ރަސްމާލެއިން ޕްރޮޕަޓީ ވިއްކަނީ ހުސްނުވާ 99 އަހަރަށް ކަމަށް މިނިސްޓަރު މުއްތަލިބު ވިދާޅުވާ ކަމަށް ބުނާ އޯޑިއޯއެއް ލީކުވެއްޖެ
6 ނޮވެމްބަރު 2026 | ހުކުރު 10:00ރަސްމާލެ މަޝްރޫއުގެ ދަށުން އީގަލް ހިލްސް ކުންފުންޏަށް ދޫކުރާ ބިންތަކުގެ ލީސް މުއްދަތު، ކޮންމެ ފަހަރަކު 99 އަހަރަށް އައުކުރެވޭނެ އިންތިޒާމެއް ހަމަޖައްސަވާނެ ކަމަށް ހައުސިންގ މިނިސްޓަރު ވިދާޅުވެއްޖެ. މިނިސްޓަރު ވިދާޅުވި ގޮތުގައި މި އުސޫލު ކަނޑައެޅީ އިންވެސްޓަރުންގެ އިތުބާރު ހޯދުމަށާއި ތަންތަނުގެ އަގު ހިފެހެއްޓުމަށް. ނަމަވެސް، ރާއްޖޭގެ ބޮޑު ސަރަހައްދެއް ބޭރުގެ ފަރާތްތަކަށް މިގޮތަށް ލިބޭތީ އާންމުންނާއި ސިޔާސީ ފަރާތްތަކުން ދަނީ ކަންބޮޑުވުން ފާޅުކުރަމުން
މިނިސްޓަރު މުއްތަލިބު ރަސްމާލެ ބިން އީގަލް ހިލްސްއާއި ހަވާލުކުރުމަށް ސޮއިކުރެއްވުމަށްފަހު ސަލާމްކުރައްވަނީ | ރާއްޖެ އެމްވީ
ރަސްމާލެއިން ޕްރޮޕަޓީ ވިއްކަނީ ހުސްނުވާ 99 އަހަރަށް ކަމަށް ހައުސިންގ މިނިސްޓަރު ޑރ. އަބްދުﷲ މުއްތަލިބު ވިދާޅުވާ ކަމަށް ބުނާ އޯޑިއޯއެއް ލީކުވެއްޖެ އެވެ.
މިނިސްޓަރު މުއްތަލިބު މިފަދައިން ވިދާޅުވާ އޯޑިއޯތަކެއް ވަނީ ސޯޝަލް މީޑިއާގައި ދައުރުވެފަ އެވެ. އެގޮތުން، މި އޯޑިއާތަކަކީ ސައްހަ އޯޑިއޯތަކެއް ކަމަށް ރާއްޖޭގެ ބައެއް މީޑިއާތަކަށް ވަނީ ކަށަވަރުވެފަ އެވެ.
މިނިސްޓަރު މުއްތަލިބު ވިދާޅުވި ގޮތުގައި، އީގަލް ހިލްސް ކުންފުންޏަށް ރަސްމާލެ ކުއްޔަށް ދޫކޮށްފައިވަނީ 99 އަހަރުގެ މުއްދަތަށެވެ. އަދި އިންވެސްޓަރުން އެ ކުންފުނީގެ އަތުން މި މިލްކިއްޔާތުތައް ގަންނަމުންދާއިރު، އެއް އިންވެސްޓަރަކު އަނެއް އިންވެސްޓަރަކަށް މި މުދާ ވިއްކާލާ ހާލަތްތަކުގައި، ސަރުކާރާއެކު ވެވޭ ހާއްސަ އިންތިޒާމެއްގެ ދަށުން އަލަށް ގަންނަ ފަރާތަށް އަލުން 99 އަހަރުގެ ލީސް މުއްދަތެއް ލިބިގެންދާނެ އެވެ.
