ބަންދުވެފައިވާ އޮލެޝްކީއަށް އެހީ ފޯރުކޮށްދިނުމަށް ޚަރްސަންގެ ހަމަލާތައް ރަޝިޔާއިން މެދުކަނޑާލައިފި
27 އޮކްޓޯބަރު 2026 | އަންގާރަ 09:25ޔޫކްރެއިންގެ އޮލެޝްކީ އަވަށަށް އިންސާނީ އެހީ ފޯރުކޮށްދިނުމަށް ޓަކައި ރަޝިޔާއިން އެ ސަރަހައްދަށް ދެމުންދިޔަ ހަމަލާތައް ވަގުތީގޮތުން މެދުކަނޑާލައިފި. އެމެރިކާ މެދުވެރިވެގެން އެކުލަވާލި މި އެއްބަސްވުމުގެ ދަށުން، ހަނގުރާމައިގެ ސަބަބުން ހާލުގައި ޖެހިފައިވާ މީހުންނަށް ބޭހާއި ކާބޯތަކެތި ފޯރުކޮށްދީ، ރައްކާތެރި ސަރަހައްދުތަކަށް މީހުން ބަދަލުކުރުމުގެ މަގު ފަހިވެގެންދާނެ
ރަޝިޔާއިން އަތްގަދަ ކޮށްފައިވާ ޔޫކްރެއިންގެ ޚަރްސަންގެ އޮލެޝްކީ އަވަށުގައި ހަނގުރާމައިގެ ސަބަބުން ގެއްލުންވެފައިވާ އިމާރާތްތައް ފެންނަ ޑްރޯން ފޮޓޯއެއް. | ޑީޑަބްލިޔު.ކޮމް
އެމެރިކާގެ ރައީސްގެ އަނބިކަނބަލުން މެލާނިޔާ ޓްރަމްޕް އިސްވެ ކުރިއަށް ގެންދަވާ އިންސާނީ އެހީގެ މިޝަނެއް ފެށުމުގެ ގޮތުން، ވަކި ސަރަހައްދަކަށް ޚާއްސަކޮށް ހަމަލާ ބަދަލުކުރުން މެދުކަނޑައިލުމުގެ އެއްބަސްވުމަކަށް އަމަލުކުރަން ފެށުމާއެކު، ޔޫކްރެއިންގެ ޚަރްސަން ޕްރޮވިންސަށް ދެމުންދިޔަ ހަމަލާތައް ވެސް ރަޝިޔާއިން ވަގުތީ ގޮތުން މެދުކަނޑާލައިފި އެވެ.
ހަނގުރާމަ މެދުކަނޑާލަން ފެށީ އަންގާރަ ދުވަހުގެ ޖީއެމްޓީ ގަޑިން 01:00 ގައި ކަމަށް ރަޝިޔާގެ ދިފާޢީ ވުޒާރާއިން ބުންޏެވެ. މި ފިޔަވަޅުގެ ބޭނުމަކީ، ޚަރްސަންގެ ދެކުނުގައި ރަޝިޔާ ސިފައިން އަތްގަދަ ކޮށްފައިވާ އޮލެޝްކީ އަވަށަށް މި ހަފުތާގެ ފަހުކޮޅު އެހީގެ މިޝަނެއް ވަނުމަށް ފުރުސަތު ދިނުމެވެ. މި މިޝަނުގެ ސަބަބުން، ހަނގުރާމައިގެ ކުރީ ސަފުގައި އޮތް މި އަވަށަށް އެހީގެ ސާމާނު ގެންދިއުމަށާއި، އަވަށުން މީހުން ރައްކާތެރި ހިސާބުތަކަށް ނެރުމުގެ މަގު ފަހިވެގެންދާނެ އެވެ. އޮލެޝްކީއަކީ މިހާރު ވެސް ކާބޯތަކެއްޗާއި، ބޭސްފަރުވާއާއި އެހެނިހެން އަސާސީ ސާމާނަށް ވަރަށް ބޮޑަށް ދަތިވެފައިވާ ތަނެކެވެ.
