ޖެއްސެވި ޕެނަލްޓީ އާއެކު ބޯޅަ އަށް ވުރެ ބާރަށް ރައީސް މުއިއްޒުގެ ބޫޓު ކޮޅު ވިއްސައިގެން ހިނގައްޖެ

ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު މިހާރު އަތޮޅު ތެރޭގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން، ފުޓުބޯޅަ ދަނޑެއް ހުޅުވައި ދެއްވުމުގެ ގޮތުން ޕެނަލްޓީ ޖެއްސެވުމާއެކު އެމަނިކުފާނުގެ ބޫޓު ކޮޅު ވިއްސައިގެން ގޮސްފި އެވެ.

މިކަން ހިނގީ ބުދަ ދުވަހު ރައީސް މުޢިއްޒު އދ.ކުނބުރުދޫ އަށް ވަޑައިގެން އެ ރަށު ފުޓުބޯޅަ ދަނޑު ރަސްމީކޮށް ހުޅުވައި ދެއްވުމުގެ ތެރޭގައެވެ.

ދަނޑު ހުޅުވައި ދެއްވުމަށް ރައީސް ޕެނަލްޓީ ޖެއްސެވި ވަގުތު، އެމަނިކުފާނުގެ ބޫޓު ކޮޅު ވަނީ ވިއްސައިގެން ގޮސްފަ އެވެ. އެ ވަގުތު ބޯޅަ ވެސް ގޯލާ އަަމާޒު ނުވެ ބޭރަށް ދިޔައިރު، އެމަނިކުފާނުގެ ބޫޓު ކޮޅު ހޮވައިގެން ގެންނަން ޖެހުނީ ގޯލު ކަައިރިން ސެކިއުރިޓީ އޮފިޝަލުންނެވެ.

ރަށުގެ ކުދިބޮޑު އެންމެން ދަނޑަށް ހާޒިރުވެފައިވަނިކޮށް ޖެއްސެވި ޕެނަލްޓީ މަތަކުރަން ގޯލަށް އަރާ ހުރި ޒުވާން އުމުރުގެ ކުއްޖާގެ މޫނު މަތިން ވެސް ފެންނަން ހުރީ ހައިރާން ކަމެވެ.

ރައީސް މުޢިއްޒުގެ ބޫޓު ކޮޅު ވިއްސައިގެން ދިޔައިރު، އެތައް ބަޔަކު އަންނަނީ ސޯޝަލް މީޑިއާގައި އެ ވީޑިއޯ ދައުރު ކުރަމުން ފާޑު ކިޔަމުންނެވެ.

ގިނަ ބަޔަކު ބުނަމުން އަންނަނީ ރައީސް މުއިއްޒު އަށް ހުންނެވުނީ ސައިޒަށް ވުރެ ބޮޑު ބޫޓުކޮޅަކަށް އެރުއްވިފައި ކަމުގައެވެ.