ރައީސް ނަޝީދު ވާދަ ނުކުރައްވަން އުޅުއްވަނީ އެހެން ސިޔާސީ ބޭފުޅުންނަށްޓަކައި:ޝަރީފް
ރައީސް ނަޝީދަށް ކުރިމަތިލެއްވޭނެކަން ކަށަވަރުވޭ
ޝަރީފް ރާއްޖެ ޓީވީގެ ފަލަ ސުރުޚީ ޕްރޮގްރާމްގައި
ކުރިއަށް އޮތް ރިޔާސީ އިންތިޚާބުގައި ރައީސް މުހައްމަދު ނަޝީދަށް ވާދަ ކުރެއްވޭނެ ކަން ވަނީ ކަށަވަރު ކުރެވިފައި ކަމަށާއި ނަމަވެސް އެމަނިކުފާނު ވާދަ ނުކުރައްވަނީ އެހެން ސިޔާސީ ބޭފުޅުން ޖަލުގައި ބައިތިއްބަވާފައި އެކަން ކުރައްވަން ބޭނުންފުޅު ނުވާތީ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފް ވިދާޅުވެއްޖެއެވެ.
ރާއްޖެ ޓީވީން ހޮނިހިރު ދުވަހުގެރޭ ގެނެސްދިން ފަލަ ސުރުޚީ ޕްރޮގްރާމްގައި ވާހަކަ ދައްކަވަމުން ޝަރީފް ވިދާޅުވީ މިހާރު އޮތް ގޮތުން އެއްބުރުން ކާމިޔާބު ލިބޭނެ ގޮތަކީ އެއް ކެނޑިޑޭޓަކު ނެރުން ކަމަށާއި އިދިކޮޅު ފަރާތްތަކުން ތަފާތު ކެނޑިޑޭޓުން ނެރޭކަމަށް ވަނީ ވިއްޔާ ވަރަށް ބޮޑެތި މައްސަލަތައް ނުކުންނާނެ ކަމަށެވެ. އޭރުން ވާނޭ ގޮތަކީ ދެބައިމީހުން ތަޅާފޮޅަމުންގޮސް ދެވަނަ ބުރަކަށް ގޮސްގެން ނަތީޖާ ލިބޭނެ ގޮތެއް ނޭނގުން ކަމަށް ޝަރީފް ވިދާޅުވި އެވެ. އެގޮތަށް ކަންކަން ހިނގެއްޖެ ނަމަ އެކޯލިޝަންގައި ނޫޅެވޭ ހިސާބަށް މަޝްރަހު ވިހަވެގެންދާނެ ކަމަށާއި އެހެންވެ، ކުރަންވާ ވަރުގެ ކަމެއް ނޫން ކަމަށް އޭނާ ވިދާޅުވި އެވެ.
ޝަރީފް ވިދާޅުވީ އިދިކޮޅު ހުރިހާ ފަރާތްތަކަކަށް ވެސް އެންމެ ރަނގަޅު ގޮތަކީ އެބޭފުޅުންގެ ޒާތީ މަސްލަހަތު ދޫކޮށްލައްވާފައި އެއްބޭފުޅަކު ނެރުން ކަމަށެވެ. އެނޫން ގޮތަކަށް ކެނޑިޑޭޓުން ނެރެން ވެއްޖިއްޔާ އިންތިޚާބު އިދިކޮޅު ފަރާތްތަކުގެ އަތުން ގެއްލިގެން ހިނގައިދާނެ ކަމަށްވެސް ޝަރީފް ވިދާޅުވިއެވެ.
