ދުނިޔޭގެ އެކި ޤައުމުތަކުގެ އިސްވެރިންނާއި ވިޔަފާރިވެރިން ހިންގަމުންދިޔަ ސިއްރު ވިޔަފާރީގެ މުއާމަލާތްތަކާއި ސިއްރު ކޮށްފައިވާ ފައިސާގެ މުއާމަލާތްތައް ޕެނަޕާ ޕޭޕަރސްގެ ނަމުގައި ލީކްކޮށްލުމާއި ގުޅިގެން ދިމާވި ކަންތައްތަކުން އެމީހުން ސަލާމަތް ނުވެވިގެން އުޅެނިކޮށް އަނެއްކާވެސް އެފަދަ އެތައް މިލިއަން ލިޔެކިޔުންތަކެއް ފަޅާއަރުވާލައިފިއެވެ.

ޖަރުމަންވިލާތުގެ ނޫހަކުން ހޯދި 13.4 މިލިއަން ފައިލްގައި ހިމެނިފައިވާ މި ލިޔެކިޔުންތައް ތަހުޤީޤްކޮށް ފަޅާއަރުވަމުންދަނީ ތަހުޤީޤީ ނޫސްވެރިންގެ ޖަމްއިއްޔާ، އިންޓަނޭޝަނަލް ކޮންސޯޓިއަމް އޮފް އިންވެސްޓިގޭޓިވް ޖާނަލިސްޓްސް އާއި އެޖަމްއިއްޔާއާއި ގުޅިފައިވާ 95 މީޑިއާއެއް ގުޅިގެންނެވެ. މި ޑޮކިއުމަންޓްތަކަކީ އޯފްޝޯ މާލީ ކަންކަމަށް ޚާއްސަ ޤާނޫނީ ޚިދުމަތްދޭ ކުންފުންޏެއްކަމަށްވާ އެޕަލްބީސްއިން ލީކްވި ފައިލްތަކެކެވެ. މި ކުންފުނީގެ އޮފީސްތައް ދުނިޔޭގެ އޯފްޝޯ މާލީ މަރުކަޒުތަކުގެ ގޮތުގައި ފާހަގަކުރެވިފައިވާ ގިނަ ޤައުމުތަކުގައި ހުރެއެވެ.

ލީކްވެފައިވާ ޑޮކިއުމަންޓްތަކުގެ ތެރޭގައި ލޯން އެގްރީމަންޓްތަކާއި، މާލީ ބަޔާންތަކާއި، އީމެއިލްތަކާއި އަދި ފަންސާހަކަށް އަހަރު ވަންދެން އެކުންފުނިން ބަލަހައްޓަމުން އައި އެހެނިހެން ބައެއް މާލީ ލިޔެކިޔުންތައް ހިމެނެއެވެ.

މިޑޮކިއުމަންޓްތަކުގެ ތެރޭގައި ދުނިޔޭގެ އެކި ޤައުމުތަކުގެ ލީޑަރުންނާއި ސިޔާސީ އިސް މީހުންގެ ގޮތުގައި ފާހަގަކުރެވޭ 120 މީހެއްގެ ސިއްރު ލިޔެކިޔުންތައް ހިމެނެއެވެ. އޭގެ ތެރޭގައި އިނގިރޭސި ރާނީ ކުއީން އެލިޒަބަތު ދެވަނަ އާއި، އެމެރިކާގެ ރައީސް ޑޮނަލްޑް ޓްރަމްޕްގެ ކެބިނެޓާއި ގާތްބޭފުޅުންގެ ތެރޭގައި ހިމެނޭ މަދުވެގެން 13 ބޭފުޅަކާއި، ކެނެޑާގެ ބޮޑުވަޒީރު ޖަސްޓިން ޓްރޫޑޯގެ އަރިސް ބޭފުޅުން ހިމެނެއެވެ. މި ލިޔެކިޔުންތަކުން އެނގޭ ގޮތުގައި އެމެރިކާގެ ވިޔަފާރިއާއި ބެހޭ ވަޒީރު އަދި ބިލިއަނަރު ވިލްބަރ ރޮސްއަކީ ރަޝިޔާގެ ރައީސް ވްލަޑިމިއަރ ޕުޓިންއާއި ގުޅުން އޮންނަ ކުންފުނިތަކަކާއިއެކު ވިޔަފާރީގެ ގުޅުން އޮންނަ ބޭފުޅެކެވެ.

މީގެ އިތުރުން ދުނިޔޭގެ ގިނަ ޤައުމުތަކުގެ މަޖިލިސް މެމްބަރުން ޝާހީ އާއިލާތަކުގެ ބޭފުޅުންގެ މާލީ މައުލޫމާތުވެސް މި ލީކްގައި އާއްމު ކޮށްފައިވެއެވެ.

ސިޔާސީ ލީޑަރުންގެ އިތުރުން ދުނިޔޭގެ ބޮޑެތި ބައެއް ކުންފުނިތަކުގެ މާލީ ހިސާބުތަކާއި ބަޔާންތަކުގެ ތަފްޞީލް ވެސް މި ޑޮކިއުމަންޓްތަކުގައި ހިމެނެއެވެ. އޭގެ ތެރޭގައި އެޕަލް، ނައިކީ، އޫބަރ އަދި ޓްވިޓަރފަދަ ކުންފުނިތައް ހިމެނެއެވެ. އަދި ލީކްވެފައިވާ ޑޮކިއުމަންޓްތަކުން ދައްކާ ގޮތުގައި ޓެކްސްއަށް މަކަރު ހެދުމަށް އޯފްޝޯ މާލީ އިދާރާތަކުގައި ރައްކާކުރާ ފައިސާ ބޭނުންކޮށްގެން ދުނިޔޭގެ ބޮޑެތި ބައެއް ކުންފުނިތަކުގައި ބައެއް ފަރާތްތަކުން އިންވެސްޓްކޮށްފައި އެބަހުއްޓެވެ. މީގެ ތެރޭގައި ޓްވިޓަރ އަދި ފޭސްބުކް ފާހަގަކޮށްލެވެއެވެ.

މި ޑޮކިއުމަންޓްތައް ލީކްކޮށްލި ނޫސްވެރިން އަދިވެސް ހުރިހާ މައުލޫމާތެއް ހާމަކޮށްފައިނުވާއިރު، ކުރިއަށް އޮތް ހަފްތާތަކުގެ ތެރޭގައި ގިނަ މައުލޫމާތުތަކެއް ހާމަކުރަމުންދާނެކަމަށް ބުނެއެވެ.