އަންނަ އަހަރުގެ ބަޖެޓު ފަރުމާކޮށްފައި ވަނީ ޑޮލަރުގެ މައްސަލައަށާއި މިއަދުގެ ހާލަތަށް އިތުރު ބުރައެއް އަންނާނެ ގޮތަށް: މެންބަރު ޝަމްހީދު
20 ނޮވެމްބަރު 2026 | ހުކުރު 11:56އަންނަ އަހަރުގެ ބަޖެޓަކީ ޑޮލަރުގެ މައްސަލައަށް އިތުރު ތަކުލީފުތަކެއް ކުރިމަތިވާނެ ގޮތަށް ފަރުމާކޮށްފައިވާ ބަޖެޓެއް ކަމަށް މެންބަރު އަހުމަދު ޝަމްހީދު ވިދާޅުވެއްޖެ. ސަރުކާރުގެ ސިޔާސަތުތަކުގެ ސަބަބުން ފަތުރުވެރިކަމަށް ހުރަސްއެޅި ޖީޑީޕީ ކުރިއެރުން މަޑުޖެހިފައިވާކަން ފާހަގަކުރައްވައި، ބަޖެޓުގެ ބޭރުން ޚަރަދުކުރުމަކީ ގާނޫނުއަސާސީއާ ހިލާފު ކަމެއް ކަމަށް އޭނާ ވިދާޅުވި


ރައްޔިތުންގެ މަޖިލީހުގެ ހުޅުމާލޭ ދެކުނު ދާއިރާގެ މެންބަރު އަހުމަދު ޝަމްހީދު ރާއްޖެޓީވީގެ "ޓީވީ ޓޯކް" ޕްރޮގްރާމްގައި | ރާއްޖެ އެމްވީ
އަންނަ އަހަރަށް ލަފާކޮށް ސަރުކާރުން ހުށަހަޅާފައިވާ ބަޖެޓު ފަރުމާކޮށްފައި ވަނީ ޑޮލަރުގެ މައްސަލައަށާއި މިއަދުގެ ހާލަތަށް އިތުރު ބުރައެއް އަންނާނެ ގޮތަށް ކަމަށް ރައްޔިތުންގެ މަޖިލީހުގެ ހުޅުމާލޭ ދެކުނު ދާއިރާގެ މެންބަރު އަހުމަދު ޝަމްހީދު ވިދާޅުވެއްޖެ އެވެ.
ރާއްޖެޓީވީގެ "ޓީވީ ޓޯކް" ޕްރޮގްރާމްގައި ވާހަކަދައްކަވަމުން މެންބަރު ޝަމްހީދު ވިދާޅުވީ ދިވެހިރާއްޖެއަކީ މުޅި ދުނިޔެއަށް ބަލާއިރު އެންމެ ދަށުން ޖީޑީޕީ ކުރިއެރި ގައުމު ކަމަށެވެ. އެގޮތުން އިތުރަށް ޑޮލަރު ގައުމަށް ވަންނާނީ ޖީޑީޕީ ކުރިއަރައިގެން ކަމަށް މެންބަރު ޝަމްހީދު ވިދާޅުވި އެވެ.
ޑޮލަރު މައްސަލަ ބޮޑުވީ މި ސަރުކާރުގެ ސިޔާސަތުތަކުގެ ސަބަބުންކަން ފާހަގަކުރައްވާ މެންބަރު ޝަމްހީދު ވިދާޅުވީ ގާނޫނުތައް ގެނެސްފައިވާ ބަދަލަކީ ފަތުރުވެރިން ރާއްޖެ އައުމަށް ގޮންޖެހުމަކަށް ވާ ގޮތަށް ގެނެސްފައިވާ ބަދަލުތަކެއް ކަމަށެވެ.
ހާއްސަކޮށް އެއާޕޯޓުން ނަގާ ފީ، އެއާޕޯޓުން ނަގާ ފީގެ މާނައަކީ ޓިކެޓު އަގު ބޮޑުވީ، އެހެންވީމާ މީ މި ބޭފުޅުން އެއްކަލަ މީ ކާލަން ވެގެން، ބޮޑު އެއްޗެއް ކާލަން ހަދައިގެން މިއޮތީ ބޮނޑި ލިބިފައިއަހުމަދު ޝަމްހީދު
ގައުމަކަށް އެއްޗެއް ލިބޭނީ އެތަނަކަށް މީހުން އައިސްގެން ކަމަށާއި މީހުން އައުމަށް އުނދަގޫކޮށްފި ކަމުގައިވާ ނަމަ ގައުމަށް ލިބޭ ގެއްލުން ބޮޑުވާނެ ކަމަށް މެންބަރު ޝަމްހީދު ވިދާޅުވި އެވެ.
އެހެންކަމުން، އަންނަ އަހަރަށް ލަފާކޮށް ފިނޭންސް މިނިސްޓްރީން ހުށަހަޅާފައިވާ ބަޖެޓަކީ މިއަދުގެ ހާލަތަށާއި ޑޮލަރުގެ މައްސަލައަށް އިތުރު ބުރައެއް އަަންނާނެ ގޮތަށް ފަރުމާކޮށްފައިވާ ބަޖެޓެއް ކަމަށް މެންބަރު ޝަމްހީދު ވިދާޅުވި އެވެ.
އެއީ މީގަ އެބަހުރި ހަމަ އެމްއެމްއޭ ގަވަރުނަރު މަޖިލީހުގައި އައިސް ދެން ހަމަ ވަރަށް ދުރުދުރުން ދާނީ އެކަމަކު ބުނާ އެއްޗެއް އަޅުގަނޑުމެންނަށް ވަރަށް ސާފުކޮށް އެބަ އެނގޭ. އެތެރޭގެ ބާޒާރުން 12 ބިލިއަން ނަގާފިއްޔާ އެއީ ހަމަ ޑޮލަރު ފަހަތުން ދުވާނެ 12 ބިލިއަން، އެބޭފުޅުން އެ ބުނަނީ އެތެރޭން ފައިސާ ނަގައިގެން ޕްރޮޖެކްޓް ނުހިންގާށޭ. ތަރައްގީގެ މަޝްރޫއު ގެންނަން ބޭރުން ޑޮލަރު ގެންނާށޭއަހުމަދު ޝަމްހީދު
މެންބަރު ޝަމްހީދު ވަނީ މި ސަރުކާރުން ބަޖެޓު ނަހަމަ ގިތޮގައި ބޭނުން ކުރާ ކުރުން ރައްޔިތުންނަށް އެނގެން ޖެހޭ ކަމަށް ވިދާޅުވެފަ އެވެ. އެގޮތުން ބަޖެޓުގެ ބޭރުން އެތަށް ކުންފުންޏަކަށް ފައިސާ ދީފައިވާ ކަމަށް މެންބަރު ޝަމްހީދު ވިދާޅުވި އެވެ. އަދި މިއީ ސީދާ ގާނޫނު އަސާސީއާ ހިލާފުކަމެއްކަން މެންބަރު ޝަމްހީދު ވަނީ ފާހަގަކުރައްވާފަ އެވެ.











