ދުނިޔޭގެ އެންމެ ފުރަތަމަ ކަލްކިއުލޭޓަރ ނީލަމުގައި ވިއްކާލުން ޕެރިހުގެ ކޯޓަކުން ހުއްޓުވައިފި

ދުނިޔޭގެ އެންމެ ފުރަތަމަ ކަލްކިއުލޭޓަރުގެ ގޮތުގައި ބެލޭ މެޝިން ނީލަމުގައި ވިއްކާލުން ފަރަންސޭސި ވިލާތުގެ ޕެރިހުގެ ކޯޓަކުން ހުއްޓުވައިފި އެވެ.

ދުނިޔޭގެ ފުރަތަމަ އީޖާދު ކުރި ކަލްކިއުލޭޓަރުގެ ގޮތުގައި ބެލޭ މި މެޝިން ނީލަން ކިޔުމަށް ކޯޓުން ހުރަސް އެޅުމާ އެކު، އެ މެޝިން ނީލަމަށް ނުލާ ގޮތައް މިހާރު ވަނީ ނިންމާފައި ކަމަށް ނީލަން އިންތިޒާމު ކުރާ ކްރިސްޓީސް އިން ވަނީ ބުނެފަ އެވެ.

ފަރަންސޭސި ވިލާތުގެ އެޑްމިނިސްޓްރޭޓިވް ކޯޓުގެ ނިންމުމުގައި ބުނެފައި ވަނީ މި އައިޓަމް އެ ގައުމުން ބޭރަށް ނުގެންދެވޭނެ ކަމަށެވެ.

ނީލަން އިންތިޒާމު ކުރި ކްރިސްޓީސް އިން ކަށަވަރުކޮށްފައި ވަނީ މި މެޝިން އަކީ 1642 ވަނަ އަހަރު ފަރަންސޭސި ހިސާބު އިލްމުވެރިޔާ ބްލެއިސް ޕާސްކަލް އުފައްދަވާފައިވާ މެޝިނެއް ކަމަށެވެ. މި މެޝިނަށް ދީފައިވާ ނަމަކީ ލަ ޕާސްކަލިން އެވެ.

ލަފާ ކުރެވިފައިވާ ގޮތުގައި މި މެޝިން އަށް ނީލަމުގައި 2 މިލިއަން ޔޫރޯ އާއި 3 މިލިއަން ޔޫރޯ އާ ދެމެދުގެ އަގެއް ލިބޭނެ އެވެ.

ނީލަމުގެ ވާހަކަ ފެންމަތި ވުމާއެކު ސައިންސްވެރިންނާއި ރިސާޗަރުން ނާއި ހެރިޓޭޖް ގްރޫޕް ތަކުން ވަނީ ކޯޓުގައި ތާރީހީ މި އާލާތަށް ތަރިކަ އެއް ގޮތުން ރައްކާތެރިކަން ދިނުމަށް އެދިފައެވެ. އެއީ "ގައުމީ ތަރިކަ އެއް" ގެ ގޮތުގައި ބަލަން ޖެހޭނެ ކަމަށް އެ ފަރާތްތަކުން ބުނެފައި ވެއެވެ.

މި މެޝިން އާ ބެހޭ ގޮތުން ހާމަ ކޮށްފައިވާ މައުލޫމާތު ގައި ވާ ގޮތުން ޕާސްކަލް ކަލްކިއުލޭޓަރު ގެ ފުރަތަމަ ވާޝަން އުފައްދަވާފައި ވަނީ އޭނާގެ އުމުރުން އެންމެ 19 އަހަރުގަ އެވެ. މި މެޝިންތަކުގެ ތެރެއިން މިހާރު ދުނިޔޭގައި ފެންނަން އޮތީ ނުވަ މެޝިން އެކަންޏެވެ.

މިއީ އިންސާނީ ތާރީޚު ގައި، ސިކުނޑިން ހަދަމުން އައި ހިސާބު މެޝިނަކުން ކުރާ ގޮތައް ބަދަލު ކުރުމަށް ކުރި ފުރަތަމަ މަސައްކަތެވެ.