ހަނގުރާމަވެރި އަލްޤައިދާ ޖަމާޢަތުން 2011 ވަނަ އަހަރު ހިފައި ހައްޔަރުކުރި ސްވިޑެންގެ ރައްޔިތެއް ކަމުގައިވާ ޔޯހާން ގުސްތަފްސަން މިނިވަންކޮށްފިއެވެ.

އަލްޤައިދާއިން ޔޯހާން ހައްޔަރުކޮށްފައި ވަނީ، ސްވިޑެން އިން ދެކުނު އެފްރިކާއަށް ސައިކަލުގައި ދަތުރުކުރަމުން ދަނިކޮށް، އޭނާ މަޑުކޮށްގެން ހުރި ހޮޓަލަކަށް ދިން ހަމަލާއެއްގައި، 2011 ވަނަ އަހަރުގެ ނޮވެމްބަރު މަހު މާލީގެ އުތުރުގައި އޮންނަ ސިޓީއެއް ކަމުގައިވާ ޓިމްބުކްތޫއިންނެވެ. އޭނާއާ އެކު ދެކުނު އެފްރިކާގެ ރައްޔިތެއް ކަމުގައިވާ ސްޓެފެން މެކްގައުން އާއި ނެދަލޭންޑްސްގެ ރައްޔިތެއް ކަމުގައިވާ ޖާކް ރީކް ވެސް ވަނީ ހައްޔަރުކޮށްފައެވެ. މީގެ އިތުރުން ހޮޓަލަށް ދިން ހަމަލާގައި ޖަރުމަނުގެ ފަތުރުވެރިއަކު މަރުވެފައި ވެސް ވެއެވެ.

ފްރާންސްގެ ސްޕެޝަލް ފޯސަސްއިން ހިންގި ޚާއްސަ އޮޕަރޭޝަނެއްގައި 2015 ވަނަ އަހަރު ރީކް ސަލާމަތް ކުރި ނަމަވެސް، މެކްގައުންއަށް ވީގޮތެއް އަދި އަދަށް ދާންދެން ވެސް ކަށަވަރެއް ނުވެއެވެ.

ހޮޓަލަށް ދިން ހަމަލާ އާއި އެތަނުގައި ތިބި ފަތުރުވެރިން ވަގަށް ނަގައި ހައްޔަރުކުރުމުގެ ޒިންމާ، އަލްޤައިދާގެ ގޮތްޕެއް ކަމުގައިވާ، އަލްޤައިދާ އިން ދި އިސްލާމިކް މަޤްރިބް (އާޤިމް) އިން ވަނީ އުފުލާފައެވެ. އާޤިމްއަކީ، 2012 ވަނަ އަހަރު މާލީގެ އުތުރުގެ ހިސާބުތަކަށް ވެރިވެގަތް ހަނގުރާމަވެރި ޖަމާއަތްތަކުގެ ތެރެއިން އެއް ޖަމާއަތެވެ.

ޔޯހާން މިނިވަންކޮށް، އާއިލާއާ ހަވާލުކުރިކަން އިޢުލާނުކުރައްވަމުން ސްވިޑެންގެ ފޮރިން މިނިސްޓަރު މާގޮޓް ވޯލްސްޓްރޮމް ވިދާޅުވީ، ޔޯހާން ހުރީ ފުރިހަމަ ސިއްޙަތުގައި ކަމަށާއި، އޭނާ ކުރިމަތިލާން ޖެހުނު ކަންކަމާ އަޅާ ބަލާއިރު، އޭނާގެ ނަފްސާނީ ހާލަތު ވެސް ރަނގަޅު ކަމަށެވެ.

ޔޯހާން މިނިވަން ކުރުމަށް އާޤިމްގެ ހަނގުރާމަވެރިން އެއްބަސްކުރުވީ ކިހިނެއްތޯ ކުރެވުނު ސުވާލަށް ޖަވާބުދެއްވަން ދެކޮޅު ހައްދަވައި، މާގޮޓް ވިދާޅުވީ، މިއީ ފުލުހުންނާއި، ސިޔާސީ ފަރާތްތަކާއި، ޑިޕްލޮމޭޓުންނާއި، ބައިނަލްއަޤުވާމީ އެކި ފަރާތްތަކުން އަހަރުތަކެއް ވަންދެން ކުރި މަސައްކަތުގެ ނަތީޖާ ކަމަށެވެ.

މީގެ އިތުރުން، ޔޯހާން ދޫކުރުމަށް އާޤިމްއަށް އަގެއް ދެއްކިތޯ ކުރެވުނު ސުވާލުގެ ޖަވާބުގައި މާގޮޓް ވިދާޅުވީ، ސްވިޑެންގެ އުސޫލަކީ މީހުން ވަގަށް ނެގުމުގެ ހާދިސާތަކުގައި ކުށްވެރިންނަށް ފައިސާ ނުދިނުން ކަމަށެވެ.

އޭއެފްޕީއަށް މައުލޫމާތުދިން މާލީގެ ސަލާމަތީ ބާރުތަކުގެ މަސްދަރަކުން ބުނެފައި ވަނީ، ޔޯހާން މިނިވަން ކުރުމުގައި މާލީގެ އޮފިޝަލުން އެހީވި ކަމަށާއި، ހަނގުރާމަވެރިން އޭނާ ދޫކޮށްލާފައި ވަނީ މާލީ ޑެޒަރޓްގެ ތެރެއަށް ކަމަށެވެ.

ދުނިޔޭގެ އެކި ޤައުމުތަކުގައި ހަރަކާތްތެރިވާ އަލްޤައިދާގެ ގޮފިތަކުން، އެ ގޮފިތަކަށް ފަންޑު ހޯދުމަށް ފަތުރުވެރިން ހައްޔަރުކޮށް، އެމީހުން މިނިވަން ކުރުމުގެ ބަދަލުގައި ފައިސާގެ ބޮޑެތި އަދަދުތައް ހޯދުމަށް ހުށަހެޅުމުގެ ހާދިސާތައް ވަރަށް ގިނައިން ހިނގާފައި އެބަހުއްޓެވެ.