ޑެސްކްޓޮޕް ލައިޓްރޫމް ފާސްޓްކޮށް ލައިޓްރޫމް ކްލައުޑަށް

މީގެ ދިހަ އަހަރު ކުރިން އެޑޯބްއިން ދުނިޔެއަށް ތަޢާރަފްކުރި ލައިޓްރޫމް ހުއްޓާލައި، ލައިޓްރޫމް ކްލެސިކް ސީސީ އަދި ލައިޓްރޫމް ސީސީ ތަޢާރަފްކޮއްފިއެވެ.

ލައިޓްރޫމް ސީސީއަކީ މޯބައިލް އަދި ކްލައުޑް ބޭސްޑް ހިދުމަތްތަކަށް ހާއްސަކޮއްފައިވާ ލައިޓްރޫމްގެ ވާޝަންއެވެ. ލައިޓްރޫމް ކްލެސިކް ސީސީއަކީ މިހާރެކޭ ވެސް އެއްފަދައިން ޑެކްސްކްޓޮޕަށް ހާއްސަ ވާޝަންކެއެވެ. ނަމަވެސް ކުރީގެ ލައިޓްރޫމްއާ ހިލާފަށް މިފަހަރު ލައިޓްރޫމް ކްލެސިކް ސީސީ އެތައް ގުނައެއް ފާސްޓްވާނެއެވެ.

ލައިޓްރޫމް ސީސީގެ ހާއްސަ ކަމަކީ ކްލައުޑްމެދުވެރިކޮށް ފޯން، ކޮމްޕިއުޓާރ އަދި އައިޕެޑް ފަދަ ހުރިހާ ޑިވައިސްތަކަކަށް ފޮޓޯތައް ސިންކްވެފައި ހުރުމެވެ. މީގެ އިތުރުން ލައިޓްރޫމް ސީސީގައި އާ ޔޫޒާ އިންޓަފޭސްއެއް ހިމަނާފައި ވުމުން ލައިޓްރޫމް ސީސި އިތުރަށް ހިއްގައިމުވެގެން ދާނެއެވެ.

ލައިޓްރޫމް ސީސީގައި ފޮޓޯ އޯގަނައިޒްވެގެންދާނީ އާޓިފިޝަލް އިންޓެލިޖެންސް (އޭއައި)ގެ އެހީގައިއެވެ. މިހެންވުމުގެ ސަބަބުން ފޮޓޯ ހޯދުމާއި ސޯޓް ކުރުމުގައި އިތުރު ފަސޭހަތަކެއް ވެގެންދާނެއެވެ.

ލައިޓްރޫމް ކްލެސިކް ސީސީގައި ފާހަގަ ކޮއްލެވޭ ކަންތައްތަކުގެ ތެރޭގައި އާ ވޯކް ފްލޯއެއްގެ އިތުރުން އެޑިޓްކުރާނެ ގޮތްތައް ވެސް ހިމެނެއެވެ. މީގެ އިތުރުން ކްލެސިކް ސީސީގެ ސްޕީޑް ވަރަށް ބޮޑުތަން ފާސްޓްވެގެން ދާނެއެވެ.

ލައިޓްރޫމް ސީސީއަކީ މަހުން މަހަށް ފައިސާ ދައްކަންޖެހޭ ހިދުމަތަކަށްވާއިރު ލައިޓްރޫމް ސީސީ ޕްލޭން 1 ޓީބީގެ ކްލައުޑް ސްޓޯރޭޖާ އެކު މަހަކު 9.99 ޑޮލަރަށް ލިބެއެވެ. އަދި ފޮޓޯގްރަފީ ޕްލޭން ކަމަށްވާ ލައިޓްރޫމް ސީސީ އާއި 20 ޖީބީ ގެ ކްލައުޑް ސްޓޯރޭޖް އަދި ލައިޓްރޫމް ކްލެސިކް ސީސީ އާއި ފޮޓޯޝޮޕް ސީސީ މަހަކު 9.99 ޑޮލަރަށް ލިބެއެވެ. އެންމެ އަގުބޮޑު ޕްލޭނަކަށް ހިމެނެނީ މަހަކު 19.99 ޑޮލަރަށް ލައިޓްރޫމް ސީސީ ، 1 ޓީބީ ސްޓޯރޭޖްގެ އިތުރުން ލައިޓްރޫމް ކްލެސިކް ސީސީ އާއި ފޮޓޯޝޮޕް ސީސީގެ ޕެކޭޖްއެވެ.