މިސައިލް ހަމަލާތަކަކާއެކު ރިޔާޟް ގުޑުވާލައިފި، ސައުދީ އިއްތިހާދުން ޞަންޢާއަށް ރައްދު ހަމަލާތަކެއް
10 ނޮވެމްބަރު 2026 | އަންގާރަ 09:12ޔަމަނުގެ ހޫޘީން ސަޢުދީގެ ރިޔާޟަށާއި ހަކަތައިގެ ވަސީލަތްތަކަށް އަމާޒުކޮށް ދިން މިސައިލް ހަމަލާތަކާ ގުޅިގެން، ސަޢުދީ އިއްތިހާދުން ޞަންޢާގައި ހުންނަ ހޫޘީންގެ މަރުކަޒުތަކަށް ވަރުގަދަ ވައިގެ ހަމަލާތަކެއް ދީފި. މި ކުރިމަތިލުންތަކުގައި ސަޢުދީގެ ތެޔޮ ހޮޅިލައިނަކަށާއި އަރަމްކޯގެ އިމާރާތަކަށް ގެއްލުންތަކެއް ލިބިފައިވާއިރު، މިއީ ދެ ފަރާތުގެ މެދުގައި ހިނގަމުންދާ ހަނގުރާމަ އިތުރަށް ވަރުގަދަވަމުންދާކަމުގެ ނިޝާނެއް
ސަޢުދީ ޢަރަބިއްޔާގެ ވެރިރަށް ރިޔާޟުގެ އިމާރާތްތަކާއި މަގުތައް ފެންނަ އޭރިއަލް ފޮޓޯއެއް | އޭޕީ
ސަޢުދީ ޢަރަބިއްޔާގެ ވެރިރަށް ރިޔާޟަށާއި އެ ޤައުމުގެ ދެކުނުގެ ސަރަހައްދަށް އަމާޒުކޮށް ފޮނުވާލި ތިން މިސައިލެއް ވައިގެ ދިފާޢީ ނިޒާމުން ދިފާޢުކޮށް ވައްޓާލާފައިވާ ކަމަށް، ޔަމަނުގެ ހޫޘީންނާ ދެކޮޅަށް ހަނގުރާމަކުރާ ސައުދީ އިސްވެ އޮންނަ އަސްކަރީ އިއްތިހާދުން ބުނެފި އެވެ.
އަންގާރަ ދުވަހު ދިން މި ހަމަލާތަކުގެ ޒިންމާ އުފުލަންޖެހޭނީ އީރާނުގެ މަދަދު ލިބޭ ކަމަށް ތުހުމަތު ކުރެވޭ ހޫޘީ ޖަމާޢަތުން ކަމަށް، އިއްތިހާދުގެ ތަރުޖަމާނު މޭޖަރ ޖެނެރަލް ތުރްކީ އަލް-މާލިކީ ވިދާޅުވި އެވެ. ރިޔާޟުގެ ވައިގެ ސަރަހައްދުން ބެލިސްޓިކް މިސައިލަކާއި ކްރޫޒް މިސައިލެއް ގޮއްވާލައި ހަލާކުކޮށްލާފައިވާ ކަމަށާއި، ދެވަނަ ބެލިސްޓިކް މިސައިލް ވައްޓާލީ ޤައުމުގެ ދެކުނު ސަރަހައްދުން ކަމަށް އޭނާ ވިދާޅުވި އެވެ.
