިރޭސިވިލާތުގެ ޗެމްޕިއަން ޗެލްސީއަށް ކުޅެމުން އަންނަ ބެލްޖިއަމްގެ ހުނަރުވެރި ފޯވާޑް އެޑެން ހަޒާޑް އަދި ހަމަ އެ ޓީމަށް ކުޅެމުން އަންނަ ސްޕެއިންގެ ފޯވާޑް އަލްވާރޯ މޮރާޓާއަކީ ވަރަށް ނުރައްކާތެރި ދެ ކުޅުންތެރިން ކަމަށް ބާސެލޯނާގެ ކޯޗު އާނެސްޓޯ ވަލްވާޑޭ ބުނެފިއެވެ.
މި ސީޒަނުގެ ޗެމްޕިއަންސް ލީގުގެ ދެވަނަ ބުރުގައި މި ދެ ޓީމުގެ ކުރިމަތިލުމެއް ފެނިގެންދާނެއެވެ. މި ދެ ޓީމު ގަދަ ހިފުމަކަށް ނުކުންނައިރު މި ސީޒަނުގައި ބާސާ ކުޅުނު އެއްވެސް މެޗަކުން ބަލިވެފައެއް ނުވެއެވެ. އެހެން ނަމަވެސް އިނގިރޭސި ޗެމްޕިއަންގެ ގޮތުގައި މި ސީޒަނާއި ކުރިމަތިލި ޗެލްސީއަށް މި ސީޒަނުގައި މާ އެދެވޭ ނަތީޖާތަކެއް ހޯދިފައެއް ނުވެއެވެ. ޗެލްސީ ގްރޫޕް ސްޓޭޖުވެސް ނިންމާލީ ގްރޫޕުގެ ދެވަނައިގައި އޮވެގެންނެވެ.
އެއްވެސް މެޗަކުން ބަލިނުވެ ބާސާ ދެވަނަ ބުރަށް ކޮލިފައިވިއިރު ވަލްވާޑޭ ބުނީ ޗެލްސީއަކީ ފިޒިކަލީ އަދި ޓެކްޓިކަލީ ވެސް ވަރަށް ވަރުގަދަ ޓީމެއް ކަމަށާއި އެ ޓީމާއި ދެކޮޅަށް ކުޅެން ޖެހުން ދެކެނީ ބޮޑު ޗެލެންޖެއްގެ ގޮތުގައި ކަމަށެވެ. ޗެމްޕިއަންސް ލީގު ހޯދުމުގައި ވަރުގަދަ ޓީމުތައް ބަލިކުރަން ޖެހޭކަން ފާހަގަކުރަމުން ވަލްވާޑޭ ބުނީ ޗެލްސީ ބަލިކުރުމަށް ފަހު ކުއާޓާއަށް ދަތުރުކުރުމަކީ އަމާޒެއް ކަމަށެވެ.
ޗެލްސީއަކީ ޕްރިމިއާ ލީގުގެ ޗެމްޕިއަންކަން އެނގޭ ކަމަށާއި އެ ޓީމާއި ދެކޮޅަށް ކުޅޭ ދެ ލެގުވެސް ވެގެންދާނީ އުނދަގޫ އަދި ބުރަ މެޗުތަކަށް ކަމަށް ވަލްވާޑޭ ހާމަކުރިއެވެ. އެހެން ނަމަވެސް މިއީ ކުޅުންތެރިންނަށް މެޗުން މޮޅުވާން ލިބޭ ބާރެއް ކަމަށާއި ސަޕޯޓަރުންނަށް ރީތި މެޗެއް ފެނިގެންދާނެ ކަމުގެ ފުރިހަމަ ޔަގީންކަން ވަލްވާޑޭ ވަނީ ދީފައެވެ.
ހަމައެހެންމެ އެ ޓީމުގެ އެޓޭކުގައި މޮރާޓާ ހަރަކާތްތެރިވާ ކަމަށާއި އޭނާއަކީ ކޮންމެ ވަގުތެއްގައި ވެސް މެޗު ބަދަލުކުރުމުގެ ހުނަރު ލިބިގެންވާ ކުޅުންތެރިޔެއް ކަމަށް ވަލްވާޑޭ ބުނެފައިވެއެވެ. އަދި ހަޒާޑްއަކީ ހަލުވި ކުޅުންތެރިޔެއް ކަމަށާއި އޭނާ ހުއްޓުވުން ވެގެންދާނީ އުނދަގޫ ކަމަކަށް ކަމަށް ވަލްވާޑޭ މި އިންޓަވިއުގައި ބުނެފައިވެއެވެ. މި ދެ ކުޅުންތެރިންނަށް ފަރުވާތެރިވެގެން ބާސާގެ ކުޅުން ބިނާކުރާނެ ކަމުގެ އިޝާރާތެއް ވަލްވާޑޭ ވަނީ ދީފައެވެ.
މި ދެ ޓީމު ވެސް މިފަހަރުގެ މުބާރާތާއި ކުރިމަތިލީ ފެވަރިޓުންގެ ގޮތުގައި ކަމަށްވާއިރު މީގެ ކުރިން ވެސް ޗެމްޕިއަންސް ލީގުގައި މި ދެ ޓީމުގެ ކުރިމަތިލުންތައް ވަނީ ފެނިގެން ގޮސްފައެވެ. އެގޮތުން 2009 ވަނަ އަހަރާއި 2012 ވަނަ އަހަރުގެ ޗެމްޕިއަންސް ލީގުގައ މި ދެ ޓީމު ކުޅުނު މެޗުތަކަކީ ތާރީހުން ޖާގަ ހޯދާފައިވާ މެޗުތަކެކެވެ.
ޗެލްސީއާ ދެކޮޅަށް ބާސާ އަށް މެޗު ކުޅެފައިވާއިރު އޭގެތެރެއިން އެންމެ މެޗެއްގައި ވެސް ބާސާގެ ތަރި ލިއޮނެލް މެސީއަށް ލަނޑު ޖެހިފައި ނުވުމަކީ މި މެޗުގެ ޚާއްސަކަން އިތުރު ވެގެންދާ ކަމެކެވެ.
މި ދެ ޓީމު ކުޅޭ ފުރަތަމަ ލެގުގެ މެޗު ކުޅުމަށް ހަމަޖެހިފައިވަނީ ޗެލްސީގެ ދަނޑުގައެވެ.
