ޑިމޮކްރެޓިކް ރިޕަބްލިކް އޮފް ކޮންގޯގެ ވެރިރަށް ކިންޝާސާއިން ނައްޓާލިތާ އިރުކޮޅެއްގެ ތެރޭގައި އަސްކަރީ ކާގޯ މަތިންދާ ބޯޓެއް ވެއްޓި އޭގެން ދަތުރުކުރި 12 މީހުން މަރުވެފައިވާ ކަމަށް އެ ގައުމުގެ އިދާރާތަކުން ބުނެފިއެވެ.

އެއަޕޯޓްގެ އޮފިޝަލުން ދެއްވި ރިޕޯޓްތަކާ ހަވާލާދީ ސަރުކާރުގެ ތަރުޖަމާނު ލެމްބަރޓް މެންޑޭ ވަނީ އެންޓޮނޯވް ކާގޯ ބޯޓް ކިންޝާސާގެ އިންޓަރނޭޝަނަލް އެއަރޕޯޓުން ނައްޓާލިތަނުން ވެއްޓިފައިވާކަން ކަށަވަރުކޮށްދީފައެވެ.

"މިއަދު ހެނދުނު އަސްކަރީ މަތިންދާބޯޓެއް ވެއްޓުނުކަން ކަށަވަރުކޮށްދޭން،" ޑިމޮކްރެޓިކް ރިޕަބްލިކް އޮފް ކޮންގޯގެ ޑިފެންސް މިނިސްްޓަރ ކްރިސްޕިން އަޓަމާ ޓަބޭ ވިދާޅުވިއެވެ. "ދަތުރުކުރި 12 މީހުން ވަނީ މަރުވެފައި."

އެ ގައުމުގެ މީޑިއާތަކުން ފުރަތަމަ ރިޕޯޓްކޮށްފައި ވަނީ ޑިމޮކްރެޓިކް ރިޕަބްލިކް އޮފް ކޮންގޯގެ އިރުމަތީގައި އޮންނަ ބުކާވޫއަށް ދަތުރުކުރަނިކޮށް ވެރިރަށް ކިންޝާސާގެ މެދުތެރެއިން ފެށިގެން 100 ވަރަކަށް މީޓަރު ދުރުމިނުގައި އޮންނަ ނާސިލާއަށް ބޯޓް ވެއްޓުނު އިރު މަދުވެގެން 10 މީހުން ތިބި ކަމަށެވެ.

ޑިމޮކްރެޓިކް ރިޕަބްލިކް އޮފް ކޮންގޯގެ އޭވިއޭޝަން އޭޖެންސީގައި ހުރި އޭޖެންޓަކު ވަނީ އެ ބޯޓަކީ އެންޓޮނޯވް ބޯޓެއް ކަމާއި 12 މީހުންނާ އެކު ދަތުރުކުރީ ބުކާވޫ އަށް ކަމަށް ކަށަވަރުކޮށްދީފައެވެ.

އެއާޕޯޓްގެ އޮފިޝަލަކު ވިދާޅުވީ ބޯޓް ވެއްޓިފައިވަނީ ހެނދުނު 7:30 ގައި ބޯޓް ނައްޓާލިތާ މަދު މިނެޓް ކޮޅެއްގެ ތެރޭގައި ކަމަށެވެ.

ބޯޓް ނައްޓާލިތާ ކުޑަވަގުކޮޅެއްގެ ތެރޭ ޓެކްނިކަލް މައްސަލަތަކެއް ދިމާވެ އެއަރ ޓްރެފިކް ކޮންޓްރޯލް ޓަވަރާ ގުޅުން ކެނޑުނު ކަމަށް އޭނާ ބުނެފައި ވެއެވެ.

ބޯޓުން ފަސިންޖަރަކު ދަތުރުކޮށްފައި ނުވާއިރު މަރުވި އެންމެންނަކީ ވެސް ކްރޫ މެމްބަރުންނެވެ.

ސަލާމަތީ ކަންކަން ހުންނަ ފެންވަރު ދަށްވުމުން ޑިމޮކްރެޓިކް ރިޕަބްލިކް އޮފް ކޮންގޯގައި ވައިގެ ދަތުރުފަތުރުގެ އެކްސިޑެންޓް ހިނގުމަކީ އާއްމު ކަމެކެވެ. އެ ގައުމުގެ ހުރިހާ ކޮމާޝަލް އެއާލައިން ތަކަކީވެސް ޔޫރަޕްގައި އޮޕަރޭޓްކުރުން މަނާކުރެވިފައިވާ އެއާލައިންތަކެވެ.