މި އުސޫލު މިގޮތަށް ކަނޑައަޅާފައިވަނީ ވަގުތު ފާއިތުވަމުންދާ ވަރަކަށް އެ ތަންތަނުގެ އަގު ދަށްވިޔަނުދީ ހިފެހެއްޓުމަށް ކަމަށާއި، މިފަދަ އިންތިޒާމެއް ނެތް ނަމަ، އިންވެސްޓް ކުރާ ފަރާތްތަކުން އެފަދަ މަޝްރޫއުތަކަށް އިންވެސްޓް ކުރުމަށް ފަސްޖެހޭނެ ކަމަށް ވެސް މިނިސްޓަރު މުއްތަލިބު ވިދާޅުވި އެވެ.
އެހެންވީމަ އެގޮތަށް 99 އަހަރު ގާނޫނު އަސާސީގައި އެ ބުނާ 99 އަހަރުގެ މެކޭނިޒަމް ގެނެވޭނީ ކިހިނެއްތޯ ބަލާނީ. މިހާރު މި އޮންނަ ގޮތަކީ ޓޫރިޒަމްގައި 99 އަހަރު ހަމަ ވީމަ ސަރުކާރަށް އޮންނަނީ ދެ އޮޕްޝަން އެއް އޮޕްޝަންއަކީ ސަރުކާރުން އެތާ ހުރި ހުރިހާ މުދަލަކަށް ބަދަލު ދީފައި ނެގުން. ކިހިނެއްތޯ ހަންޑްރެޑްސް އޮފް މިލިއަންސް އޮފް ޑޮލާރސްގެ ޕްރޮޕަޓީއެއް ސަރުކާރުން ބަދަލު ދީފައި ނަގާނީ. ދެން އޮތީ ބަދަލު ނުދެވޭ ކަމުގައި ވަންޏާ ސަރުކާރުން ބިޑު ކޮށްފައި އެތަން ނަގާ ބަޔަކު އެތަނަށް ބަދަލު ދިނުން އަނެއް ގޮތަކީ މިހާރު އޮންނަ ގޮތަށް އޭނައަށް އިކުއިޒިޝަން ކޯސްޓް ދީފައި ލީސް އައުކޮށްގެން ކުރިއަށް ގެންދިޔުންއަބްދުﷲ މުއްތަލިބު
މީގެ އިތުރުން، ރަސްމާލެއިން ގަނެފައިވާ ޕްރޮޕަޓީއެއްގެ މިލްކުވެރިކަން ބަދަލުކުރާއިރު ސަރުކާރަށް 'ޔެސް އޯ ނޯ' ބުނުމުގެ ބާރު އޮންނާނެ ކަމަށާއި، ސަރުކާރުގެ ހުއްދައެއް ނެތި އެއްވެސް ޓްރާންސްފާއެއް ނުކުރެވޭނެ ކަމަށް ވެސް މިނިސްޓަރު މުއްތަލިބު ވިދާޅުވި އެވެ.
ރަސްމާލޭގައި "މޯލްޑިވްސް ވޯޓަރ ފްރަންޓް އެންޑް މެރީނާ" މަޝްރޫއު ކުރިއަށް ގެންދިއުމަށް ދިވެހި ސަރުކާރާއި ޔޫއޭއީގެ އީގަލް ހިލްސްއާ ދެމެދު ކޮމާޝަލް ޓާމްސް އެއްބަސްވުމެއްގައި ވަނީ ސޮއިކޮށްފަ އެވެ. މިކަމުގެ ސަބަބުން ދިވެހިރާއްޖެއިން ބޮޑު ބައެއް ބޭރުގެ ފަރާތްތަކަށް ލިބޭތީ ދީނީ އިލްމުވެރިންނާއި އާންމު ރައްޔިތުން އަދި ސިޔާސީ ފަރާތްތަކުން ވެސް އަންނަނީ ކަންބޮޑުވުން ފާޅުކުރަމުންނެވެ.
