ސޯޝަލް މީޑިއާގައި ދައުރުވާ އޯޑިއޯތަކާއެކު އާންމުންގެ ނުރުހުން ދެގުނަ އަށް، ސަރުކާރުގެ ޖަވާބެއް ނެތް!

ދިވެހިރާއްޖޭގެ ވެރިކަމުގެ ނިޒާމާއި، ގައުމީ ސިޔާދަތާއި، އަދި އެންމެ މުހިންމު ގޮތެއްގައި ރައްޔިތުންގެ މުސްތަގުބަލާ ގުޅިފައިވާ ރަސްމާލެ މަޝްރޫއާ ގުޅޭ ހަގީގަތްތަކަކީ މި ސަރުކާރުން ރައްޔިތުންގެ ލޯމަތިން ސިއްރުކުރަން ކެނޑިނޭޅި މަސައްކަތްކުރަމުންދާ ބޮޑު ޖަރީމާއެއްކަން ދަނީ ތަކުރާރުކޮށް ފާޅުވަމުންނެވެ. ރަސްމާލެ ފަދަ ބޮޑު ބިމެއް ބޭރުގެ ކުންފުންޏަކަށް، ވަކިން ޚާއްސަކޮށް ޔޫއޭއީގެ އީގަލް ހިލްސް ކުންފުންޏާ ހަވާލުކުރުމުގައި ސަރުކާރުން ގެންގުޅެފައިވާ އޮޅުވާލުންތަކުން ފުރިގެންވާ ސިޔާސަތުތައް މިހާރު މިދަނީ ލީކުވެފައިވާ އޯޑިއޯތަކެއްގެ ސަބަބުން ހާމަވެފަ އެވެ.

މި މަޝްރޫއާ ބެހޭގޮތުން އާންމުވެފައިވާ ޚަބަރުތަކާއި ލީކުވެފައިވާ އޯޑިއޯތަކުން ދައްކައި ދެނީ، ސަރުކާރުން ރައްޔިތުންނަށް އެންމެ ކުދިކުދި ކަންކަމުގައި ވެސް އޮޅުވާލަމުންދާ ކަމެވެ. ރަސްމާލެ މަޝްރޫއާ ގުޅޭގޮތުން ލީކުވި އޯޑިއޯތަކުން ހާމަވެފައިވާގޮތުގައި، މިނިސްޓަރ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓް ޑރ. ޢަބްދުﷲ މުއްޠަލިބު ވަނީ ރަސްމާލެ އިން ދޫކުރާ ބިންތަކާއި މިލްކުވެރިކަން ދޭނީ 99 އަހަރުގެ އައު ކުރެވޭ ލީޒްގެ ދަށުންކަމަށް ވިދާޅުވެފަ އެވެ. މިއީ ރާއްޖޭގެ ގާނޫނުއަސާސީއާއި ގާނޫނުތަކުން ބޭރުން ބޭރުގެ ފަރާތްތަކަށް ރާއްޖޭގެ ބިންތައް ދާއިމީ ސިފައެއްގައި ނުވަތަ ދިގު މުއްދަތަކަށް ދޫކޮށްލުމަށް ސަރުކާރުން ފަހިކޮށްދެމުންދާ ނުރައްކާތެރި މަގުކަން ހާމަވެ އެވެ.

މީގެއިތުރުން، އެޓަރނީ ޖެނެރަލް އަޙްމަދު އުޝާމް ދެއްކެވި ވާހަކަތަށް ކަމަށް ބުނާ ލީކުވެފައިވާ އެހެން އޯޑިއޯއަކުން ވަނީ ރަސްމާލެ ސަރަޙައްދުގައި ހަދާ ހޮޓާތަކުގައި ބަނގުރާ ވިއްކުމުގެ ހުއްދަ ދެވޭނެކަން ހާމަވެފަ އެވެ. މިއީ ރައީސް ޑރ. މުހައްމަދު މުއިއްޒު މިކަމާ ގުޅިގެން ދައްކަވާފައިވާ ވާހަކަތަކާ މުޅިން އިދިކޮޅު ވާހަކަތަކެކެވެ. ރައީސް މުޢިއްޒު ވިދާޅުވެފައިވަނީ ރަސްމާލެ މަޝްރޫއުގެ އެއްވެސް ތަނެއްގައި ބަނގުރަލާއި އޫރުމަސް ވިއްކުމުގެ ހުއްދަ ނުދޭނެ ކަމަށެވެ.

އެގޮތުން މީގެ ކުރިން ރައީސް އޮފީހުން ގެނެސްދިން "ނޭޝަން ޗެޓް" ޕްރޮގްރާމުގައި ވާހަކަފުޅު ދައްކަވަމުން ރައީސް މުއިއްޒު ވަނީ ރަސްމާލޭގައި ރަލުގެ އެއްވެސް މުއާމަލާތެއް ނުހިނގާނެ ކަމަށް ވިދާޅުވެފަ އެވެ. އެމަނިކުފާނު ވިދާޅުވީ ރިސޯޓުތަކުގައި އޮންނަ މިނިވަންކަމަށް ވުރެ ވެސް އެތަނުގެ އުސޫލުތައް ހަރުކަށިވާނެ ކަމަށެވެ. އަދި އެތަނުގައި ރަލެއް ނުވިއްކޭނެ ކަމަށާއި، ރަލެއް ނުބޮވޭނެ ކަމަށް ވެސް ރައީސް ވިދާޅުވި އެވެ. ރަސްމާލޭގައި ރާ ނުބޮވޭނެ ކަން ގާނޫނުގައި ލިޔެގެން ކަށަވަރު ކުރައްވާނެ ކަމަށް ވެސް ރައީސް މުއިއްޒު ކުރިން ވިދާޅުވެފައިވެ އެވެ. އެމަނިކުފާނު ވިދާޅުވީ އެތަނަށް މުޅިންހެން އަންނާނީ މުސްލިމުން ކަމަށާއި، އެ ނޫން ގޮތަކަށް އުޅެން އެތަނަށް ބަޔަކު ނާންނާނެ ކަމަށެވެ. ނަމަވެސް، ސަރުކާރުގެ އެންމެ އިސްވެރިންގެ ދުލުން ސިއްރިޔާތުގައި ދެކެވިފައިވާ މިފަދަ ވާހަކަތަކުން ސަރުކާރުގެ ވާޙަކަތަކަކީ، ޚާއްސަކޮށް، ރައީސް މުއިއްޒު މިކަމުގައި ދައްކަވަމުން ދާ ވާހަކަތަކަކީ އެއްވެސް ވަރަކަށް އިތުބާރު ހުރި ވާޙަކަތަކެއް ނޫންކަން މި ވަނީ ހާމަވެފަ އެވެ. 