މި އެއްބަސްވުން އިއުލާނުކުރީ އޮކްޓޫބަރު 23 ގަ އެވެ. ހަތަރު އަހަރާއި ބައިގެ ހަނގުރާމައަށް ފަހު، މޮސްކޯއާއި ކީވްގެ ދެމެދުގައި ސުލްހައިގެ މަޝްވަރާތައް އަލުން ފެށުމަށް ވޮޝިންގޓަނުން ކުރަމުންދާ މަސައްކަތްތަކުގެ ތެރެއިން، މި އެއްބަސްވުން އެކުލަވާލުމުގައި މެދުވެރިއެއްގެ ދައުރު އަދާކުރެއްވީ އެމެރިކާގެ ރައީސްގެ އަނބިކަނބަލުން މެލާނިޔާ އެވެ.
މި ވަގުތު ވެސް 2،000 އާ ހަމައަށް މީހުން އޮލެޝްކީގައި އެބަތިއްބެވެ. އެ ސަރަހައްދުގައި ވަޅުލާފައިވާ މައިންތަކާއި ޑްރޯން ހަމަލާތަކުގެ ސަބަބުން އެ މީހުންނަށް އެ އަވަށް ދޫކޮށް ދެވިފައި ނުވާ ކަމަށް އދ. އިން ބުންޏެވެ. ހަނގުރާމައިގެ ކުރިން 24،000 މީހުންގެ އާބާދީއެއް އޮތް މި އަވަށަކީ، ރަޝިޔާއިން ބައެއް ހިފާފައިވާ ޚަރްސަން ސަރަހައްދުގައި، ދްނިޕްރޯ ކޯރުގެ އިރުމަތީ އައްސޭރީގައި އޮންނަ އަވަށެކެވެ. މިއީ ޔޫކްރެއިން ސިފައިންގެ ބާރުގެ ދަށުގައިވާ ޚަރްސަން ސިޓީގެ އަނެއް ފަޅީގައި އޮންނަ އަވަށެކެވެ. 2022 ފެބުރުވަރީގައި ރަޝިޔާއިން ފެށި ހަނގުރާމައިގެ ފުރަތަމަ ދުވަސްތަކުގައި އެ ޤައުމުގެ ސިފައިން އޮލެޝްކީ ހިފި ގޮތަށް، މިއަދާ ހަމައަށް ވެސް އެ ތަން އޮތީ އެ މީހުންގެ ބާރުގެ ދަށުގަ އެވެ.
ހަނގުރާމައިގެ ސަބަބުން ބޮޑެތި ގެއްލުންތަކެއް ލިބިފައިވާ މި އަވަށަށް، 2023 ވަނަ އަހަރު ކައިރީގައިވާ ކަޚޯވްކާ ޑޭމް ހަލާކުކޮށްލުމާ ގުޅިގެން ކުރިމަތިވި ފެންބޮޑުވުމުގައި ވެސް ބޮޑެތި ގެއްލުންތަކެއް ލިބުނެވެ.
ރަޝިޔާއާއި ޔޫކްރެއިންގެ ދެމެދުގައި އޮތް އިތުބާރު ނެތުމުގެ ސަބަބުން މީގެ ކުރިން ހަނގުރާމަ ހުއްޓާލަން ކުރި މަސައްކަތްތައް ނާކާމިޔާބުވެފައިވީ ނަމަވެސް، މި ފަހަރުގެ ސަރަހައްދީ ހަނގުރާމަ ހުއްޓާލުން ހޮނިހިރު ދުވަހުގެ ނިޔަލަށް، ނުވަތަ އެއަށްވުރެ ދިގު މުއްދަތަކަށް ދެމިގެންދާނެ އެވެ. މީހުން ނެރުމަށް ރައްކާތެރި މަގުތައް ހުޅުވާލުމުގެ ކުރިން، ޑޮކްޓަރުންނާއި، ބޭހާއި، ކާބޯތަކެއްޗާއި ފެން އޮލެޝްކީއަށް ގެންދާނެ ކަމަށް އެހީގެ މިޝަނުގައި ބައިވެރިވާ އޮފިޝަލުން ބުންޏެވެ.
މަސްދަރު: އަލް ޖަޒީރާ
