ބޮލީވުޑް އެކްޓްރެސް ކަންގަނާ ރަނައުތު އޭނާގެ ކައިވެނި ސިއްރު ނުކުރާނެ ކަމަށް ބުނެފިއެވެ.
މިމަހުގެ 24 ވަނަ ދުވަހު ރިލީޒް ކުރުމަށް ހަމަޖެހިފައިވާ ފިލްމް "ރަންގޫން" ގެ ޕްރޮމޯޝަންގެ މަސައްކަތުގައި އުޅެމުންދާ ކަންގަނާ ބުނެފައިވަނީ އޭނާ މިވަގުތު އަދި ވިސްނަމުންދަނީ ފިލްމީ ދާއިރާގެ މަސައްކަތް ތަކާއި މެދުގައި ކަމަށެވެ.
އުމުރުން 29 އަހަރުގެ ކަންގަނާ އެންމެބޮޑު ސަމާލުކަމެއް ދެނީ އޭނާގެ ކެރިއާއަށް ނަމަވެސް ވަރަށް އަވަހަށް ކައިވެންޏަކާއި ހަމައަށް ދިޔުމަށް ވިސްނަމުންދާ ކަމަށްވެސް އޭނާ ވަނީ ބުނެފައެވެ.
އަދި އޭނާގެ ކައިވެނި ސިއްރު ނުކުރާނެ ކަމަށާއި ދިރިއުޅުމުގެ އެފަދަ އެއްވެސް ކަމެއް ސިއްރުކުރަން ބޭނުންނުވާ ކަމަށްވެސް ބުނެ އެވެ.
"ތަނޫ ވެޑްސް މަނޫ" ގެ އެކްޓްރެސް ކަންގަނާ ބުނީ އޭނާ މިއަހަރު ތެރޭގައި ކައިވެނި ކުރަން ބޭނުންވާ ކަމަށާއި އަދި މިހާރުވެސް އޭނާގެ ބައިވެރިޔެއް އެބަހުރި ކަމަށެވެ.
އިންޑިއާގެ ކުޑަ ޓައުން އެއް ކަމަށްވާ "ހިމާޗަލް ޕްރަދޭސް" އިން ބޮލީވުޑަށް އައިސްފައިވާ ކަންގަނާ އަކީ ބޮލީވުޑްގައި އެންމެ ބޮޑު އަގުގައި ފިލްމް ކުޅޭ ތަރިންގެ ލިސްޓުގައި ހިމެނޭ ތަރިއެކެވެ.