ޝަރީފް ވިދާޅުވީ މިހާރުގެ ސަރުކާރުގެ ފަރާތުން ބޮޑު ބިރުވެރި ކަމެއް އޮތްއިރު އަދި ހުރިހާ ބާރުވެރިކަމެއް އޮތް ބޭފުޅަކާ އަޅުގަނޑުމެން ވާދަކުރަން ޖެހޭއިރުގައި އަޅުގަނޑުމެން އެކަތިގަނޑެއްގެ ގޮތުގައިނެތި އިންތިޚާބު ކާމިޔާބު ކުރަން ދަތިވާނޭ ކަމަށެވެ. ސަބަބެއްގެ ގޮތުގައި ޝަރީފް ވިދާޅުވީ ދައުލަތުގެ ހުރިހާ މިނިވަން މުއައްސަސާތައް ވެސް ސަރުކާރުގެ ކޮންޓްރޯލްގެ ދަށުގައި އޮތުން ކަމަށާއި އަދި ރައީސް ޔާމީނަކީ ބާރުގަދަ ވެރިއެއް ކަމަށެވެ. އެހެންކަމުން އިންތިޚާބު ކާމިޔާބު ކުރެވޭނެ އެންމެ ލުއި ފަސޭހަ ގޮތަކީ އެއް ކެނޑިޑޭޓަކު ނެރުން ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ 2018 ގައި ރައީސް ނަޝީދަށް އިންތިޚާބަށް ކުރިމަތިލެއްވޭނޭ ކަމުގެ ފުރިހަމަ ޔަޤީންކަން އެބައޮތް ކަމަށާއި އދ އާއި ބޭރުގެ އެހެނިހެން ޖަމްއިއްޔާތަކުންވެސް އެކަން ކަށަވަރުކޮށްދޭކަމަށެވެ.
ޝަރީފް ވިދާޅުވީ ޔޫއެންއާއި ބޭރުގެ އެހެނިހެން ފަރާތްތަކުން ބުނާ ގޮތުގައި ރައީސް ނަޝީދަށް ކުރިމަތި ލެއްވޭ ވަރަށް މިނިވަން ކުރައްވާނެ ކަމަށާއި ނަމަވެސް ޖަލުގައި ތިއްބެވި ހުރިހާ ބޭފުޅުން ނެރުއްވާ ރިޔާސީ އިންތިޚާބުގައި ވާދަކުރެއްވޭނޭ ގޮތް ހެއްދެވުމަކީ ފަސޭހަ ކަމެއް ނޫން ކަމަށެވެ. ނަމަވެސް، ރައީސް ނަޝީދު ވާދަ ކުރެއްވުމުގެ ބަދަލުގައި އެއްކެނޑިޑޭޓަކު ނެރެން އެމަނިކުފާނު ގޮވާލައްވާ މައިގަނޑު ސަބަބަކީ ޖަލުގައި ތިއްބެވި ސިޔާސީ އެހެން ބޭފުޅުންގެ ޙައްޤުގައި ކަމަށް ޝަރީފް ވިދާޅުވިއެވެ.
"ރައީސް ނަޝީދަށް މިއޮތީ ޔޫއެންއާއި އީޔޫއިން އަދި އިންޑިއާ ފަދަ ތަންތަނުން ވަރކިން ގްރޫޕުގެ ނިންމުން ތަންފީޒް ކޮށްގެން، ޤާނޫން ތަކަށް ގެންނަން ޖެހޭ ބަދަލުތައް ގެނެސްގެން ކުރިމަތިލުމުގެ ފުރުސަތު ހޯދުން. ރައީސް ނަޝީދު ޤަބޫލުފުޅެއް ނުކުރައްވާ މިހާރު މިވަގުތު މިފުރުސަތުގެ ބޭނުން ކުރައްވާކަށް. ސަބަބަކީ ކޯލިޝަންގައި ތިއްބަވާ އެހެން ބޭފުޅުން ބަންދުގައި ތިއްބެވީމަ. އެމަނިކުފާނު މިނިވަން ވެގެން ރިޔާސީ އިންތީކާބުގައި ކުރިމަތިލައްވައިފިނަމަ ކޯލިޝަންގެ ބަދަހި ކަމަށް ލޮޅުމެއް އައިސްދާނެތީ،" ޝަރީފް ވިދާޅުވިއެވެ.
