ސްޕެއިންގެ މައި ސަރުކާރުން މަގާމުން ދުރުކޮށްފައިވާ ކެޓަލޯނިއާގެ ލީޑަރު ސްެޕެއިން ދޫކުރައްވާ ބެލްޖިއަމަށް ވަޑައިގެންނެވީ ހިމާޔަތް ހޯއްދަވާކަށް ނޫން ކަމަށް އޭނާ ވިދާޅުވެއްޖެއެވެ.
ބެލްޖިއަމް ގެ ބްރެސެލްގައި ރިޕޯޓަރުންނާ ވާހަކަފުޅުދައްކަވަމުން ޕުއިޖްޑެމޮންޓް އިތުރަށް ވިދާޅުވީ އޭނާ ފިއްލަވަން ނޫޅުއްވާ ކަމަށާއި އޭނާ ބޭނުފުޅުވަނީ މިނިވަންކަމާއެކު ވާހަކަދެއްކޭނެ ފުރުސަތެއް ކަަމަށެވެ.
ސްޕެއިންގެ ހައި ކޯޓުން ވަނީ ޕުއިޖްޑެމޮންޓް އާއި އޭނާގެ ސަރުކާރުގައި އުޅުއްވި 13 މެމްބަރެއް، ބުރާސްފަތި ދުވަހާއި ހުކުރު ދުވަހު ކޯޓަށް ހާޒިރުވުމަށް އަމުރުނެރެފައެވެ. ސްޕެއިންގެ ބާރުގެ ދަށުން ކެޓަލޯނިއާ މިނިވަންކަން އިއުލާން ކުރުމާ ގުޅިގެން، ކެޓަލޯނިއާގެ ލީޑަރު ކަމުގައި އެ ސަރަހައްދުގެ މިނިވަންކަން އިއުލާން ކުރި އިރު ހުންނެވި ވެރިޔާ، ކާލޮސް ޕުއިޖްޑެމޮންޓް މައްޗަށް ސްޕެއިންގެ ސަރުކާރުން ބުނެފައި ވަނީ ދައުލަތާ ދެކޮޅަށް ނިކުތުމަށް ހިތްވަރު ދިނުމާ ގުޅިގެން ދައުވާ ކުރާނެ ކަަމަށެވެ.
ސްޕެއިން އިން ހިޮނިހިރު ދުވަހު ވަނީ ކެޓަލޯނިއާ އަށް ދީފައި އޮތް ކޮންމެވެސްވަރެއްގެ މިނިވަންކަން، އެއްކޮށް ނިގުޅައިގެންފައެވެ. އަދި ކެޓަލޯނިއާގެ ލީޑަރު ކާލެސް ޕުއިޖްޑެމޮންޓް މަގާމުން ވެސް ދުރުކޮށްފައެވެ. މިކަމާ ގުޅޭގޮތުން ޕުއިޖްޑެމޮންޓް ވިދާޅުވީ ކެޓަލޯނިއާ، ސްޕެއިންގެ ފުރިހަމަ ބާުރުގެ ދަށަށް ގެނައުމާ ދެކޮޅަށް ސުލްހަވެރިކަމާއެކު އިހްތިޖާޖް ކުރަން ޖެހޭ ކަމަށާއި މަގާމުން ދުުުރުކުރި ފަރާތްތައް އެކުވެގެން "މިނިވަން ކެޓަލޯނިއާ އެއް ބިނާކުރައްވަން މަސައްކަތްޕުޅު ކުރައްވާނެ ކަމަށެވެ."
