ބީއެމްއެލްއިން ރަޝިޔާ ފަތުރުވެރިންގެ ފައިސާ ބަލައި ނުގަންނަ މައްސަލައެއް ފެންމަތިވެއްޖެ

ރާއްޖޭގެ އެންމެ ބޮޑު ބޭންކު ކަމަށްވާ ބޭންކް އޮފް މޯލްޑިވްސް (ބީއެމްއެލް) އިން ރަޝިޔާގެ ފަތުރުވެރިންގެ ހޮޓެލް ބުކިންތަކާ ގުޅުންހުރި ފައިސާ އަނބުރާ ފޮނުވާލަން ފަށާފައިވާ ކަމަށާއި، މީގެ ސަބަބުން ރާއްޖޭގެ ފަތުރުވެރިކަމުގެ އެންމެ ބޮޑު އެއް މާކެޓަށް ދަތިތަކެއް ކުރިމަތިވަމުންދާ ކަމަށް ރަޝިޔާގެ މީޑިއާ އައުޓްލެޓެއް ކަމަށްވާ އާރްބީސީން ނޮވެމްބަރު މަހުގެ 9 ވަނަ ދުވަހު ރިޕޯޓްކޮށްފި އެވެ. މިކަން ހާމަކޮށްފައިވަނީ ރަޝިއަން ޔޫނިއަން އޮފް ޓްރެވަލް އިންޑަސްޓްރީންނެވެ.

ޓުއާ އޮޕަރޭޓަރުންނަށް މި މައްސަލަ އެންމެ ފުރަތަމަ ދިމާވާން ފެށީ  އޮކްޓޫބަރު މަހުގެ 18 ވަނަ ދުވަހު އެވެ. އެ ދުވަހުން ފެށިގެން ހޮޓެލް ރިޒަވޭޝަންތަކަށް ފޮނުވާ ފައިސާ ބޭންކުން އަންނަނީ އަނބުރާ ފޮނުވާލަމުންނެވެ.

އެ ސިނާއަތުގެ ޖަމިއްޔާއިން ބުނި ގޮތުގައި، ރަޝިޔާގެ ކުންފުނިތަކުގެ ބަދަލުގައި ބޭރުގެ އެހެން ގައުމުތަކުގެ ގާނޫނީ ފަރާތްތަކުން ފޮނުވާ ފައިސާ ވެސް ބައެއް ހާލަތްތަކުގައި ބޭންކުން ވަނީ ބަލައިނުގަނެ އަނބުރާ ފޮނުވާލާފަ އެވެ.

އެ ޔޫނިއަނުން ބުނާ ގޮތުގައި، ބޭންކް އޮފް މޯލްޑިވްސްއިން އަމަލުކުރަމުންދާ ގޮތަށް ބަލާއިރު، ފައިސާ ފޮނުވަނީ ކޮން ފަރާތަކުން ކަމަށް ބެލުމެއް ނެތި، ރަޝިޔާގެ ފަތުރުވެރިން ތިބުމަށް ބޭނުންކުރާ އެކަމަޑޭޝަންތަކަށް ފޮނުވާ ކޮންމެ ފައިސާއަކީ ވެސް ރަޝިޔާއާ ގުޅުންހުރި މުއާމަލާތެއްގެ ގޮތުގައި އެ ބޭންކުން ދަނީ ބަލަމުންނެވެ.

މި މައްސަލައާ ގުޅިގެން އެ ޖަމިއްޔާއިން ވަނީ ރަޝިޔާގެ މިނިސްޓްރީ އޮފް އިކޮނޮމިކް ޑިވެލޮޕްމަންޓާއި ރާއްޖޭގައި ހުންނަ ރަޝިޔާގެ އެމްބަސީގައި އެހީތެރިކަމަށް އެދިފަ އެވެ. އެގޮތުން ރާއްޖޭގެ ކަމާބެހޭ ފަރާތްތަކާ މަޝްވަރާކޮށް، ފަތުރުވެރިކަމުގެ ފައިސާގެ މުއާމަލާތްތައް އެއްވެސް މެދުކެނޑުމެއް ނެތި ކުރިއަށް ގެންދެވޭނެ ހައްލެއް ހޯދުމަށް އެ ފަރާތުން ވަނީ އެދިފަ އެވެ.

