ކެޓަލޯނިއާގެ މިނިވަންކަން އިއުލާންކޮށްފިތޯ ބަލަން ފަސް ދުވަހުގެ މުހުލަތެއް ސްޕެއިނުން ދީފި

ކެޓަލޯނިއާގެ ލީޑަރު ކާލެސް ޕުއިޖްޑެމޮންޓް ކެޓަލޯނިއާގެ މިނިވަންކަން އިއުލާން ކުރައްވައިފިތޯ ނުވަތަ ނޫންތޯ ސާފުކޮށްދެއްވުމަށް ސްޕެއިންގެ ސަރުކާރުން ކެޓަލޯނިއާގެ ލީޑަރަށް މުހުލަތެއް ދީފިއެވެ.

ރިޕޯޓުތައް ބުނާ ގޮތުން ކެޓަލޯނިއާގެ ލީޑަރު މިނިވަންކަން އިއުލާން ކުރައްވައިފި ކަމަށް ވިދާޅުވެއްޖެ ނަމަ، މިނިވަންކަން އަނބުރާ ގެންދިއުުމަށް ޕުއިޖްޑެމޮންޓް އަށް އިތުރު ތިން ދުވަސް ދޭނެއެވެ. އަދި އެ ގޮތަށް އަމަލު ނުކޮށްފި ނަމަ ސްޕެއިންގެ ސަރުކާރުން ކެޓަލޯނިއާގެ މިނިވަންކަން ސަސްޕެންޑްކޮށް ސްޕެއިންގެ މައި ސަރުކާރުގެ ފުރިހަަމަ ބާރު ހިންގާނެ ކަމަށް ރިޕޯޓުތައް ބުނެއެވެ.

ކެޓަލޯނިއާގެ ލީޑަރު ވަނީ އަންގާރަ ދުވަހު އެ ސަރަހައްދުގެ މިނިވަންކަން އިއުލާންކުރުމުގެ ގަރާރުގައި ސޮއެ ކުރައްވާފައެވެ. އެހެންނަމަވެސް މަޝްވަރާކުރުމަށް ވަގުތު ދޭންކަމަށް ވިދާޅުވެ ގަރާރު ތަންފީޒު ކުރުން ވަނީ ފަސްކޮށްފައެވެ.

ކެޓަލޯނިއާގެ މިނިވަންކަން އިއުލާން ކުރަން ފެނޭތޯ ބެލުމަށް އޮކްޓޯބަރު 1 ގައި ބޭއްވި ވޯޓުގައި، 90 ޕަސެންޓް މީހުން ސްޕެއިން އިން މިިނިވަން ވާން ފެންނަ ކަމަށް އާނ ބަސް ބުނެފައި ވެއެވެ. ކެޓަލޯނިއާގައި ނެގި ވޯޓާ ގުޅިގެން ސްްޕެއިންގެ މައި ސަރުކާރުން ބުނެފައި ވަނީ އެ ވޯޓަކީ ގާނޫނު އަސާސީއާ ޚިލާފު ބާތިލް އެއްޗެއް ކަމަށެވެ. ވޯޓު ނިމުނުތާ ކުޑަވަގުތުކޮޅެއްގެ ތެރޭގައި ސްޕެއިންގެ ބޮޑުވަޒީރު މާރިއާނޯ ރަޚޮއި ވިދާޅުވީ ޣައިރު ގާނޫނީ ވޯޓެއްގައި ބައިވެރިކޮށް ކެޓަލޯނިއާގެ ރައްޔިތުން މޮޔަ ހައްދާފައިވާ ކަމަށެވެ. ބޮޑުވަޒީރު ވަނީ އެ ވޯޓަކީ ޑިމޮކްރަސީއަށް ކުރި ފުރައްސާރައެއް ކަމަށް ވިދާޅުވެފައެވެ.

ސްޕެއިންގެ ކެޓަލޯނިއާއަކީ ސްޕެއިންގެ އެންމެ ފުދުންތެރި އަދި މުއްސަނދި ސަރަހައްދުތަކުގެ ތެރޭގައި ހިމެނޭ، އަމިއްލަ ބަހަކާއި، ސަގާފަތަކާއި އަދި އަމިއްލަ ތާރީޚެއް އޮތް ސަރަހައްދެކެެވެ.