ބްރެޒިލްގައި އުފައްދާ އެއްގަމު މަސްް އެތެރެކުރުން ހޮންގކޮންގ އިންވެސް ހުއްޓާލައިފި

ބްރެޒިލުން ރައްކާތެރި ނޫން އެއްގަމު މަހުގެ ބާވަތްތައް ވިއްކަމުންދާތާ އަހަރުތަކެއް ވެއްޖެކަމަށް ތުހުމަތު ކުރެވުމާއެކު އެގައުމުގައި އުފައްދާ އެއްގަމު މަހުގެ ބާވަތްތައް އެންމެ ގިނައިން އެތެރެކުރާ ދެ ގައުމު ކަމަށްވާ ޗައިނާ އާއި ހޮންގކޮންއިން ބްރެޒިލްެގައި އުފައްދާ އެއްގަމު މަހުގެ ބާވަތްތައް އެތެރެކުރުން ހުއްޓާލައިފިއެވެ.

ޔޫރަޕިއަން ޔޫނިއަންއިންވެސް ވަނީ މި މައްސަލައިގައި ތުހުމަތު ކުރެވިފައިވާ ކުންފުނިތަކުން އެއްގަމު މަސް ގަތުން ހުއްޓާާލާނެ ކަމަށް ބުނެފައެވެ.

މި މައްސަލަ ފެންމަތިވީ ބްރެޒިލްގެ ފެޑެރަލް ފުލުހުން ހުކުރު ދުވަހު ހިންގި ބޮޑު އޮޕަރޭޝަނަކަށްފަހުއެވެ.

ބްރެޒިލްގެ ފުލުހުންނަށް ވަނީ އެގައުމުގައި އެއްގަމު މަސް ބަންދުކުރާ ކާރުޚާނާތަކުން ކުނިވެފައިވާ މަހާއި ފެންވަރު ދަށް މަސް ވިއްކަމުންދާތާ އަހަރުތަކެއް ވެފައިވާކަމުގެ ހެކި ފެނިފައެވެ.

ހޮންކޮންގގެ ސެންޓަރ ފޯ ފުޑް ސޭފްޓީއިން ބުނީ ގަނޑުކޮށްފައި ހުންނަ އެއްގަމު މަހާއި އަދި ފިނިކޮށްފައި ހުންނަ އެއްގަމު މަހުގެ ބާވަތްތަކުގެ އިތުރުން އެ ގައުމުގައި މުޑުވަށްކޮށްފައި ހުންނަ ދޫނި ސޫފާސުފީގެ އުފެއްދުންތައް އެތެެރެ ނުކުރުމަށް ނިންމީ އެ ތަކެއްޗާމެދު ސުވާލު އުފެދިފައިވާތީކަމުގައެވެ. ބްރެޒިލްއަކީ ދުނިޔޭގައި ރެޑް މީޓް އަދި ދޫނި ސޫފާސޫފީގެ މަސް އެންމެ ގިނައިން އެކްސްޕޯޓް ކުރާ ގައުމެވެ.

ބްރެޒިލްގެ އެއްގަމު މަސް އުފައްދުމުގެ ސިނާއަތަކީ އެގައުމުގެ އިގްތިސާދުގައޮ މުހިއްމު ދައުރެއް އަދާކުރާ ސިނާއަތެކެވެ.

ބްރެޒިލްގެ ރައީސް މިޝޭލް ޓީމާ ވަނީ ހަފްތާ ބަންދުގައި ކުއްލި ބައްދަލުވުމެއް ބާއްވަވާފައެވެ. އެގައުމުގައި ތިއްބަވާ ޑިޕްލޮމޭޓުންނަށް ދައުވަތު ދެއްވައި އެ ގައުމުމުގައި އުފައްދާ އެއްގަމު މަހާމެދު އިތުބާރު ދެއްވުމަށް މަސައްކަތް ކުރައްވާފައެވެ.

ޗައިނާ، އީޔޫގެ ގައުމުތައް، ދެކުނުކޮރެއާ، ހޮންގކޮންގ އަދި ޗިލީއިން ވަނީ ބްރެޒިލްގައި އުފައްދާ އެއްގަމު މަހުގެ ބާވަތްތައް އެތެރެ ނުކުރަން ނިންމާފައިވާކަން އިއުލާނުކޮށްފައެވެ.

އެ ހުރިހާ ފަރާތްތައް އެއްކޮށް ލުމުން އެއީ 2016 ވަނަ އަހަރު ބްރެޒިލްއިން އެކްސްޕޯޓް ކުރި އެއްގަމުމަހުގެ ތިންބައިކުޅަ އެއްބައިހާ މިންވަރު އެތެރެ ކުރި ފަރާތްތައްކަމަށް އޯ ގްލޯބޯ ނޫހުން ރިޕޯޓް ކުރެއެވެ.