ޚާއްސަ އެހީއަށް ބޭނުންވާ ކުދިންގެ ނަމުގައި ތައުލީމީ ގާނޫނަށް ގެންނަ ބަދަލުތަކުގެ ފަހަތުގައި ހީލަތްތެރި ސަބަބުތަކެއް އެބަހުރި: އިހުސާން
21 ނޮވެމްބަރު 2026 | ހޮނިހިރު 05:27ތައުލީމީ ގާނޫނަށް ހުށަހަޅާފައިވާ އިސްލާހުތަކުގެ ސަބަބުން ސްކޫލްތަކުން ދޭންޖެހޭ ތެރަޕިސްޓުންގެ ފަންނީ އެހީތެރިކަން އުނިވެ، ޚާއްސަ އެހީއަށް ބޭނުންވާ ކުދިން މުޖުތަމައުން އެކަހެރިވެދާނެ ކަމުގެ ކަންބޮޑުވުން ކުރީގެ ޑެޕިއުޓީ މިނިސްޓަރު އިހުސާން ވަނީ ފާޅުކުރައްވާފައި. އޭނާ ވިދާޅުވީ ހޯމް ސްކޫލިންއަކީ މިހާރުވެސް އޮތް ފުރުސަތަކަށްވާއިރު، މި ބަދަލުތަކުގެ ސަބަބުން އިންކްލޫސިވް ތައުލީމުގެ އަސްލު މަގްސަދު ގެއްލިގެންދާނެ ކަމެއް ކަމަށް


ހޮނިހިރު ދުވަހުގެ ފަށާއިރު ޕްރޮގްރާމްގައި އެޑިއުކޭޝަން މިނިސްޓްރީގެ ކުރީގެ ޑެޕިއުޓީ މިނިސްޓަރު މުހައްމަދު އިހުސާން ވާހަކަ ދައްކަވަނީ | ރާއްޖެއެމްވީ
ޚާއްސަ އެހީއަށް ބޭނުންވާ ކުދިންނަށް ފުރުސަތު ފަހިކޮށްދިނުމުގެ ނަމުގައި ތައުލީމީ ގާނޫނަށް ހުށަހަޅާފައިވާ ބަދަލުތަކަކީ ކުރަން ނުޖެހޭ ކަމެއް ކަމަށާއި، އޭގެ ފަހަތުގައި ވަނީ ހީލަތްތެރި ސަބަބުތަކެއް ކަމަށް އެޑިއުކޭޝަން މިނިސްޓްރީގެ ކުރީގެ ޑެޕިއުޓީ މިނިސްޓަރު މުހައްމަދު އިހުސާން ވިދާޅުވެއްޖެ އެވެ.
ހޮނިހިރު ދުވަހުގެ "ފަށާއިރު" ޕްރޮގްރާމުގައި ވާހަކަދައްކަވަމުން އިހުސާން ވިދާޅުވީ، ޚާއްސަ ހާލަތްތަކުގައި ކުދިންނަށް ގޭގައި ތިބެގެން ކިޔެވޭނެ އިންތިޒާމު ހަމަޖެއްސުމަކީ މިހާރު އޮތް ގާނޫނުތަކާއި އުސޫލުތަކުގެ ތެރެއިން ވެސް ފުރުސަތު އޮތް ކަމެއް ކަމަށެވެ. އަދި އެއީ އަލުން ގާނޫނެއް ނުވަތަ ގަވާއިދެއް ހަދައިގެން ފަހިކޮށްދޭންޖެހޭ ކަމެއް ނޫން ކަމަށް އޭނާ ވިދާޅުވި އެވެ.
ދާއިމީ ގޮތެއްގައި ކުދިން ކިޔަވާ ތަނަކީ ގެ ކަމުގައި ހަދައިގެން ހޯމް ސްކޫލިން ކުރިއަށް ގެންދިއުމަކީ ކުދިންގެ ހެދިބޮޑުވުމަށް އެންމެ ރަނގަޅު ގޮތް ކަމަށް ގަބޫލުނުކުރެވޭ ކަމަށް އިހުސާން ވިދާޅުވި އެވެ. ސަރުކާރުގެ ބައެއް މެންބަރުން މަޖިލީހުގައި މިކަން އެހެން ގައުމުތަކުގައި ވެސް އޮންނަ ކަމެއްގެ ގޮތުގައި ފާހަގަކުރެއްވި ނަމަވެސް، މި ބަދަލުތަކާ މެދު ކަންބޮޑުވާ މައިގަނޑު ސަބަބުތަކެއް އެބަހުރި ކަމަށް އޭނާ ވިދާޅުވި އެވެ.
މި ބޮޑަށް އެ ބަދަލުތައް ސިފަކުރާނީ މި ކުރަން ނުޖެހޭ ކަމެއް މި ކުރަން ބޭފުޅުން ހިފީމާ އޭގެ ފަހަތުގައި ހީލަތްތެރި ކޮންމެވެސް ސަބަބުތަކެއް ހަގީގަތުގައި ހުންނާނެ. އެހެންވީމާ އޭގައި ހުރި ޑީޓެއިލްސްތަކަށް ކޮންމެވެސް ވަރަކަށް އަޅުގަނޑުމެން ބަލާލިއިރުގައި އެ މަންޒަރު ކޮންމެވެސް ވަރަކަށް އަޅުގަނޑުމެންނަށް އެބަ ފެނޭމުހައްމަދު އިހުސާން
އިހުސާން ވިދާޅުވީ، 2020 ވަނަ އަހަރު ފާސްކުރި ތައުލީމުގެ ގާނޫނުގައި އިންކްލޫސިވް އެޑިއުކޭޝަން ސްކޫލްތަކުގައި ކުރިއެރުވުމަށް ގިނަ ކަންތައްތަކެއް ހިމަނާފައިވާނެ ކަމަށާއި، އޭގެ ތެރޭގައި ސްކޫލްތަކުގެ މުވައްޒަފުންގެ ގޮތުގައި ތެރަޕިސްޓުން ހިމެނުން ހިމެނޭ ކަމަށެވެ.
ނަމަވެސް މިހާރު ހުށަހަޅާފައިވާ ބިލުން ތެރަޕިސްޓުންގެ ބައި އުނިކޮށްފައިވާކަން ފާހަގަކުރައްވައި، އޭނާ ވިދާޅުވީ މިއީ ދަރިވަރުންނަށް ސްކޫލްތަކުން ދޭންޖެހޭ ފަންނީ އެހީތެރިކަން ހުއްޓާލުމާ އެއްފަދަ ކަމެއް ކަމަށެވެ.
މީގެ އިތުރުން އިހުސާން ވިދާޅުވީ، ޚާއްސަ އެހީއަށް ބޭނުންވާ ކުދިން މުޖުތަމައުން އެކަހެރިކޮށް ބާކީކުރުމަކީ ހައްލެއް ނޫން ކަމަށެވެ.
އިންކްލޫސިވް ތައުލީމުގެ ހަގީގީ މާނައަކީ، ސްކޫލްތަކާއި އެ ތަންތަނުން ދޭ ޚިދުމަތްތައް އެ ކުދިންގެ ބޭނުންތަކަށް އެކަށޭނަވާ ގޮތަށް ބައްޓަންކުރުން ކަމަށާއި، އޭގެ ތެރޭގައި އެސިސްޓެންޓް ޓީޗަރުންނާއި އިތުރު އެހީތެރި ވަސީލަތްތައް ފޯރުކޮށްދިނުން ހިމެނޭ ކަމަށް ވެސް އޭނާ ވިދާޅުވި އެވެ.