ފައިސާ ބަލައިނުގަނެ އަނބުރާ ފޮނުވާލުމުގެ ސަބަބުން ޓުއާ އޮޕަރޭޓަރުންނަށް އިތުރު ހަރަދުތަކެއް ކުރަން ޖެހިފައިވާއިރު، މީގެ ސަބަބުން ފަތުރުވެރިން ހޮޓާތަކުގައި ތިބުމަށް ވެސް ދަތިތަކެއް ކުރިމަތިވެދާނެ ކަމަށް ބެލެވޭ ކަމަށް ބޭރުގެ ބައެއް މީޑިއާތަކުން ވަނީ ރިޕޯޓުކޮށްފަ އެވެ.

އާޓް-ޓުއާގެ ސީއީއޯ ޑިމިޓްރީ އަރުޓިއުނޯވް ވިދާޅުވި ގޮތުގައި، ފައިސާ ނުލިބޭ ހޮޓާތަކުން ފަތުރުވެރިން އަތުން ސީދާ ފައިސާ ދެއްކުމަށް އެދިދާނެ އެވެ. އަދި އެގޮތަށް ފައިސާ ނުދައްކައިފިނަމަ ހޮޓަލަށް ޗެކް-އިން ނުވެވުމުގެ ބިރު ވެސް އެބައޮތެވެ.

ބޭންކް އޮފް މޯލްޑިވްސްއިން ވަނީ ރަޝިޔާއާ ގުޅުންހުރި ފައިސާގެ މުއާމަލާތްތައް އެ ބޭންކުން ކުރިއަށް ނުގެންދާކަން ކަށަވަރުކޮށްދީފައި ކަމަށް ރަޝިޔާގެ މީޑިއާ ރިޕޯޓުތަކުގައިވެ އެވެ.

"ބޭންކުގެ މިހާރުގެ ސިޔާސަތުގެ ދަށުން، ފައިސާ ފޮނުވުމުގައި ހުރަސްތަކެއް ހުރި ގައުމުތަކުގެ ލިސްޓުގައި ރަޝިޔާ ހިމެނޭ،" ބޭންކުގެ ޕްރެސް ސާވިސްއިން އާރްބީސީއަށް މައުލޫމާތު ދީފައިވެ އެވެ.

ރަޝިޔާގެ ފަތުރުވެރިންގެ މެދުގައި ރާއްޖެއަކީ އަދިވެސް ދުރު ރާސްތާގެ މަންޒިލްތަކުގެ ތެރެއިން އެންމެ މަގުބޫލު އެއް ގައުމެވެ.

ރާއްޖޭގެ ޓޫރިޒަމް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން ވިދާޅުވި ގޮތުގައި، މިއަހަރުގެ ޖެނުއަރީ މަހުން ފެށިގެން އޮގަސްޓް މަހުގެ ނިޔަލަށް 198,000 އަށްވުރެ ގިނަ ރަޝިޔާ ފަތުރުވެރިން ރާއްޖެއަށް ޒިޔާރަތްކޮށްފައިވެ އެވެ. މިއީ ރާއްޖެއަށް އައި ޖުމްލަ ފަތުރުވެރިންގެ ގާތްގަނޑަކަށް 15 އިންސައްތަ އެވެ.

މިނިސްޓަރު އަމީން މީގެ ކުރިން ލަފާކުރައްވާފައިވާ ގޮތުގައި، މިއަހަރުގެ ނިޔަލަށް ގާތްގަނޑަކަށް 300,000 ރަޝިޔާ ފަތުރުވެރިން ރާއްޖެއަށް ޒިޔާރަތްކުރާނެ އެވެ.

މީގެ އިތުރުން، ރަޝިޔާގެ ލެބޯޓްރީ މަސައްކަތްތެރިއަކު "ޕްލޭގް" ބައްޔާ ގުޅުންހުރި ކަމަށް ބެލެވޭ ނިއުމޯނިއާ ބަލީގައި މަރުވި ކަމުގެ ރިޕޯޓްތަކާ ގުޅިގެން، އިންޑޮނޭޝިއާއިން ވަނީ އެ ގައުމުގެ ބައިނަލްއަގުވާމީ އެއާޕޯޓްތަކާއި ބަނދަރުތަކުގެ ސިއްހީ ރައްކާތެރިކަން ވަރުގަދަކޮށްފަ އެވެ.