11-12 ގައި ޕްރައިވެޓް ސްކޫލްތަކުގައި ކިޔަވާ ނަމަ ސަރުކާރުން ފީ ނުދެއްކުމަކީ ދަރިވަރުންނަށް ދިން އަނިޔާ އެއް : އިހުސާން

ޕްރައިވެޓް ސްކޫލްތަކުގައި 11-12 ގައި ކިޔަވާ ދަރިވަރުންގެ ހުރިހާ ޚަރަދެއް ބެލެނިވެރިން ކުރަން ޖެހޭ ގޮތަށް ހަމަޖެއްސުމަކީ ވަރަށް ބޮޑު އަނިޔާ އެއް ކަމަށް ނިމިދިޔަ ސަރުކާރުގެ އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރ މުހައްމަދު އިހުސާން ވިދާޅުވެއްޖެއެވެ.

އޭނާ އެފަދައިން ވިދާޅުވީ, ޕްރައިވެޓް ސްކޫލްތަކުގައި 11-12އިގައި ކިޔަވާ ދަރިވަރުންގެ ހުރިހާ ޚަރަދެއް ދެން ކުރަން ޖެހޭނީ ދަރިވަރުންގެ ބެލެނިވެރިން ކަމަށް ނިންމާ އެޑިއުކޭޝަން މިނިސްޓްރީން ސްކޫލްތަކަށް އެކަމާއި މެދު ރާއްޖެއެމްވީން ކުރި ސުވާލަކަށް ޖަވާބުދެއްވަމުންނެވެ.

ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުގައި އޭލެވެލް އަށް ކިޔަވާ ކޮންމެ ކުއްޖަކަށް ވެސް އެއް މިންގަނޑަކުން ޚަރަދު ކޮށްފައިވާނެ ކަމަށެވެ. އެގޮތުން މާލެ ސަރަހައްދުގައި ތައުލީމް ހާސިލްކުރާ ކުދިންނަށް ފީ ދިނުމުގައި ސީއެޗްއެސްސީގައި ކުއްޖެއްގެ ބޮލަކަށް ޚަރަދު ކުރަނީ ކިހާވަރެއްތޯ ބަލާފައިވާނެ ކަމަށް އިހުސާން ވިދާޅުވިއެވެ. އެ އަދަދު ވިލާ ކޮލެޖާއި އަހުމަދިއްޔާގައި ކިޔަވާ ކުދިންނަށް ވެސް ޚަރަދު ކުރަމުން ދިޔަ ކަމަށް އޭނާ ވިދާޅުވިއެވެ.

މީގެ އިތުރުން ސަރުކާރުން އައި ގޮތަށް އައިސް ޕްރައިވެޓް ސްކޫލްތަކުގައި އޭލެވެލް އަށް ކިޔަވަންދާން ބޭނުންވާ ކުދިންނަށް ދެމުން އައި ޕޮކެޓް މަނީ ކަނޑާލާފައިވާ ކަަމަށް އިހުސާން ވިދާޅުވިއެވެ. އެކަމުގައި އިސްތިސްނާ ކުރީ އަހުމަދިއްޔާ ފަދަ ސްކޫލްތައް ކަމަށާއި އަހުމަދިއްޔާ އަށް ވެސް ދެމުންދިޔައީ ކުރިން ލިބުނު މިންވަރަށް ވުރެ ކުޑަ މިންވަރެއްގެ އިންސެންޓިވް އެއް ކަމަށް އޭނާ ވަނީ ފާހަގަކުރައްވާފައެވެ.

އޭލެވެލްގައި ކިޔަވާ ދަރިވަރަކަށް ބޮލަކަށް ޖެހޭ އަދަދު ޕްރައިވެޓް ސްކޫލްތަކަށް ފޯރުކޮށްދެމުން އައި ކަމަށާއި ސަބަބަކީ މާލެ ސަރަހައްދުގައި އޭލެވެލް އަށް ކިޔެވުމުގެ ފުރުސަތު އޮތް ގޮތް ކަމަށް އޭނާ ވިދާޅުވިއެވެ. އަދި އެކަމުގެ އަނެއް ބޭނުމަކީ ސްކޫލްތަކުގެ މެދުގައި ވާދަވެރިކަން އުފެދި ދަރިވަރުންނަށް ރަނގަޅު ވަސީލަތްތަކެއް އުފެދުން ކަމަށް ވެސް އިހުސާން ވިދާޅުވިއެވެ.

