ތުލުސްދޫ ކައުންސިލް އިދާރާއިން އިތުރު ގަޑީގެ ފައިސާ ދީފައިވަނީ އިތުރު ގަޑީގައި ކޮށްފައިވާ މަސައްކަތް ކަށަވަރުނުކޮށް: އޮޑިޓް ރިޕޯޓް
3 ނޮވެމްބަރު 2026 | އަންގާރަ 13:57ކ. ތުލުސްދޫ ކައުންސިލުން 8.7 ލައްކައަށްވުރެ ގިނަ ރުފިޔާ އިތުރުގަޑީގެ ފައިސާގެ ގޮތުގައި ޚަރަދުކުރިއިރު، އެ މަސައްކަތްތަކުގެ ތަފްސީލު ބަލަހައްޓާފައި ނުވާކަން އޮޑިޓް ރިޕޯޓުން ހާމަވެއްޖެ. އިތުރުގަޑީގައި ކުރި މަސައްކަތް ކަށަވަރުނުކޮށް ފައިސާ ދޫކުރުމަކީ ނަހަމަ ގޮތުގައި ޚަރަދުތައް ހިނގުމަށް އޮތް ފުރުސަތެއް ކަމުން، މަސައްކަތުގެ ރެކޯޑުތައް ފުރިހަމައަށް ބެލެހެއްޓުމަށް އޮޑިޓަރ ޖެނެރަލް ވަނީ އަންގަވާފައި
ރައީސް ޑރ. މުހައްމަދު މުއިއްޒު، މާލެއަތޮޅު ތުލުސްދޫ ކައުންސިލާއި ބައްދަލުކުރެއްވުން | ރައީސް އޮފީސް
ކ. ތުލުސްދޫ ކައުންސިލްގެ އިދާރާ އިން އިތުރު ގަޑީގައި ކޮށްފައިވާ މަސައްކަތް ކަށަވަރުނުކޮށް އިތުރު ގަޑީގެ ފައިސާ ދީފައިވާ ކަމަށް އޮޑިޓަރ ޖެނެރަލްގެ އޮފީހުން ބުނެފި އެވެ.
އޮޑިޓަރ ޖެނެރަލްގެ އޮފީހުން އާންމުކޮށްފައިވާ މާލެ އަތޮޅު ތުލުސްދޫ ކައުންސިލްގެ އިދާރާގެ 2024 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައި ބުނީ ކ. ތުލުސްދޫ ކައުންސިލްގެ އިދާރާ އިން 2024 ވަނަ އަހަރުގެ ތެރޭގައި 870،319 ރުފިޔާ އިތުރު ގަޑީގެ ފައިސާގެ ގޮތުގައި ޚަރަދު ކޮށްފައިވާއިރު މުވައްޒަފުން އިތުރު ގަޑީގައި ކޮށްފައި ވަނީ ކޮންކޮން މަސައްކަތެއްތޯ އަދި އެ މަސައްކަތަކީ އިތުރު ގަޑީގައި ކުރުމަށް ހުއްދަ ލިބިފައިވާ، އަދި ކޮންމެހެން ވެސް އިތުރު ގަޑީގައި ކުރަން ޖެހޭ މަސައްކަތެއްތޯ ކައުންސިލްގެ އިދާރާ އިން ކަށަވަރު ކުރިކަން އެއްވެސް ލިޔެކިޔުމަކުން އެނގެން ނެތްކަން ފާހަގަކުރެވޭ ކަމަށެވެ.
އިތުރު ގަޑީގެ ލޮގްތަކުން އިތުރު ގަޑި ލޮގްކުރި މުވައްޒަފު އިތުރު ގަޑީގައި ކުރީ ކޮން މަސައްކަތެއްކަން އެއްވެސް ވަރަކަށް ރިކޯޑު ކޮށްފައި ނުހުންނަކަމާއި، ނަމަވެސް އެ ލޮގްތައް ކައުންސިލްގެ އިދާރާއިން އޯތޮރައިޒްކޮށް، އިތުރުގަޑިގެ ފައިސާ ދީފައިވާ ކަމަށް ވެސް އެ ރިޕޯޓުގައިވެ އެވެ.
