އިންޑިއާ ގައި 35 އަހަރުގެ އަންހެނަކާ ކައިވެނި ކުރި 75 އަހަރުގެ މީހަކު ކައިވެންޏަށް އެއް ދުވަސް ނުވަނީސް މަރުވެއްޖެ

އުމުރުން 75 އަހަރުގެ ދުވަސްވީ އިންޑިއާ މީހަކު ހަޔާތުގެ ބައިވެރިއެއް ހޯދުމަށް ކުރި އުންމީދު ޙަޤީޤަތަކަށްވި ނަމަވެސް، އެކަން ދެމިގެން ދިޔައީ ކުރު މުއްދަތަކަށެވެ. އުއްތަރު ޕްރަދޭޝްގެ ޖައުންޕޫރުގައި އޭނާ 35 އަހަރުގެ އަންހެނަކާ ކައިވެނިކުރި ނަމަވެސް، ޖެހިގެން އައި ދުވަހުގެ ހެނދުނު އޭނާ ވަނީ މަރުވެފައެވެ.

މި ހާދިސާ ހިނގީ އެ ސަރަޙައްދުގެ ކުޗްމުޗް އަވަށުގައެވެ. އެ އަވަށުގައި އޭނާ އުޅެމުން އައީ، އޭގެ އަހަރެއްހާ ދުވަސް ކުރިން އޭނާގެ ފުރަތަމަ އަނބިބިމީހާ މަރުވުމަށްފަހު އެކަނިވެރިކަމުގައެވެ.

އެންޑީޓީވީން ރިޕޯޓުކުރި ގޮތުގައި، ސަންގްރޫރާމް ކިޔާ އެ މީހާ ކައިވެނި ކުރުމަށް ފަހު ކުއްލިއަކަށް މަރުވުމާ ގުޅިގެން އޭނާގެ ޢާއިލާ އާއި އަވަށްޓެރިންގެ މެދުގައި ވަހުމު ތަކެއް އުފެދިފައިވެއެވެ.

ފުރަތަމަ ކައިވެނިން ދަރިއަކު ނުލިބި، ދަނޑުވެރިކަމުގެ މައްޗަށް ބަރޯސާވެގެން އުޅުނު އެ މީހާ، އެކަނިވެރިކަން ފިލުވުމަށް އަލުން ކައިވެނި ކުރުމަށް ނިންމީ އޭނާގެ އުމުރުގެ ދެބައިކުޅަ އެއްބައި އުމުރުގެ އަންހެނަކާއެވެ.

އޭނާގެ ބައެއް ގާތްތިމާގެ މީހުންނާއި އަވަށުގެ މީހުން ބުނާ ގޮތުގައި އޭނާ ވަނީ ފަހަކަށް އައިސް އަލުން ކައިވެނި ކުރަން ބޭނުންވާ ވާހަކަ ދައްކާފައެވެ. ނަމަވެސް އޭނާގެ ޢާއިލާ އިން ވަނީ އެކަން ނުކުރުމަށް ނަސޭހަތްތެރިވެފައެވެ.

އެހެން ނަމަވެސް، އޭނާ 35 އަހަރުގެ މަންބަވަތީ އާ ކައިވެނި ކުރީ ސެޕްޓެމްބަރު 29 ވަނަ ދުވަހު އެވެ. އެ ދެމަފިރިން ކޯޓު މެދުވެރިކޮށް ކައިވެނި ކުރުމަށްފަހު، ފަހުން ކުޑަ ހަފްލާ އެއް ބޭއްވިއެވެ.

މިއީ އެ އަންހެން މީހާގެ ވެސް ދެވަނަ ކައިވެންޏެވެ. ރިޕޯޓުތަކުގައިވާ ގޮ ގޮތުން އޭނާގެ ކުރީގެ ފިރިމީހާ އަށް ތިން ކުދިން ލިބިފައިވެއެވެ. އެއީ ދެ އަންހެން ކުދިންނާއި އެއް ފިރިހެން ކުއްޖެކެވެ.

މަންބަވަތީ ބުނާ ގޮތުގައި އެ ދެމަފިރިން ކައިވެނީގެ ރޭ ހޭދަކުރީ ގިނަ ވަގުތު އެކަކު އަނެކެއްގެ ހަޔާތުގެ ވާހަކަތައް ކިޔައިދިނުމުގައެވެ.

ނަމަވެސް، އަނެއް ދުވަހަށް އިރު އެރުމާއެކު ސަންގްރޫރާމްގެ ޞިއްޙީ ޙާލަތު ކުއްލިއަކަށް ދަށްވިއެވެ. އޭނާ ގެންދެވުނީ ހޮސްޕިޓަލަކަށެވެ. އެތަނުގައި ޑޮކްޓަރުން އޭނާ މަރުވެފައިވާ ކަމަށް އިޢުލާނުކުރިއެވެ.

އޭނާ މަރުވި ސަބަބު އަދިވެސް ނޭނގެއެވެ.