ރައީސް މުއިއްޒު ވެރިކަމުގައި ހުންނަވާނަމަ ދަރަނި 90 ބިލިއަނަށް އެރުން އެކަށީގެންވޭ: ކުރީގެ ރައީސް ޔާމީން
މި ސަރުކާރުން ކުރާ ބޭކާރު ހޭދަތަކުގެ ސަބަބުން ކުރިއަށް އޮތް ދެ އަހަރުގެ ތެރޭގައި ރާއްޖޭގެ ދަރަނި 90 ބިލިއަނަށް އެރުމަކީ އެކަށީގެންވާ ކަމެއް ކަމަށް ކުރީގެ ރައީސް ޔާމީން ވިދާޅުވެއްޖެ. މި ސަރުކާރުން އާރުލާ މަސައްކަތެއް ނުކޮށް ދަރަނި އިތުރުކުރަމުންދާކަން ފާހަގަކުރައްވައި، އެމަނިކުފާނު ވިދާޅުވީ މިވީ ކުރު މުއްދަތުގެ ތެރޭގައި އެކަނިވެސް 60 ބިލިއަނާ ގާތްކުރާ މިންވަރަށް ދަރަނި އުފައްދާފައިވާ ކަމަށް. މީގެ އިތުރުން، އެމްޑީޕީން ވެސް ވަނީ މި ސަރުކާރުން ދަރަނީގެ ހަގީގަތް އޮޅުވާލައި، ރާއްޖޭގެ މާލީ ހާލަތު ގޯސްކުރަމުންދާ ކަމަށް ބުނެ ފާޑުކިޔާފަ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމް | ރާއްޖެ އެމްވީ
ރައީސް ޑރ. މުހައްމަދު މުއިއްޒުގެ ސަރުކާރު ނިމެން އަދި ބާކީ ދެ އަހަރު އެބައޮތް ކަމަށާ މި ދެ އަހަރުގެ ތެރޭގައި އެމަނިކުފާނު ވެރިކަމުގައި ހުންނަވައިފި ނަމަ، ރާއްޖޭގެ ދަރަނި 90 ބިލިއަނަށް އެރުމަކީ އެކަށީގެންވާ ކަމެއް ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
ޕީޕަލްސް ނޭޝަނަލް ފްރަންޓް (ޕީއެންއެފް) އިން އާދިއްތަ ދުވަހުގެ ރޭ ބޭއްވި ޖަލްސާގައި ވާހަކަދައްކަވަމުން ރައީސް ޔާމީން ވިދާޅުވީ މި ސަރުކާރުން ދަނީ ގިނަ ހޭދަތަކެއް ކުރަމުން ކަމަށެވެ. ނަމަވެސް ރަނގަޅު ނަތީޖާއެއް ނުވަތަ ރައްޔިތުންނަށް ފައިދާ ވާ އެއްވެސް މަސައްކަތެއް ނުކުރާ ކަމަށް އެމަނިކުފާނު ވިދާޅުވި އެވެ.
ރައީސް ޔާމީން ވިދާޅުވީ ގައުމުގެ ކަންކަން މިހެން ދާނަމަ ރާއްޖޭގެ މާލީ ހާލަތަށް ބަލާއިރު ރައީސް މުއިއްޒުގެ މި ސަރުކާރުގެ ބާކީ އޮތް ދެ އަހަރު ދުވަހުގެ ތެރޭގައި ރާއްޖޭގެ ދަރަނި 80 ނުވަތަ 90 ބިލިއަނަށް އެރުމަކީ އެކަށީގެންވާ ކަމެއް ކަމަށެވެ.
އަދި ކުރިއަށް އެބައޮތް ދެ އަހަރު. [ރައީސް މުއިއްޒު ވެރިކަމުގައި] ހުންނަވައިފި ނަމަ މި އަދަދު ހަމަ އެކަށީގެންވޭ 80 ނޫނީ 90 ހާސް މިލިއަނަށް ވެގެންދިއުން. މި ސަރުކާރުން ކުރާކަމަކީ ހޭދަ. އެކި ނަންނަމުގައި ހޭދަކުރަނީ. އޭގެން އޮއްޓަރު ހުރި އާރުލާ އެއްވެސް ނަތީޖާއެއް ލިބޭ މަސައްކަތެއް ނުކުރޭ،ކުރީގެ ރައީސް އަބްދުﷲ ޔާމީން އަބްދުލްގައްޔޫމް
ރައީސް ޔާމީން ވިދާޅުވީ ކުރީ ސަރުކާރުތަކޭ ކިޔައިގެން ރައީސް މުއިއްޒާ މި ސަރުކާރަށް ދަރަނީގެ ވާހަކަ ދެއްކެން ނެތް ކަމަށެވެ. ސަބަބަކީ މި ސަރުކާރަށް މި ވީ ދެ އަހަރާ ބައިގެ ތެރޭގައި އެކަނިވެސް 60 ބިލިއަން ރުފިޔާ އާ ގާތްކުރާ މިންވަރަކަށް ދަރަނި އުފައްދާފައިވާތީ ކަމަށް އެމަނިކުފާނު ވިދާޅުވި އެވެ.
މިދިޔަ އަހަރުގެ ދެވަނަ ކުއާޓަރ ނިމުނުއިރު ދިވެހި ދައުލަތުގެ ޖުމްލަ ދަރަނި 148.9 ބިލިއަން ރުފިޔާއަށް އަރާފައިވާ އިރު ރައީސް މުއިއްޒުގެ ސަރުކާރުގެ ދެ އަހަރުގެ ދަރަނި އެކަނިވެސް 38.1 ބިލިއަން ރުފިޔާއަށް އަރާކަން މިނިސްޓްރީ އޮފް ފިނޭންސްގެ ތަފާސްހިސާބުތަކުން ވަނީ ހާމަ ވެފަ އެވެ.
ދަރަނީގައި ހަގީގަތް އޮޅުވާލުމަށް މިސަރުކާރުން ވަރަށް މަސައްކަތް ކުރާ ކަމަށާއި، ނަމަވެސް އެންމެ ބާރު ހަލުވި ދުވެލީގައި ދަރަނި ކުރިއަރުވަނީ މި ސަރުކާރުން ކަމަށް އިދިކޮޅު އެމްޑީޕީ އިން ވެސް ދަނީ ތަކުރާރު ކޮށް ބުނަމުންނެވެ. މިކަމުގެ ތަފްސީލް ހިއްސާކޮށް ރައްޔިތުންގެ މަޖިލީހުގެ ހުޅުމާލޭ ދެކުނު ދާއިރާގެ މެންބަރު ޑރ. އަހްމަދު ޝަމްހީދު ވިދާޅުވީ އެމްޑީޕީގެ ސަރުކާރު ނިމުނުއިރު، ދައުލަތުގެ ދަރަނި ހުރީ 122 ބިލިއަން ރުފިޔާގައި ކަމަށާއި، ނަމަވެސް މިހާރު އެ ދަރަނީ 160 ބިލިއަން ރުފިޔާ އަށް އަރާފައިވާ ކަމަށެވެ.