މި އެއްބަސްވުމުގެ އަނދިރި ފަރާތްތަކަށް އަލިއޅުވާލަމުން އިގްތިސާދީ އަދި ގާނޫނީ މާހިރުން ފާހަގަ ކުރައްވާފައިވާ ގޮތުގައި، މި ޑީލަކީ ދިވެހިރާއްޖޭގެ ސިޔާދަތާއި މިނިވަންކަމަށް އަގުނުކުރެވޭވަރުގެ ބޮޑު ގެއްލުމެއް ލިބިގެންދާނެ ކަމެކެވެ. 500 ހެކްޓަރަށްވުރެ ބޮޑު ބިމެއް ބޭރުގެ ކުންފުންޏަކަށް އެއްވެސް ބިޑްކުރުމެއް ނެތި ހަވާލުކޮށްފައިވާއިރު، ދިވެހި ދައުލަތަށް މީގެން ލިބޭނެ މާލީ ފައިދާއެއް ވެސް ހަގީގަތުގައި ސަރުކާރުން ހާމައެއް ނުކުރެ އެވެ.

ސަރުކާރަށް ލިބެން އޮތް ކަމަށް ބުނަނީ ވިޔަފާރި އިމާރާތްތަކުން ލިބޭ އާމްދަނީގެ 10 އިންސައްތައާއި އެޕާޓްމަންޓް ވިއްކުމުން ލިބޭ އާމްދަނީގެ 4 އިންސައްތަ އެވެ. މިއީ ގައުމުގެ އެންމެ އަގުބޮޑު އެއް ބިން ބޭރުގެ ބާރުތަކަށް ނުވަތަ ފަރާތްތަކަށް ހިލޭދިނުން ފަދަ ކަމަކަށް ވާއިރު މި އެއްބަސްވުން ހާމަކުރުމަށް ތަކުރާރުކޮށް ރައްޔިތުން ގޮވާލަމުންދިޔަ ނަމަވެސް، ސަރުކާރުން މަސައްކަތްކުރަމުންދަނީ މިކަން އާންމުންނަށް ސިއްރުކޮށްގެން، ވީހާވެސް އަވަހަކަށް ކަންކަން ނިންމާލުމަށެވެ.

އެއްބަސްވުމުގައިވާ އަސްލު ޝަރުތުތަކާއި، ބޭރުގެ މީހުން އާބާދުވުމުން އަންނާނެ ނަތީޖާތަކާއި، ބައިނަލްއަގްވާމީ މުއާހަދާތަކުގެ ދަށުން ރާއްޖެއަށް އަތުވެދާނެ ޖިނާއީ އަދި އިޖްތިމާޢީ މައްސަލަތަކުގެ ބިރުވެރިކަން ސަރުކާރުން މުޅިން ފޮރުވަމުން ސަރުކާރުން ދަނީ އެކަމުގެ އަޑީގައި ސިއްރު ބޮޑު އެޖެންޑާ އެއް އޮތުމުން ކަމަށް ގަބޫލު ކުރުމުގެ ފުރުސަތު މިއަދު އެބަ އޮތެވެ. 99 އަހަރަށް ބިން ދޫކުރުމަކީ ބައިނަލްއަގްވާމީ ގާނޫނުތަކުގެ ދަށުން އެ ސަރަހައްދުގައި ވަކި ދީންތަކަށް އަޅުކަންކުރާ ތަންތަން ހެދުމާއި، ބޭރުގެ މީހުންގެ އަމިއްލަ ގާނޫނީ އޮނިގަނޑުތައް ގާއިމުކުރުމަށް މަގުފަހިވެ، ދިވެހިވަންތަކަމާއި އިސްލާމީ ވަޙްދަތު މުޅިން ނެތިގެންދާނެ ކަމެކެވެ. މި ސަރުކާރުން ރަސްމާލެ މަޝްރޫޢު ސިއްރުކުރުމަށް ކުރަމުންދާ މަސައްކަތްތަކަކީ ދިވެހިރާއްޖޭގެ މިނިވަންކަމާއި އިސްލާމީ ސިޔާދަތު ނުރައްކަލުގެ ތެރެއަށް ވައްޓާލައި، ކޮރަޕްޝަނާއި ނާޖާއިޒު ފައިދާތަކެއް ހޯދުމަށް ހިންގާ ބޮޑު ޖަރީމާއެއްކަން ރައްޔިތުންނަށް ދަނީ ތަކުރާރު ކޮށް ސާބިތުވަމުންނެވެ.