މި ހަމަލާތަކާއެކު ރިޔާޟުގެ އެކި ހިސާބުތަކަށް ބާރުގަދަ ގޮވުންތަކެއްގެ އަޑު އިވިފައިވާ ކަމަށް އެ ރަށުގެ ރައްޔިތުންނާ ހަވާލާދީ މީޑިއާ ރިޕޯޓުތައް ބުނެ އެވެ. އަދި، ވައިގެ މަގުން ކުރިމަތިވި ނުރައްކަލަކާ ގުޅިގެން ރައްކާތެރިކަމުގެ ފިޔަވަޅު އަޅައި ހިޔާވަހިކަން ހޯދުމަށް އަންގައި އެ ރަށުގެ ރައްޔިތުންގެ ފޯނުތަކަށް މެސެޖު މެދުވެރިކޮށް އިންޒާރު ފޮނުވާފައިވެ އެވެ. ނަމަވެސް، އެ ނުރައްކާ މިހާރު ފާއިތުވެފައިވާ ކަމަށް ސަޢުދީ ޢަރަބިއްޔާގެ ސިވިލް ޑިފެންސް އިދާރާއިން ފަހުން ވަނީ ކަށަވަރުކޮށްދީފަ އެވެ. މި ހަމަލާތަކާ ގުޅޭގޮތުން ހޫޘީން ވަކި އެއްޗެއް ބުނެފައެއް ނުވެ އެވެ.
ޞަންޢާއަށް ދިން ވައިގެ ހަމަލާތައް
މި ހަމަލާތަކާ ގުޅިގެން، ހޫޘީންގެ ކޮންޓުރޯލު އޮންނަ ޔަމަނުގެ ވެރިރަށް ޞަންޢާއަށް ސަޢުދީ އިއްތިހާދުން ވަރުގަދަ ވައިގެ ހަމަލާތަކެއް ދީފައިވާ ކަމަށް ޚަބަރުތައް ބުނެ އެވެ.
މި ހަމަލާތައް އަމާޒުކޮށްފައި ވަނީ ވެރިރަށުގެ އުތުރުގައިވާ ޖަދަރު އަވަށުގެ އަލް-މުފަޒިރު ގޭސް ފެސިލިޓީއަށާއި، ދެކުނު ޞަންޢާގައި ހުންނަ ދައުލަތުގެ ތެޔޮ ކުންފުނީގެ އިމާރާތަކަށް ކަމަށް ރިޕޯޓުތައް ބުނެ އެވެ. މިއާއެކު އަލް-މުފަޒިރު ސްޓޭޝަނުގެ ގޭސް ޓްރެއިލަރުތަކުގައި ރޯވި އަލިފާން ނިއްވުމުގެ މަސައްކަތް ސިވިލް ޑިފެންސް ޓީމުތަކުން ކުރަމުންދާ ކަމަށް އެ ސަރަހައްދުން ލިބުނު މަޢުލޫމާތުގައި ބުނެ އެވެ. ނަމަވެސް، މި ހަމަލާތައް ދިންކަން އަސްކަރީ އިއްތިހާދުން ކަށަވަރުކޮށްދީފައެއް ނުވެ އެވެ.
މި ކުރިމަތިލުންތަކަކީ ރިޔާޟުން ތާއީދުކުރާ ޔަމަނުގެ ޤާނޫނީ ސަރުކާރާއި ހޫޘީންނާ ދެމެދު ހިނގަމުންދާ ހަނގުރާމަ ވަރުގަދަވަމުންދާ ދަނޑިވަޅެއްގައި ހިނގި އެންމެ ފަހުގެ ހަމަލާ ބަދަލުކުރުންތަކެވެ. ބީވެފައިވާ ސަރަހައްދުތައް އަނބުރާ ހޯދުމަށް ޔަމަނުގެ ސަރުކާރުން ހިންގާ އަސްކަރީ ހަރަކާތްތަކަށް ސަޢުދީ އިސްވެ އޮންނަ އިއްތިހާދުން ވައިގެ މަގުން މަދަދު ފޯރުކޮށްދެމުންދާއިރު، ހޫޘީން ދަނީ ޑްރޯނާއި މިސައިލް ބޭނުންކޮށްގެން ސަޢުދީގެ ތެޔޮ ސާފުކުރާ ކާރުޚާނާތަކާއި ތެޔޮ ރައްކާކުރާ މަރުކަޒުތައް ހިމެނޭހެން ހަކަތައިގެ މުހިންމު ވަސީލަތްތަކަށް ތަކުރާރުކޮށް ހަމަލާ ދެމުންނެވެ.
