ޖަސްޓިން ބީބަރ ސިއްރުން ކައިވެނި ކުރީތަ؟
15 ސެޕްޓެމްބަރު 2018 | ހޮނިހިރު 13:20ބީބަރ އާއި ބޯލްޑްވިން އެންގޭޖް ކޮށްފައި ވަނީ މިދިޔަ ޖުލައި މަހު
ޖަސްޓިން ބީބަރ އާއި ހެއިލީ ބޯލްޑްވިން
ލަވަކިއުންތެރިޔާ ޖަސްޓިން ބީބަރ އާއި އޭނާގެ ފިއާންސޭ މޮޑެލް ހެއިލީ ބޯލްޑްވިން ސިއްރުން ކައިވެނި ކުރިކަމަށް ޚަބަރުތައް ބުނެފިއެވެ.
އެދެމީހުން އަތުގައި ހިފައިގެން ހިނގާފައި ކޯޓް ރޫމަށް ދިޔަތަން ފެނިފައިވާ ކަމަށް ޕީޕަލް ޑޮޓްކޮމް ގައި ވަނީ ބުނެފައެވެ.
އުމުރުން 24 އަހަރުގެ ބީބަރ ސްޓްރައިޕް ޓީޝާޓަކާއި ޖިންސެއް ލާފައި ހުރި އިރު ބޯލްޑްވިން ލާފައި ހުރީ ހުދު ކުލައިގެ ކުރު ހެދުމެކެވެ.
ކޯޓު ރޫމްގައި އުޅޭ މީހަކާ ހަވާލާދީ "ޓީއެމްޒެޑް"ގައި ރިޕޯޓްކޮށްފައިވާ ގޮތުން ބީބަރ ވަނީ އެމީހުން އެކަން ސިއްރު ކޮށްފައި ބޭއްވުމުން ޝުކުރު އަދާކޮށްފައެވެ.
ބޯލްޑްވިން ކައިރި ކައިވެނި ކުރުމަށް ކެތްމަދުވެފައި ހުރިކަމަށް ބީބަރ ބުނި އަޑު އިވުނު ކަމަށް ވެސް އޭނާ ވަނީ ބުނެފައެވެ.
" ދެން އޮތީ "ރިއަލް ވެޑިން" އަދި އެމީހުން މިހާރު ވަނީ ވެޑިން ޕްލޭނަރުން ވެސް ހަޔަރ ކޮށްފައި. މިހާރު ދަނީ ތަނެއް ބަލަމުން" މި ދެމީހުންނައި ގާތް މީހަކާ ހަވާލާދީ ބުނެފައި ވެއެވެ.
ބީބަރ އާއި ބޯލްޑްވިން އެންގޭޖް ކޮށްފައިވަނީ މިދިޔަ ޖުލައި މަހުއެވެ.
