ކެނެޑާގައި 400 ގިނިކާމާދޫނި ނައްތާލުމަށް ކުރި އަމުރު އެ ގައުމުގެ ސުޕްރީމް ކޯޓުން ހުއްޓުވައިފި

ކެނެޑާގެ ބްރިޓިޝް ކޮލަމްބިއާގެ ދޫނި ފާމެއްގައި ދޫނި ރޯގާ ފެތުރުމާ ގުޅިގެން ގާތްގަނޑަކަށް 400 ގިނިކާމާދޫނި މަރާލުމަށް ރޭވިފައިވާ މަސައްކަތް އެ ގައުމުގެ ސުޕްރީމް ކޯޓުން ހުއްޓުވައިފިއެވެ.

ސުޕްރީމް ކޯޓުގެ ނިންމުން އައީ ފާމުގެ ވެރިފަރާތުން ދޫނިތައް މަރާލުމުގެ އަމުރާ ދެކޮޅު ހަދާ މައްސަަލަ ސުޕްރީމް ކޯޓަށް ހުށަހެޅުމުންނެވެ.

މި މައްސަލަ އަށް ބައިނަލްއަޤްވާމީ ސަމާލުކަން ލިބިފައި ވާއިރު، މިކަމުގެ ތެރެއަށް ވައިޓް ހައުސްގެ އިސް އޮފިޝަލުން ވެސް ވަނީ ވަދެފައެވެ.

ބުދަ ދުވަހު ކެނެޑާގެ ސުޕްރީމް ކޯޓުގެ ނިންމުމުން، ކެނޭޑިއަން ފުޑް އިންސްޕެކްޝަން އެޖެންސީ (ސީއެފްއައިއޭ) އިން ރާވާފައިވާ ދޫނިތައް މަރާލުމުގެ މަސައްކަތް ވަގުތީގޮތުން ހުއްޓާލާނެއެވެ.

ސުޕްރީމް ކޯޓުގެ ނިންމުން އައީ ޔުނިވަރސަލް އޮސްޓްރިޗް ފާމްސްގެ ވެރިން މި މައްސަލައިގައި ކުރު މުއްދަތަކަށް ހައްޔަރުކުރި ދުވަހުގެ ޖެހިގެން އައި ދުވަހުއެވެ. ރޯޔަލް ކެނޭޑިއަން މައުންޓެޑް ޕޮލިސް (އާރްސީއެމްޕީ) އިން ބުނެފައިވާ ގޮތުގައި، އެމީހުން ހައްޔަރު ކުރީ ކާބޯތަކެތީގެ ރައްކައުތެރިކަން ބަލާ އޮފިޝަލުން "އެމީހުންގެ ޒިންމާ އަދާކުރުމަށް" ހުރަސްއެޅުމާ ގުޅިގެންނެވެ.

ފުލުހުންގެ ބަޔާނެއްގައި ބުނެފައިވާ ގޮތުގައި، ކާބޯތަކެތީގެ ރައްކައުތެރިކަން ބަލާ އޮފިޝަލުންނަށް ފާމުގެ ގޯތިތެރެ ބަލާ ފާސްކުރުމުގެ ވޯރަންޓެއް ދޫކުރެވިފައިވެއެވެ.

އާރްސީއެމްޕީ އޮފިސަރުން އެ ތަނަށް ދިއުމަށް އެދިފައިވަނީ ފާމް އާ ގުޅިގެން "އިތުރުވެފައިވާ ކަންބޮޑުވުންތަކާއި" އަދި "އިހުތިޖާޖުތަކާ" ގުޅިގެން ކަމަށް އެ ފަރާތުން ބުނެފައިވެއެވެ.

ސީއެފްއައިއޭ އިން ބުނެފައިވާ ގޮތުގައި، ކޯޓުން އަމުރުކޮށްފައިވާ ގޮތުގެ މަތިން ދޫނިތައް ބެލެހެއްޓުން އެ ފަރާތުގެ ބެލުމުގެ ދަށުގައި ބާއްވާނެއެވެ. އަދި ޖަނަވާރުންގެ ޑޮކްޓަރުންގެ ބެލުމުގެ ދަށުން އެކަށީގެންވާ ކާނާއާއި ފެން ފޯރުކޮށްދޭނެއެވެ.

