ކެލިފޯނިއާގެ ޖަންގަލިތަކުގައި ރޯވުން:މަރުވި މީހުންގެ އަދަދު 40 އަށް
އަދިވެސް 16 ތަނެއްގައި އަލިފާން ވަނީ ރޯވެފައި
މިހާތަނަށް ނުނިވި ވާ 16 ތަނަކުން އަލިފާން ނިއްވުމަށް 10،000 އަށްވުރެ ގިނަ ފަޔަރަ ފައިޓަރުން މަސައްކަތް ކުރަމުން ދޭ
ކެލިފޯނިއާގެ ޖަންގަލިތަކުގައި އަލިފާން ރޯވެ އަނދަމުންދާތާ 6 ދުވަސް ވެފައިވާއިރު މަރުވި މީހުންގެ އަދަދު 40 އަށް އަރައި އެތައް ހާސް ގެއެއް އަނދައިގެން ގޮސްފިއެވެ.
ކެލިފޯނިއާގެ ގަވަރނަރ ވިދާޅުވީ މިއީ އެ ސްޓޭޓަށް މިހާތަނަށް ކުރިމަތިވި " އެންމެ ބޮޑު އެއް ކާރިސާ" ކަމަށެވެ.
މިހާތަނަށް ނުނިވި ވާ 16 ތަނަކުން އަލިފާން ނިއްވުމަށް 10،000 އަށް ވުރެ ގިނަ ފަޔަރ ފައިޓަރުން މަސައްކަތް ކުރަމުން ދެއެވެ.
ގަޑިއަކު 45 މޭލު ބާރު މިނުގައި ޖެހެމުންދާ ވައިގެ ސަބަބުން އިތުރު ޓައުންތަކަށް އަލިފާން ފޯރައި އެތައް ބަޔަކު ރައްކާތެރި ސަރަހައްދުތަކަށް ބަދަލުކުރަން ވަނީ މަޖުބޫރުވެފައެވެ.
އެންމެ ބޮޑަށް އަސަރު ކޮށްފައިވާ ސަރަހައްދަކީ ވައިން އުފައްދާ ސޮނޯމާ ސަރަހައްދު ކަމަށްވާއިރު އެ ސަރަހައްދުން ހޮނިހިރު ދުވަހު ވެސް ވަނީ 3،000 މީހުން ރައްކާތެރި ސަރަހައްދުތަކަށް ބަދަލު ކޮށްފައެވެ.
"މިއީ ގަބޫލު ކުރަން ވެސް ދަތި ގެއްލުންތަކެއް" ގަވަރނަރ ޖެރީ ބްރައުން އެ ސިޓީއަށް ޒިޔާރަތްކުރައްވައި ވިދާޅުވިއެވެ.
" މިއީ އެއްވެސް މީހަކަށް ޚިޔާލަށް ވެސް ނުގެނެވޭނެ ފަދަ ބިރުވެރިކަމެއް"
މިއީ ކެލިފޯނިއާގެ ތާރީޚުގައި ކުރިމަތިވި އެންމެ ގެއްލުން ބޮޑު އަލިފާނުގެ ހާދިސާ ކަމަށްވާއިރު މިހާތަނަށް 100،000 އެއްހާ މީހުންގެ ގެދޮރުވަނީ ގެއްލިފައެވެ. އަދި އެތައް އަވަށްތަކެއްވަނީ އަޅިއަށްވެގެން ގޮސްފައެވެ.
އަލިފާން ނިއްވުމުގައި މަސައްކަތް ކުރާ ފަރާތްތަކަށް ހުކުރު ދުވަހުވަނީ ކުޑަ ކުރިއެރުމެއް ލިބިފައެވެ. އެ ފަރާތްތަކުން ވަނީ ދެކުނުގެ ސަރަހައްދުތަކުގައި ހުރި އަލިފާން ހިފާފާނެ ސާމާނު އެހެން ސަރަހައްދުތަކަށް ބަދަލު ކޮށްފައެވެ. ނަމަވެސް ބާރު ވަޔާއި ވައިގެ ތެތްކަށް ދަށަށް ގޮސްފައިވާ ވަރުން އަލިފާންގަޑު ދަނީ އިތުރަށް ފެތުރެމުންނެވެ.