"މީގަ މާ ބައިވަރު މާއްދާތަކެއް ސަރކިއުލާގައި ލިޔުމުގެ ބޭނުމެއް ވެސް ނެތް. ދެން ސަރުކާރުން ޕްރައިވެޓް ސްކޫލަށް ފައިސާ ނުދޭނަމޭ ބުނެފަ ނިންމާލި ނަމަ ނިމުނީ." އިހުސާން ވިދާޅުވިއެވެ.

ޕްރައިވެޓް ސްކޫލްތަކުގައި 11-12އިގައި ކިޔަވާ ކުދިންނަށް ސަރުކާރުން ފީ ދެއްކުން ހުއްޓާލަން ނިންމިކަން ހާމަވީ އެޑިއުކޭޝަން މިނިސްޓްރީން އާއްމު ކުރި ސްކޫލްތަކަށް ކުދިން ވެއްދުމާއި ސްކޫލްތަކަށް ކުދިންވެއްދުމާއި އެއް ސްކޫލުން އަނެއް ސްކޫލަށް ދަރިވަރުން ބަދަލުކުރުމާއި ގުޅޭ އާ އުސޫލުގައެވެ. އެ އުސޫލު ހާމަކޮށްފައި ވަނީ 15 ޖުލައި 2025ގައެވެ.

އެ ސަރކިއުލާގެ ސްކޫލްގެ ޖާގަ ދިނުމުގެ ބައި، ނުވަތަ (11) ވަނަ ނުކުތާގެ (ޅ)ގައި ބުނެފައި ވަނީ ސަރުކާރު ސްކޫލުން ޖާގަ އަށް ނޭދި އެހެން ސްކޫލްތަކަށް ފޮނުވާ ދަރިވަރުންނަށް ކުރަން ޖެހޭ ހުރިހާ ޚަރަދެއް ކުރާނީ ބެލެނިވެރިން ކަމަށެވެ. އަދި ހަމަ އެ ނުކުތާގެ (ކ)ގައި ބުނެފައި ވަނީ ސަރުކާރު ސްކޫލަކުން ޖާގަ ލިބުމުން އެ ޖާގަ ބޭނުން ނުކޮށް އެހެން ސްކޫލަކަށް ދަރިވަރު ފޮނުވާ ހާލަތުގައި ދަރިވަރުގެ ފީ އާޢި އެހެނިހެން ޚަރަދުތައް ކުރާނީ ބެލެނިވެރިޔާ ކަމަށެވެ.

އެ ސަރކިއުލާގައި އިތުރަށް ބުނެފައި ވަނީ ސަރުކާރު ސްކޫލުން ޖާގަ އަށް އެދި ހުށަހަޅާޖާގަ ނުލިބޭ ހާލަތުގައި މިނިސްޓްރީގެ ފަރާތުން އެހެން ސްކޫލަކުން ޖާގަ ހަމަޖައްސާދޭ ދަރިވަރުންނަށް، އެ ޖާގަ ހަމަޖައްސައިދޭ މުއްދަތަކަށް މިނިސްޓްރީގެ ފަރާތުން ފީ ދައްކާދޭނެ ކަމަށެވެ.

މީގެ އިތުރުން އެފަދަ ދަރިވަރުންނަށް ސަރުކާރު ސްކޫލަކުން ޖާގަ ހަމަޖެއްސުމުން، އެ ޖާގަ ލިބުނު ސްކޫލަށް ދަރިވަރުން ބަދަލުކުރަން ވާނެ ކަަމަށް އެ ސަރކިއުލާގައި ވަނީ ބުނެފައެވެ. އަދ އެގޮތަށް އެންގުމުން ދަރިވަރު ސްކޫލް ބަދަލު ނުކޮށްފި ނަމަ އެ ހާލަތުގައި ދަރިވަރުގެ ފީ އާއި އެހެނިހެން ޚަރަދުތައް ކުރާނި ބެލެނިވެރިން ކަމަށް ވަނީ ބަޔާންކޮށްފައެވެ.