ހަކަތައިގެ ވަސީލަތްތަކަށް އަމާޒުކުރާ ނުރައްކާ
މި ގޮތުން ހޯމަ ދުވަހު ސަޢުދީ ޢަރަބިއްޔާގެ މަދީނާ ސަރަހައްދުގައި އޮންނަ އީސްޓް-ވެސްޓް ތެޔޮ ހޮޅިލައިނަށް ވެސް އަނެއްކާ ހަމަލާތައް އަމާޒުކުރި އެވެ. އެ ހަމަލާގެ ސަބަބުން ކުޑަ އަލިފާނުގެ ހާދިސާއެއް ހިނގި ނަމަވެސް، އަލިފާންގަނޑު ވަގުތުން ނިއްވާލެވުނު ކަމަށާއި "ހޮޅިލައިނުގެ އޮޕަރޭޝަންތަކަށް އެއްވެސް ބުރުލެއް އަރާފައިނުވާ" ކަމަށް ސަޢުދީގެ ހަކަތައާ ބެހޭ ވުޒާރާގެ އޮފިޝަލަކު ވިދާޅުވި އެވެ. މި ހާދިސާގައި އެއްވެސް މީހަކު މަރުވެ ނުވަތަ ޒަޚަމުވެފައި ނުވާ ކަމަށް ރަސްމީ އިދާރާތަކުން ބުނެ އެވެ.
އީރާނާ ދެކޮޅަށް އެމެރިކާއާއި އިސްރާއީލުން ކުރަމުންދާ ޣައިރުޤާނޫނީ ހަނގުރާމައާ ގުޅިގެން، ހުރްމުޒް ކަނޑުއޮޅީގައި ތެހެރާނުން އަޅާފައިވާ ހުރަސްތަކުގެ ސަބަބުން، މިއީ ސަޢުދީގެ ތެޔޮ ބޭރުކުރުމަށް އޮތް ނުހަނު މުހިންމު މަގެކެވެ. އީރާނާ ދެކޮޅު ހަނގުރާމައިގެ ސަބަބުން ދުނިޔޭގެ ހަކަތައިގެ ކާރިސާއެއް އުފެދެމުންދާއިރު، މި ތެޔޮ ހޮޅިއަށް އެކި ފަހަރު މަތިން ވަނީ ހަމަލާތައް އަމާޒުވެފަ އެވެ.
ހަމަމިއާއެކު، އާދީއްތަ ދުވަހު ރިޔާޟުގެ ވިޔަފާރި މަރުކަޒީ ސަރަހައްދަށް ހަމަލާދިން ކަމަށް ހޫޘީން ވަނީ ދަޢުވާކޮށްފަ އެވެ. އެ ހަމަލާ ނާކާމިޔާބުކޮށްލުމުގެ ތެރޭގައި ވެއްޓުނު ބައިތަކަކުން ސަޢުދީ އަރަމްކޯ ތެޔޮ ކުންފުނީގެ ޓަވަރަށް ގެއްލުންތަކެއް ލިބިފައިވާ ކަމަށް ސަޢުދީގެ އޮފިޝަލުން ވިދާޅުވި އެވެ. އަދި، ރިޔާޟް ސަރަހައްދުގެ ޑެޕިއުޓީ ގަވަރުނަރާއި އެހެނިހެން އިސްވެރިން އެ އިމާރާތް ބައްލަވާލައްވަން ވަޑައިގެންނެވި މަންޒަރު ދައްކުވައިދޭ ފޮޓޯތަކުން، އިމާރާތުގެ ބައެއް ފަންގިފިލާތަކަށް ގެއްލުން ލިބިފައިވާ މަންޒަރު ފެންނަ ކަމަށް ކަމާބެހޭ ފަރާތްތަކުން ހާމަކުރި މަޢުލޫމާތުން އެނގެ އެވެ.
މަސްދަރު: އަލް ޖަޒީރާ
