ދެހާސް ހަތަރު ވަނަ އަހަރުގެ މާޗް މަހު މެލޭޝިއާގެ ވެރިރަށް ކުއާލަލަމްޕޫރުން ފުރައިގެން ޗައިނާގެ ވެރިރަށް ބެއިޖިންގއަށް ދަތުރު ކުރަނިކޮށް ގެއްލުނު މެލޭޝިއަން އެއަރލައިންސްގެ ފްލައިޓް 370 ހޯދުމުގެ މަސައްކަތް މިއަހަރު ޖެނުއަރީ މަހު ހުއްޓާލުމަށް ފަހު، އަނެއްކާވެސް އެފްލައިޓް ހޯދުމުގެ މަސައްކަތް ބަޔަކާއި ހަވާލުކުރުމަށް މެލޭޝިއާ ސަރުކާރުން ވާހަކަ ދައްކަމުން އެބަދެއެވެ.

239 މީހުންނާއިއެކު ގެއްލުނު އެމްއެޗް 370 ހޯދުމުގެ މަސައްކަތް އެފްލައިޓް ގެއްލުނު ދުވަހުން ފެށިގެން މިއަހަރުގެ ޖެނުއަރީ މަހާއި ހަމަޔަށް ގިނަ ޤައުމުތަކެއް ގުޅިގެން ކޮށްފައިވެއެވެ. އަދި 120،000 އަކަ ކިލޯމީޓަރުގެ ކަނޑުގެ ސަރަހައްދެއް، 133 މިލިއަން ޔޫރޯ ޚަރަދުކޮށްގެން ބަލާފައިވެއެވެ. ފްލައިޓް ހޯދުމުގެ މަސައްކަތްކުރުމަށް އެމެރިކާ ކުންފުންޏަކާއި، ނެދަލެންޑްސް ކުންފުންޏެއްގެ އިތުރުން މެލޭޝިއާގެ ކުންފުންޏަކުން ވެސް މެލޭޝިއާ ސަރުކާރަށް ހުށަހެޅިއެވެ. އަދި އެމަސައްކަތް ހަވާލުކުރަން އެމެރިކާގެ އޯޝަން އިންފިނިޓީއާއި ވާހަކަ ދައްކަމުން ދަނީ މަތިންދާބޯޓު ހޯދުމުގެ މަސައްކަތްކޮށް، ފެނިއްޖެނަމަ އެކަމަށް ދިޔަ ޚަރަދު އަނބުރާ ދޭ ގޮތަށެވެ. އަދި ނުފެނިއްޖެނަމަ އެމަސައްކަތަށް ބިލް ނުކުރެވޭނެއެވެ.

އެމްއެޗް 370 ރާޑަރުން ގެއްލިފައިވަނީ 2014ވަނަ އަހަރުގެ މާޗް މަހުގެ 8ވަނަ ދުވަހުއެވެ. އަދި ފްލައިޓް ވެއްޓިފައިވަނީ އޮސްޓްރޭލިއާގެ އައްސޭރިފަށާއި ކައިރިއަށްކަމަށް ތަޖުރިބާކާރުން ބުނުމާއި ގުޅިގެން މެލޭޝިއާ އަދި ޗައިނާގެ ސަރުކާރާއި ގުޅިގެން އޮސްޓްރޭލިއާ ސަރުކާރުންވެސް އެމްއެޗް 370 ފެނޭތޯ މަސައްކަތްކުރިއެވެ. ފްލައިޓުން ދަތުރުކުރި އެއްވެސް މީހެއްގެ ހިލަމެއް ވެފައި ނުވާއިރު، ފްލައިޓްގެ އެއްވެސް ބައެއް ކަނޑުން ފެނިފައެއް ނުވެއެވެ. އެހެން ނަމަވެސް 2015ވަނަ އަހަރުގެ ޖުލައި މަހު އިންޑިއާ ކަނޑުގެ ޖަޒީރާ ޤައުމެއްކަމަށްވާ ރީޔޫނިއަންގެ ގޮނޑުދޮށަކުން އެމްއެޗް 370ގެ ފިޔަގަނޑުގެ ބައިތަކެއް ފެނިފައިވެއެވެ.