އަފްޣާން ކުއްޖަކު މަތިންދާ ބޯޓުގެ ލޭންޑިން ގިއަރުގައި ފޮރުވިގެން ދިއްލީ އަށް ދަތުރު ކޮށްފި

ކެމް އެއަރގެ ފަސިންޖަރު ބޯޓެއްގެ ފުރޮޅުގެ ކެންޑުމުގެ ތެރޭގައި ފޮރުވިގެން، އަފްޣާނިސްތާނުގެ 13 އަހަރުގެ ކުއްޖަކު ކާބުލް އިން އިންޑިއާގެ ދިއްލީ އަށް ނުރައްކާތެރި ދަތުރެއް ކޮށްފިއެވެ.

އޮފިޝަލުން ބުނާ ގޮތުގައި، އަފްޣާނިސްތާނުގެ އުތުރުގައި އޮންނަ ކުންދުޒް ސިޓީ އަށް ނިސްބަތްވާ އެކުއްޖާ ފެނިފައިވަނީ، ބޯޓު ހޯމަ ދުވަހު ޖެއްސުމަށް ފަހު ދިއްލީގެ ބައިނަލްއަޤްވާމީ އެއަރޕޯޓުގެ ރަންވޭ މަތީގައި ހިނގާބިނގާވެ އުޅެނިކޮށެވެ.

އިންޑިއާގެ ސެކިއުރިޓީ އޮފިޝަލުން އޭނާ ހައްޔަރުކޮށް، އެތައް ގަޑިއިރެއް ވަންދެން ސުވާލު ކުރުމަށް ފަހު، ހަމަ އެ ބޯޓުން ކާބުލް އަށް އަނބުރާ ފޮނުވާލެވުނެވެ.

ރިޕޯޓުތައް ބުނާ ގޮތުގައި، އެކުއްޖާ ބުނީ އޭނާ އެ ދަތުރުކުރީ ކަންކަން ތަޖުރިބާ ކުރުމުގެ ބޭނުމުގައި ކަމަށެވެ.

އިންޑިއާގެ ސެންޓްރަލް އިންޑަސްޓްރިއަލް ސެކިއުރިޓީ ފޯސް (ސީ.އައި.އެސް.އެފް) ގެ ތަރުޖަމާނަކު ބުނީ، ކެމް އެއަރލައިންސްގެ ފްލައިޓް RQ-4401 ގައި އެކުއްޖާ ފޮރުވިގެން ދަތުރުކުރިކަން އެއްވެސް މީހަކަށް އެނގިފައި ނުވާ ކަމަށާއި، އެ ބޯޓު ދިއްލީގައި ޖައްސާފައިވަނީ އާދިއްތަ ދުވަހު ގާތްގަނޑަކަށް ހެނދުނު 11:10 ގައެވެ.

ފުލުހުންނަށް އޭނާ ފެނިފައިވަނީ އެކަނި ހިނގާބިނގާވެ އުޅެނިކޮށް ކަމަށާއި، އެހެންވެ އޭނާ ހައްޔަރުކޮށް ސުވާލުކުރި ކަމަށެވެ.

ރިޕޯޓުތައް ބުނާ ގޮތުގައި، އެކުއްޖާ ބަޔާންކުރީ އޭނާ ފޮރުވިގެން ދަތުރުކުރީ ބޯޓުގެ ފަހަތު ލޭންޑިންގ ގިއަރ ކޮމްޕާޓްމެންޓްގައި ކަމަށެވެ.

ބޯޓުގެ ސަލާމަތީ އިތުރު އިންސްޕެކްޝަންތައް ހެދުމަށް ފަހު، އެއަރލައިންގެ މުވައްޒަފުންނަށް ކުޑަ ރަތްކުލައިގެ އޯޑިއޯ ސްޕީކަރެއް ވެސް ފެނިފައިވެއެވެ.

އިންޑިއަން އެކްސްޕްރެސް ނޫހުން ރިޕޯޓުކުރި ގޮތުގައި، 13 އަހަރުގެ އެކުއްޖާ ދާން ބޭނުންވީ އީރާނަށް ކަމަށާއި، އޭނާ އެރި ފްލައިޓަކީ ތެހެރާނަށް ދާ ފްލައިޓެއް ނޫނ ކަމާއި ދިއްލީއަށް ދަތުރުކުރާ ފްލައިޓެއްކަން އޭނާއަށް އެނގިފައެއް ނުވެއެވެ.

ނޫހުން ބުނާ ގޮތުގައި، އެކުއްޖާ ސިއްރުން ކާބުލް އެއަރޕޯޓަށް ވަދެ، ފަސިންޖަރުންގެ ބަޔަކާއެކު ފޮރުވިގެން ގޮސް، ބޯޓުގެ ފަހަތު ފުރޮޅު ލެއްޕޭ ކެންޑުމުގެ ތެރެއަށް ވަދެ ފޮރުވުނެވެ. އޭނާގެ އަތުގައި އޮތީ ހަމައެކަނި ރަތްކުލައިގެ ސްޕީކަރު އެކަންޏެވެ.

މިފަދަ ހާދިސާތައް މިފަހުން އެމެރިކާއަށް އަދި ޔޫރަޕަށް ދަތުރުކުރާ ފްލައިޓުތަކުގައި ވެސް ހިނގާފައިވެއެވެ. ނަމަވެސް، އެމީހުންގެ ތެރެއިން މަންޒިލަށް ފޯރާ އިރު ތިރިތިބޭ މީހުން ވަރަށް މަދެވެ.

މާހިރުން ބުނާ ގޮތުގައި، މިފަދަ ދަތުރުތަކުން ސަލާމަތްވާ ގިނަ މީހުން، ބޯޓު ތިރިކުރާ ވަގުތު ހޭނެތިފައި ތިބޭއިރު، ލޭންޑިންގ ގިއަރ ތިރިކުރާއިރު ވެއްޓި މަރުވުމުގެ ނުރައްކަލާ ކުރިމަތިވެއެވެ.

2022 ވަނަ އަހަރު، 22 އަހަރުގެ ކެންޔާ ފިރިހެނެއް އަމްސްޓެރްޑޭމްގައި ކާގޯ ބޯޓެއްގެ ފޮރޮޅު ކެންޑުމުގެ ތެރޭގައި ދިރިހުއްޓާ ފެނިފައިވެއެވެ.