"ހުސެން ޒާހިރު" އެއް އުފެދޭ ގޮތް

މިއީ މީމް ހަދައިގެން ސަކަރާތްޖަހާލާފައި އަންނަ ހަފްތާއިން ފެށިގެން އާ މައުލޫއަކަށް ސޯޝަލް މީޑިއާ ބަހުސްތައް ބަދަލުކޮށްފައި ދޫކޮށްލާ ވަރަށްވުރެ ޚައްސާސް މައްސަލައެކެވެ. ގެވެށި އަނިޔާ އެވެ. ދަރީންނަށް ޚަރަދު. ނުދިނުމެވެ. އެތައް ދުވަހެއް ވަންދެން އަނިޔާއާ ދެކޮޅަށް ތެދުވަން ނުކެރި ބަސް ނުބުނެ ހުރުމަށްފަހު ތޮށިފަޅާ ނުކުމެ ބަސް ބުނަން ފެށުމުން ވެސް ދައްކާ ބިރުގެ ވާހަކައެވެ. ފިރެހެނުން ނަގާކިޔާ (މޭލް ޑޮމިނަންޓް) މުޖުތަމައުއެއްގައި އަދިވެސް އަންހެނުން އުޅޭ ހާލަތު, މީމް އަކަށް ހަދައިގެން މި ފަތުރާ ވާހަކައިން އެނގެ އެވެ. މިއީ އަސްލެއް ނެތް ތުހުމަތު ތަކަކަށް ވިޔަސް އަދި ނުވިޔަސް މިއީ މު މުޖުތަމައުގައި އޮތް ވިޔާނުދާ ސަގާފަތެއް ޚުލާސާކޮށް ބުނެދޭ ވާހަކައެކެވެ.

ފިރެހެނުން އިސްވުން( މޭލް ސުޕީރިއޯރިޓީ)

ގަބޫލު ކުރިޔަސް ނުކުރިޔަސް މިކަން ނިމުމަކަށް ނުގެނެވެ އެވެ. ބޭބެގެ އަންނައުނު އިސްތިރިކުރުމާ, ބޭބެއަށް ކާން ހަދައިދިނުމާ, ބޭބެ ކެއީމާ ތަށި ދޮވުމާ, ބޭބެ ހުކުރުން އައިސް ކެއީމާ ބާކީ ހުރިއްޔާ ކާން ޖެހޭ އަންހެނުންނާ, އަންހެން ކުދިން އަދިވެސް މުޖުތަމައުގައި މަދެއް ނުވެ އެވެ. މި ބުނެވުނު ކަންކަމުގައި ދެ ޖިންސް ފަރަގު ކުރަނީ ކޮން ވިސްނުމެއްގެ ދަށުން، ކީއްވެގެން ކަމެއް ނޭނގެ އެވެ. އެކަމަކު މިއީ އަދިވެސް އޮތް ސަގާފަތެއް ކަމަށް ގަބޫލުކުރަން ޖެހެއެވެ. ފިރެހެން ކޮއްކޮ އެއް ހުރިނަމަވެސް ދައްތައެއީ މި މަސައްކަތްތައް ކުރަން ޖެހޭ މީހާ އެވެ. މިއީ މުޖުތަމައު ގަބޫލުކޮށްފައި ހުރި ނުރަނގަޅު އާދަތަކެވެ.

ބެލެނިވެރިކަމާއި ޚަރަދުކުރުން އޮތްނަމަ ވަކިން ޚާއްސަކޮށް އިސްވުން

އިސްވެ ބުނެވުނު ދިރިއުޅުން ވޭތުކުރަމުން ދާ ބޭބެއެއް ނުވަތަ ކޮށްކޮ އަކު އާއިލާގެ ޚަރަދު ބަރަދު ބަލަހައްޓާ އިސްމީހަކަށް ( ބްރެޑް ވިނަރ) އަށް ވެއްޖެ ނަމަ އަދި ވަކީން ހާލަތު ގޯސްވާކަމަށް ފެނެ އެވެ. އޭނާ އަށް އޭރަށް އެހުރެވުނީ ނިކަން ބޮޑު ޒިންމާއެއް ކޮނޑުގައި އެޅިފަ އެވެ. އަންހެން ކޮއްކޮ ނޫނީ ދައްތަ ނަހަމަ މަގަކުން ދިއުން މަނާކުރާނެ މޭސްތިރިއަކީ އޭނާ އެވެ. ވާހަކަ ދައްކާންވީ މީހުންނާއި، ގެއަށް ވަންނަންވީ ގަޑި ވެސް ކަނޑައަޅާނީ ބޭބެ އެވެ. މި އަދަބު އަޚުލާގަށް ކޮއްކޮ ހޭނުމަށްޓަކައި އަނިޔާކުރުން ވެސް އާއިލާތެރެއިން ބަލައިގަނެއެވެ. ކޮއްކޮ އިންނަންވެސް ބޭބެ ހިތްއެދެނީ ނިކަން "މިލިޓަރީ" ފިރެހެނަކާ ކަމަށް ވާނަމަ އެކަން ވެސް ކުރަން ޖެހެނީ އެ އެދޭ ގޮތަކަށެވެ.

މި ބޭބެގެ ޒަވާޖީ ހަޔާތްވެސް ފެށެ އެވެ. މަންމަ ގަބޫލުކުރި މޭލް ސުޕީރިއޮރިޓީގައި ބޮޑުވެގެން އައި ފިރެހެނާ އެހެން އަންހެނެއްގެ މައްޗަށް އަމްރު މައުރޫފު ހިންގަން ފަށަ އެވެ. ކައިވެންޏަކީ ހަމަހަމާއެކު ކަންކަމާ ދެމީހުން ވާހަކަދައްކައިގެން ގޮތްތައް ނިންމަން ޖެހޭ ދިރިއުޅުމުގެ ހަރުފަތަކަށްވުރެ ބޮޑަށް އެއީ ފިރެހެން މީހާ ބުނީމާ ބުނިގޮތަކަށް ކަންކަން ހިނގަންޖެހޭ ދިރިއުޅުމެއްކަމުގައި އެ ފިރެހެނާއަށް ދެކެވެ އެވެ. އޭނާ އޭދޭ ގޮތަށް ކަންކަން ނުވީމާ އަތް އިސްކުރުން އެއީވެސް އޭނާގެ ހައްގަކަށްވެ އެ ވާހަކަ ދެއްކުން އެއީ އަންހެނާ ކުރާ ފާފައެއް ކަމުގައި ކަނޑައެޅެއެވެ. ދަރީން ލިބުނީމާ ރަނގަޅުވާނެ ކަމުގެ ހުވަފެން ދައްކާ ދަރީންވެސް ހޯދަ އެވެ. އޭގެ ފަހުން ދޭ ނިކަމެތިން އަދި މާބޮޑެވެ. ކައިވެނި ރޫޅާލާއިރު ހުންނަނީ ފުރިހަމަ "ހުސެން ޒާހިރު" އެއް އުފެދިފަ އެވެ.