އެ ރިޕޯޓުގައި ބުނީ، ކައުންސިލްގެ އިދާރާ އިން މައުލޫމާތު ދީފައި ވަނީ ކައުންސިލްގެ އިދާރާ އިން ބޭނުންކުރާ އެޗްއާރް ސިސްޓަމް ބޭނުންކޮށްގެން މުވައްޒަފުން އިތުރު ގަޑި ލޮގް ކުރާއިރު، އިތުރު ގަޑީގައި ކުރާ މަސައްކަތުގެ ތަފްސީލް ރިކޯޑް ނުކުރެވޭ ކަމަށެވެ. ސިސްޓަމްގައި އިތުރު ގަޑިގައި ކުރާ މަސައްކަތް ލޮގް ނުކުރެވުނު ނަމަވެސް، މި މައުލޫމާތު އެހެން ގޮތަކަށް ވެސް ނުވަތަ ވަކި ޝީޓެއްގައި ނުވަތަ ފޮތެއްގައި ކައުންސިލްގެ އިދާރާ އިން ބަލަހައްޓާފައި ނުވާކަން އެ ރިޕޯޓުގައި ފާހަގަކޮށްފައިވެ އެވެ.
ރިޕޯޓުގައި ބުނީ އިތުރު ގަޑީގައި ކުރާ މަސައްކަތުގެ ތަފުސީލް ނުހިމަނާ އިތުރު ގަޑި ލޮގް ކުރާނަމަ އެ މަސައްކަތަކީ ކޮންމެހެން ވެސް އިތުރު ގަޑީގައި ކުރަން ޖެހޭ މަސައްކަތެއްތޯ ނުވަތަ ރަސްމީގަޑީގައި ނިންމާނުލެވޭ މަސައްކަތެއްތޯ ކައުންސިލްގެ އިދާރާ އިން ބަލައި ކަށަވަރު ކުރިކަން އެނގެން ނުހުންނާނެ ކަމާއި، އެ މައުލޫމާތު ފެންނަން ނެތި އިތުރު ގަޑީގެ ލޮގްތައް ކައުންސިލްގެ އިދާރާ އިން އެޕްރޫވް ކުރުމުން އިތުރު ގަޑީގެ ފައިސާ ދޭންނުޖެހޭ ކަންކަމަށް ދޫކުރުމުގެ ފުރުސަތު އޮންނާނެ ކަމަށެވެ.
އެކަންކަން އިސްލާހު ކުރުމަށް ލަފާދީ އޮޑިޓަރ ޖެނެރަލްގެ އޮފީހުން ބުނީ، މުވައްޒަފުން އިތުރު ގަޑީގައި ކުރާ މަސައްކަތް ލޮގްކުރާއިރު އިތުރު ގަޑީގައި ކުރި މަސައްކަތްތަކުގެ މައުލޫމާތު ހިމަނައިގެން އިތުރު ގަޑި ލޮގް ކުރެވޭނެ ފަދަ އިންތިޒާމެއް ހަމަޖެއްސުމަށާއި، އިތުރުގަޑިގައި ކުރި މަސައްކަތްތަކުގެ މައުލޫމާތު ހިމަނައިގެން އިތުރު ގަޑި ލޮގް ކުރެވޭނެ ފަދަ އިންތިޒާމެއް ހަމަޖެއްސުމަށާއި އިތުރު ގަޑީގައި ކޮށްފައިވާ މަސައްކަތްތަކަކީ ރަސްމީގަޑީގައި ނިންމާނުލެވޭ ފަދަ މަސައްކަތެއްތޯ ބަލައި، އެކަން ކަށަވަރު ކުރުމަށްފަހު މެނުވީ އިތުރު ގަޑީގެ ފައިސާ ނުދިނުމަށް އަންގާ ކަމަށެވެ.