އަދި އެ ފަރާތުން ބުނެފައިވާ ގޮތުގައި، ފާމުގެ ވަކި ސަރަހައްދުތަކެއް އެޖެންސީގެ ބާރުގެ ދަށަށް ގެނައުމަށް ހުއްދަދޭ ވޯރަންޓުތައް ދެމިއޮތްކަމާއި، ސީއެފްއައިއޭގެ ހުއްދައަކާ ނުލައި އެ ސަރަހައްދުތަކަށް ވަދެވޭނެ ގޮތް ހަނިކުރެވިފައިވާ ކަމަށެވެ.

ދޫނި ފާމް ގެ ވެރިން ވަނީ ގިނިކާމާދޫނިތައް މަރާލުމުގެ އަމުރާ ވަރަށް ބޮޑަށް ދެކޮޅުހަދާފައެވެ. އަދި އެ އަމުރު ހުއްޓުވުމަށް އެތައް މަސްތަކެއް ވަންދެން ކޯޓުގައި މައްސަލަ ކުރިއަށް ގެންގޮސްފައިވެއެވެ.

މި މައްސަލައަށް ބައިނަލްއަޤްވާމީ ސަމާލުކަން ލިބިފައިވެއެވެ. މީގެ ތެރޭގައި އެމެރިކާގެ ހެލްތު ސެކްރެޓަރީ ރޮބަޓް އެފް ކެނެޑީ ހިމެނެއެވެ. އޭނާ ވަނީ މޭ މަހު ސީއެފްއައިއޭގެ އިސްވެރިޔާއަށް ސިޓީއެއް ފޮނުއްވައި، ދޫނިތައް މަރާލުމުގެ ބަދަލުގައި އެ ދޫނިތަކާ މެދު ދިރާސާކުރުމަށް އެދިފައެވެ.

ފާމް ގެ ވެރިން ވަނީ އެމެރިކާގެ ރައީސް ޑޮނަލްޑް ޓްރަމްޕް އަދި ކެނެޑާގެ ރައްޔިތެއް ކަމަށްވާ ބިލިއަނަރު އީލޮން މަސްކް އަށް މި މައްސަލައިގައި އަޑުއުފުލުމަށް އިލްތިމާސްކޮށްފައެވެ.

ސީއެފްއައިއޭ އިން ޑިސެމްބަރު މަހު ދޫނިތައް މަރާލުމަށް އަމުރުކުރީ ފާމުގައި ދޫނި ރޯގާ ފެތުރުމާ ގުޅިގެން 69 ގިނިކާމާދޫނި މަރުވުމުންނެވެ.

ސުޕްރީމް ކޯޓުގެ މި އަމުރު އައިސްފައިވަނީ، ސެޕްޓެމްބަރު 12 ގައި ފެޑެރަލް ކޯޓް އޮފް އެޕީލްގެ ފަނޑިޔާރަކު ދޫނިތައް މަރާލުމުގެ މަސައްކަތް ކުރިއަށް ގެންދެވިދާނެ ކަމަށް ނިންމުމަށް ފަހުގައެވެ.

މި މައްސަލައިގައި އިތުރު ކުރިއެރުންތައް އަންނަމުން ދާއިރު، ކެނެޑާގެ ޤާނޫނީ އަދި ޖަނަވާރުތަކުގެ ހައްޤުތަކާ ބެހޭ މާހިރުން މި މައްސަލައަށް ވަރަށް ބޮޑު ސަމާލުކަމެއް ދެމުންދެއެވެ. މި މައްސަލައިން އުފެދޭ ސުވާލުތަކުގެ ތެރޭގައި ޖަނަވާރުތަކުގެ ދުޅަހެޔޮކަމާއި، ދަނޑުވެރިންގެ ހައްޤުތަކާއި، އާންމު ސިއްހަތާއި ރައްކާތެރިކަމާ ގުޅޭ ކަންކަން ހިމެނެއެވެ.