ގެފުޅު ވަށައިގެން ތަވާފްކުރާ ސަރަހައްދުގައި ސުންނަތް ނަމާދު ކުރުން މަނާކޮށްފި

އަލް މަސްޖިދުލް ޙަރާމްގައި ގެފުޅު ވަށައިގެން ތަވާފް ކުރަން އޮންނަ ސަރަހައްދުގައި ސުންނަތް ނަމާދުކުރުން ސައުދީ އަރަބިއްޔާގެ ސަރުކާރުން މަނާކޮށްފިއެވެ.

ސައުދީ ގެޒެޓް ނޫހުގައި ބުނެފައި ވަނީ ކައުބާގެ ވަށައިގެންވާ ތަވާފުކުރާ ސަރައްދުގައި ފަރުޟު ނަމާދުތައް ފިޔަވައި އެހެން ނަމާދުތައް ކުރުން މަނާ ކޮށްފައިވާ ކަމަށެވެ.

ތަވާފްކުރާ ސަރަހައްދުގައި ސުންނަތް ނަމާދުކުރުން، ސައުދީ ސަރުކާރުން މަނާކޮށްފައި ވަނީ ވަގުތީ ގޮތުންނެވެ. މިގޮތަށް މިކަންކުރުމަށް އަންގަވާފައިވަނީ މައްކާގެ އަމީރު ޕްރިންސް ޚާލިދު އަލް ފައިސަލްއެވެ.

ސައުދީ ގެޒެޓުން ބުނާގޮތުގައި ރޯދަމަސް ނިމެންދެން ގެފުޅު ވަށައިގެން ތަވާފްކުރާ ސަރަހައްދުގައި ސުންނަތް ނަމާދު ކުރުން މަނާ ކުރުމަށް ހަރަމްފުޅު ބަހަލަހައްޓާ މީހުންނަށް މައްކާގެ އަމީރުވަނީ އަންގަވާފައެވެ.

ތަވާފްކުރާ ސަރަހައްދުގައި ސުންނަތް ނަމާދު ކުރުމުގެ އިތުރުން މި ފަހަރުގެ ރޯދަމަހު އެ ހިސާބުގައި ރޯދަ ވީއްލުން ވެސް ވަނީ މަނާ ކޮށްފައެވެ.

ސައުދީ ސަރުކާރުން މިގޮތަށް ނިންމާފައި ވަނީ ރޯދަމަހު އުމުރާގެ އަޅުކަމަށް ގިނަ ބަޔަކު އެއްވާތީއެވެ. އެގޮތުން އުމްރާއަށްދާ މީހުންނަށް ފަސޭހައިން ތަވާފު ކުރެވޭނެ ގޮތް ހެދުމަކީ އެ ނިންމުމުގެ އެއް ބޭނުމެވެ.

ސައުދީ ސަރުކާރުން މި ގޮތަށް ނިންމާފައި ވަނީ ސުންނަތް ނަމާދުކުރަން ތިބޭ މީހުންގެ ސަބަބުން ތަވާފް ކުރުމަށް ކުރުމަށް އުނދަގޫވާ ކަމަށް ބުނެ ޝަކުވާތައް ލިބެމުންދާތީއެވެ.