ނައިޖީރިޔާގެ މިސްކިތެއްގައި ޖާނު ގޮއްވާލައިގެން ދިން ހަމަލާއެއްގައި މަދުވެގެން 50 މީހުން މަރުވެއްޖެ
22 ނޮވެމްބަރު 2017 | ބުދަ 00:32ހަމަލާގެ ޒިންމާ އެއްވެސް ޖަމާއަތަކުން ނަގާފައެއް ނުވޭ
ހަމަލާ ދީފައިވަނީ ނަމާދަށް މީހުން ޖަމާވަމުންދިޔަ ވަގުތު
ނައިޖީރިޔާގެ އުތުރުގެ މިސްކިތެއްގައި ޖާނު ގޮއްވާލައިގެން ދިން ހަމަލާއެއްގައި މަދުވެގެން 50 މީހުން މަރުވެ އެތައް ބަޔަކު ޒަޚަމްވެއްޖެކަމަށް އޮފިޝަލުން ބުނެފިއެވެ.
ފުލުހަކު ބުނީ ފުރާއުމުރުގެ ކުއްޖަކުދިން މި ހަމަލާ އަމާޒުކޮށްފައިވަނީ އަދަމަވާ ސްޓޭޓްގެ މޫބީގެ މިސްކިތަކަށް އަންގާރަދުވަހު ފަތިސްނަމާދަށް މީހުން ދިޔަ ވަގުތަށް ކަމަށެވެ.
މިހާތަނަށް އެއްވެސް ފަރާތަކުން ހަމަލާގެ ޒިންމާ ނަގާފައެއް ނުވެއެވެ. ނަމަވެސް އެ ސަރަހައްދުގައި އާއްމުކޮށްދޭ ހަމަލާތަކުގެ ޒިންމާ ނަގަނީ ބޯކޯ ހަރާމް ޖަމާއަތުންނެވެ.
"50 މީހުން މިވަނީ މަރުވެފަ.އަޅުގަނޑުމެން މިހާރު މަސައްކަތްކުރަމުން މިދަނީ ޒަޚަމްވި މީހުންގެ ސީދާ އަދަދު ހޯދުމަށް"އަދަމަވާ ޕޮލިސް ކޮމާންޑްގެ ޕަބްލިކް ރިލޭޝަން އޮފިސަރ އުސްމާން އަބޫބަކުރު ވިދާޅުވި ކަމަށް ނިއުސް އޭޖެންސީ އޮފް ނައިޖީރިއާ(އެންއޭއެން) ބުނެފައިވެއެވެ.
އެ އެޖެންސިން ބުނާގޮތުގައި މި ހަމަލާއަކީ 2014 ވަނަ އަހަރު ހަނގުރާމަވެރިންގެ އަތްދަށުން އެ ޓައުން މިނިވަންކުރިފަހުން ދެވުނު މިފަދަ ފުރަތަމަ ހަމަލާއެވެ.
ބޯކޯ ހަރާމް ޖަމާއަތުން ނައިޖީރިޔާގައި ހަނގުރާމަ ކުރަމުންދާތާ އަށް އަހަރުވީއިރު މިހާތަނަށް 20،000އަށްވުރެ ގިނަ މީހުން މަރާލާފައިވާއިރު 2.7 މިލިއަނަށްވުރެ ގިނަ މީހުންވަނީ ވަޒަން ދޫކޮށް ދިއުމަށް ގޮސްފައެވެ.
