ގްރީން ޓްރީޓަށް ގަދަ ހަތަރެއްގެ ޖާގައެއް ކަށަވަރު ވެއްޖެ

އެސްޓީއޯ މާލެ ލީގުގެ ގަދަ ހަތަރެއްގެ ޖާގައެއް ކްލަބް ގްރީން ސްޓްރީޓަށް ކަށަވަރު ވެއްޖެއެވެ.

ގްރީން ސްޓްރީޓަށް ޖާގަ ކަށަވަރުވީ އަންގާރަ ދުވަހުގެރޭ ޓީސީ ސްޕޯޓްސް ކުލަބާއި ވިކްޓްރީ ސްޕޯޓްސް ކުލަބު ކުޅުނު މެޗް ބޮޑު ތަފާތަކުން ޓީސީ ކާމިޔާބު ކުރުމުންނެވެ. ގަދަ 4 ގެ ޖާގައެއް ހޯދުމަށް މި ދެޓީމުންވެސް މެޗަށް ނިކުތްއިރު ވިކްޓްރީއަށް މެޗު ކާމިޔާބުކޮށްލައިގެން ގަދަ 4 އިން ޖާގަހޯދުމުގެ ފުރުސަތު އެޓީމަށް އޮތެވެ. ނަމަވެސް ޓީސީއަށް ގަދަ 4 އިން ޖާގަ ލިބެން އޮތީ ވިކްޓްރީ އަތުން 3 ޕޮއިންޓް ހޯދައި އަދި، ބުދަ ދުވަހު ގްރީން ސްޓްރީޓާއި އީގަލްސް ބައްދަލުކުރާ މެޗުން އީގަލްސް ބަލިވެއްޖެ ނަމައެވެ. އެގޮތުން އީގަލްސް މޮޅު ވެއްޖެ ނަމަ ނުވަތަ އެއްވަރު ވެއްޖެ ނަމަވެސް ގަދަ 4 އިން ފުރުސަތު ލިބޭނީ އީގަލްސް އަށެވެ.

ކުރިއަށް އަދި ބާކީ އެއް މެޗް އޮއްވާ ގްރީން ސްޓްރީޓަށް ގަދަ 4 އިން ޖާގަ ލިބެނީ އެޓީމަށް ކުޅުނު 13 މެޗުން 24 ޕޮއިންޓް ލިބިފައި ވާއިރު އީގަލްސް އަތުން އެޓީމު ބަލިވި ނަމަވެސް ދަށްވެގެން އެޓީމަށް ތާވަލުގެ 4 ވަނަ ލިބޭނެތީއެވެ. އެގޮތުން ޓީސީ އާއި ވިކްޓްރީ 14 މެޗު ކުޅެ ނިމުނުއިރު އެ ދެޓީމަށްވެސް ލިބިފައިވަނީ 22 ޕޮއިންޓެވެ.

އަންގާރަ ދުވަހުގެރޭ ޓީސީ އާއި ވިކްޓްރީ ބައްދަލުކުރި މެޗް ޓީސީ އިން ކާމިޔާބުކުރީ 4-1 ގެ ނަތީޖާއަކުންނެވެ. ރީތި ކުޅުމެއް ދެޓީމުގެ ފަރާތުންވެސް ފެނިގެންދިޔަ މި މެޗުގައި ޓީސީއިން ވަނީ ފުރަތަމަ ހާފުގެ 27 ވަނަ މިނެޓުގައި ފުރަތަމަ ލަނޑު ކާމިޔާބުކޮށް ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ އިބްރާހިމް މަހުދީ ހުސައިންނެވެ. ފުރަތަމަ ހާފް ނިމިގެންދިޔައި 1-0 އިން ޓީސީ ކުރީގައި އޮވެގެންނެވެ.

ދެވަނަ ހާފު ފެށިގެންވެސް ޓީސީގެ ފަރާތުން ފެނިގެން ގޮސްފައިވަނީ ވަރުގަދަ ކުޅުމެކެވެ. ނަތީޖާއެއްގެ ގޮތުން އެޓީމުން ވަނީ 56 ވަނަ މިނެޓުގައި 2 ވަނަ ލަނޑު ކާމިޔާބުކޮށް ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ އިބްރާހިމް ވަހީދް ހަސަނެވެ. މި ލަނޑަށް ފަހުގައި ޓީސީއަށް ލިބުނު ފުރުސަތުތަކުގެ ބޭނުން ރަނގަޅަށް ނުހިފުމުގެ ނަތީޖާއެއްގެ ގޮތުން ވިކްޓްރީއިން ވަނީ ސުން ކަނޑުވާލައި ފަރަގު ކުޑަކޮށްފައެވެ. އެޓީމަށް ފަރަގު ކުޑަކޮށްދިނީ 76 ވަނަ މިނެޓުގައި ބިދޭސީ ކުޅުންތެރިޔާ ކެރިޗް އެވެ.

ޓިސީ އިން ވަނީ ދެވަނަ ހާފުގެ ފަހުކޮޅުގައި މުޅި މެޗުގެ ކޮންޓްރޯލް އެއްކޮށް އަތުލާފައެވެ. އެޓީމުން ދިޔައީ ކައިރިކައިރީގައި ހަމަލާތަށް ތަނަވަސް ކުރަމުންނެވެ. އެގޮތުން 80 ވަނަ މިނެޓުގައި މުހަންމަދު އައްޒާމް ވަނީ 3 ވަނަ ލަނޑު އެޓީމަށް ކާމިޔާބުކޮށްދީފައެވެ. އަނިޔާގައި ގިނަ ދުވަސްތަކެއް ހުރުމަށްފަހު އައްޒާމް ވަނީ ފާއިތުވި ދެ މެޗުގައި މޮޅު ކުޅުމެއް ދައްކާފައެވެ. އައްޒާމްގެ ލަނޑަށްފަހު އޭގެ 3 މިނެޓު ފަހުން ޓީސީގެ ބިދޭސީ ކުޅުންތެރިޔާ ސްޓެވާޑް ވަނީ އެޓީމަށް 4 ވަނަ ލަނޑު ކާމިޔާބުކޮށްދީފައެވެ.

މިނަތީޖާ އާއެކު ވިކްޓްރީއަށް ވަނީ ވެލެންސިއާ އާއި ޔުނައިޓެޑް ވިކްޓްރީ އާއި އެކު މާލެ ލީގު ޕްލޭއޮފްގައި ކުޅެން ޖެހިގައެވެ.

މާލެ ލީގުގެ އެންމެ ފަހު ދެމެޗް ބުދަ ދުވަހު ކުޅެވޭއިރު، ބުދަ ދުވަހުގެރޭ ކުޅޭ އެންމެ ފަހު މެޗުގައި ބައްދަލުކުރާނީ ލީގުގައި އެންމެ ވާދަވެރި ދެޓީމް ކަމަށްވާ މާޒިޔާ ސްޕޯޓްސް އެންޑް ރެކްރިއޭޝަން އާއި ނިއުރޭޑިއަންޓް ސްޕޯޓްސް ކުލަބެވެ. މި ދެޓީމުންވެސް ލީގުގެ ތަށި ހޯދުމަށް މަސައްކަތް ކުރަމުން އަންނައިރު މި މެޗުން މޮޅުވާ ޓީމަކަށް ޗެމްޕިއަންކަން ލިބޭނެއެވެ.