ޕެރިސް މާސްޓާސްގެ ކުއާޓާގެ ޖާގައެއް ކަށަވަރުވެފެއި އޮއްވާ ސްޕެއިންގެ ރަފައޭލް ނަދާލް އެ މުބާރާތުން ވަކިވެއްޖެއެވެ.

ފްރާންސްގެ ޕެރިހުގައި މިހާރު ކުރިޔަށްދާ އޭޓީޕީ ވޯލްޑް ޓުއާގެ ޕެރިސް މާސްޓާސްގެ ކުއާޓާގެ ޖާގައެއް ނަދާލް ކަށަވަރުކުރީ ރައުންޑް އޮފް 16 ގައި ދުނިޔޭގެ ރޭންކިންގެ 36 ވަނައިގައި މިވަގުތު ރޭންކް ކުރެވިފައި އޮތް އުރުގުއޭގެ ޕަބްލޯ ކުއޭވާސް ދެ ސެޓު އެއް ސެޓުން ބަލިކޮށްގެންނެވެ. މި މެޗުގެ ފުރަތަމަ ސެޓު 6-3 އިން ނަދާލް ގެންދިޔަ ނަމަވެސް ކުއޭވާސް ވަނީ ދެވަނަ ސެޓު 7-6 އިން ގެންގޮސް މެޗު ތިން ވަނަ ސެޓަކަށް ގެންގޮސްފައެވެ. މި މެޗުގެ ނަތީޖާ ނެރުމަށް ކުޅުނު ތިންވަނަ ސެޓު 6-3 އިން ގެންގޮސް ނަދާލް ވަނީ މި މުބާރާތުގެ ކުއާޓާގެ ޖާގައެއް ކަށަވަރު ކޮށްފައެވެ.

އެހެނަސް ކުއާޓާގެ ފުރުސަތު ލިބުމަށްފަހު ނަދާލް ވަނީ މި މުބާރާތުން ވަކިވެފައެވެ. އެގޮތުން އޭނާ މި މުބާރާތުން ވަކިވީ އޭނާގެ ކަނާތު ކަކުލަށް ލިބުނު އަނިޔާއެއްގެ ސަބަބުންނެވެ. ނަދާލް ކުއާޓާގައި ވާދަކުރުމަށް ހަމަޖެހިފައި އޮތީ ސާބިއާގެ ފިލިޕް ކްރަޖްނޮވިޗްއާ ދެކޮޅަށެވެ. ކުއޭވާސްއާ ދެކޮޅަށް ކުޅުނު މެޗުގައި ވެސް އޭނާގެ ކަކުލުގައި ބެންޑޭޖް އަޅާފައި ހުރިއިރު އޭނާ ބުނެފައިވަނީ މުބާރާތުން ވަކިވާން ޖެހުމުން ވަރަށް ދެރަވާ ކަމަށާއި މި މަހުގެ 12 ވަނަ ދުވަހު ލަންޑަންގައި ފަށާ އޭޓިޕީ ވޯލްޑް ޓުއާ ފައިނަލްސްއަށް ފިޓުވުމަށް މަސައްކަތް ކުރާ ކަމަށެވެ.

މިހާތަނަށް އޭޓީޕީ ވޯލްޑް ޓުއާ ފައިނަލްސްއަށް ކޮލިފައި ވެފައިވަނީ ނަދާލްގެ އިތުރުން ސްވިޓްޒަލޭންޑުގެ ރޯޖާ ފެޑެރާއާ ޖަރުމަނުގެ އެލެގްޒެންޑާ ޒަވަރޭވްއާ ބަލްގޭރިއާގެ ގްރިގޯ ޑިމިޓްރޯވްއާ އޮސްޓްރިއާގެ ޑޮމިނިކް ތިއެމްއާ ކްރޮއޭޝިއާގެ މަރިން ސިލިޗްގެ އިތުރުން ބެލްޖިއަމްގެ ޑޭވިޑް ގޮފިންއެވެ.

މި މުބާރާތުގެ ކުއާޓާގައި ވާދަކުރާ އާޖެންޓީނާގެ ހުއާން މާޓިން ޑެލްޕޮޓްރޯއާ އެމެރިކާގެ ޖޯން އިސްނާއަށް ވެސް އޭޓީޕީ ފައިނަލްސްއަށް ކޮލިފައި ވުމުގެ ފުރުސަތު އެބައޮތެވެ. އޭޓިޕީ ވޯލްޑް ޓުއާ ފައިނަލްސްއަށް ކޮލިފައިވުމަށް އިސްނާ މި މުބާރާތް ކާމިޔާބު ކުރަން ޖެހޭއިރު ޑެލް ޕޮޓްރޯ އިސްނާއާ ދެކޮޅަށް ކުޅޭ ކުއާޓާގެ މެޗު ކާމިޔާބުކޮށް އޭނާ ސެމީއަށް ދަތުރުކޮށްފިނަމަ އޭޓީޕީ ވޯލްޑް ޓުއާގެ ޖާގައެއް އޭނާއަށް ލިބޭނެއެވެ.

ނަދާލް ޕެރިސް މާސްޓާސްއިން ވަކިވެފައިވާއިރު އޭނާ ވަނީ މި މުބާރާތުގެ ފުރަތަމަ މެޗު ކާމިޔާބުކޮށް ދުނިޔޭގެ ރޭންކިންގެ އެއްވަނަ ކަށަވަރު ކޮށްފައެވެ.