އޮޑިޓަރ ޖެނެރަލްގެ އޮފީހުން ހުށަހެޅި 133 މިލިއަން ރުފިޔާގެ ބަޖެޓު މާލިއްޔަތު ކޮމިޓީން ފާސްކޮށްފި
14 އޮކްޓޯބަރު 2026 | ބުދަ 05:542027 ވަނަ އަހަރު ޖުމްލަ 394 އޮޑިޓެއް ކުރުމަށް އަމާޒު ހިފައި، އޮޑިޓަރ ޖެނެރަލްގެ އޮފީހުން ކުރަންޖެހޭ ޚަރަދުތަކުގެ ތަފްސީލު މާލިއްޔަތު ކޮމިޓީއާ ވަނީ ހިއްސާކޮށްފައި. މީގެ ތެރޭގައި ދައުލަތުގެ މުއައްސަސާތަކާއި ކައުންސިލްތަކުގެ އިތުރުން ސަރުކާރު ހިއްސާވާ ކުންފުނިތަކުގެ އޮޑިޓްތައް ހިމެނޭއިރު، މި ބަޖެޓު ކޮމިޓީން ފާސްކުރީ ހާޒިރުވި މެންބަރުންގެ އިއްތިފާގުން
ރައްޔިތުންގެ މަޖިލީހުގެ މާލިއްޔަތު ކޮމިޓީއިން، އޮޑިޓަރ ޖެނެރަލްގެ އޮފީހުގެ 2027 ވަނަ އަހަރަށް ލަފާކުރާ ބަޖެޓު ދިރާސާކުރުން | ރައްޔިތުންގެ މަޖިލިސް
އަންނަ 2027 ވަނަ އަހަރަށް ލަފާކޮށް އޮޑިޓަރ ޖެނެރަލްގެ އޮފީހުން ހުށަހެޅި 133 މިލިއަން ރުފިޔާގެ ބަޖެޓު، ރައްޔިތުންގެ މަޖިލީހުގެ މާލިއްޔަތު ކޮމިޓީ އިން ފާސްކޮށްފި އެވެ.
އަންނަ 2027 ވަނަ އަހަރަށް އެ އޮފީހުން ލަފާކުރާ ބަޖެޓު މަޖިލީހަށް ހުށަހަޅާފައި ވަނީ މި މަހުގެ 12 ވީ ހޯމަ ދުވަހުގަ އެވެ. އެ ދުވަހުގެ މާލިއްޔަތު ކޮމިޓީގައި އެ އޮފީހުން ވަނީ 2027 ވަނަ އަހަރު އެ އޮފީހުން ކުރަން ހަމަޖެހިފައިވާ ޚަރަދުތަކާއި އޮޑިޓުތަކުގެ ތަފްސީލު ހިއްސާކޮށްފަ އެވެ.
އެ ބައްދަލުވުމުގައި އޮޑިޓަރ ޖެނެރަލް ހުސެއިން ނިޔާޒީ ވިދާޅުވީ 2027 ވަނަ އަހަރަށް އެ އޮފީހުން ހުށަހަޅަނީ 394 އޮޑިޓް ކުރުމަށް ކަމަށެވެ. އެކަމުގެ ތަފްސީލު ހިއްސާކުރައްވާ ނިޔާޒީ ވިދާޅުވީ އޭގެ ތެރޭގައި ހިމެނެނީ މާލިއްޔަތު ގާނޫނުގެ ދަށުން ދައުލަތުގެ މުއައްސަސާތަކުގައި ހިމެނޭ 61 ތަނެއްގެ ފައިނޭންޝަލް އަދި ކޮމްޕްލަޔަންސް އޮޑިޓާއި، ލޯކަލް ކައުންސިލްތަކުގެ ތެރެއިން 106 އޮޑިޓްގެ އިތުރުން ޕަބްލިކް ފަންޑްސް އެންޑް ސްކީމްގެ 6 އޮޑިޓް ކަމަށެވެ.
އޭގެ އިތުރުން ބޭރުގެ އެހީގައި ހިންގާ މަޝްރޫއުތަކުގެ 22 އޮޑިޓް، ދައުލަތުގެ ކުންފުނިތަކުގެ ފައިނޭންޝަލް އޮޑިޓްގެ ތެރޭގައި ހިމެނޭ 40 އޮޑިޓް، ފައިނޭންޝަލް އިންސްޓިޓިއުޓްގެ ތެރޭގައި ހިމެނޭ 4 އޮޑިޓް އަދި ބަޖެޓާއި ފިސްކަލް ޓްރާންސްޕޭރެންސީ ގާނޫނުގެ ދަށުން ކުރަންޖެހޭ 5 އޮޑިޓާއި، ދައުލަތުގެ ދަރަންޏާއި ގެރެންޓީ ހިމެނޭ 3 އޮޑިޓް، ޕަރފޯމަންސް އޮޑިޓްގެ ގޮތުގައި ހިމެނޭ 6 އޮޑިޓް، ސްޕެޝަލް އޮޑިޓްގެ 8 އޮޑިޓްގެ އިތުރުން އިންފޮމޭޝަން ސިސްޓަމްތަކުގެ 7 އޮޑިޓާއި ތިމާވެއްޓާ ގުޅުންހުރި 6 އޮޑިޓާއި މިއަހަރު ނުނިމި ހުރި 120 އޮޑިޓް ހިމެނޭ ކަމަށް ވެސް ނިޔާޒީ ވިދާޅުވި އެވެ.
ނިޔާޒީ ވިދާޅުވީ މިއަހަރުގެ މިހާތަނަށް 183 ރިޕޯޓެއް ޝާއިއުކުރަން އެ އޮފީހުން ނިންމާފައިވާ ކަމަށެވެ. އަދި މިހާރު ވެސް 259 އޮޑިޓެއްގެ މަސައްކަތް ކުރިއަށްދާ ކަމަށް ނިޔާޒީ ވިދާޅުވި އެވެ.
އެހެންކަމުން 2027 ވަނަ އަހަރަށް ލަފާކޮށް އޮޑިޓަރ ޖެނެރަލްގެ އޮފީހުން، 133,590,265 (ސަތޭކަ ތިރީސް ތިން މިލިއަން ފަސް ލައްކަ ނުވަދިހަ ހާސް ދުއިސައްތަ ފަސްދޮޅަސް ފަސް) ރުފިޔާގެ ބަޖެޓް އެއް ހުށަހަޅުއްވާ ކަމަށް ނިޔާޒީ ވިދާޅުވި އެވެ.
އޭގެ ފަހުން އަންގާރަ ދުވަހުގެ މާލިއްޔަތު ކޮމިޓީގެ ބައްދަލުވުމުގައި އެ ބަޖެޓު އޮތްގޮތަށް ފާސްކުރުމަށް ހުށަހަޅުއްވާފައި ވަނީ ފުނަދޫ ދާއިރާގެ މެންބަރު މުހައްމަދު މަމްދޫހު އެވެ. އެ ހުށަހެޅުއްވުމަށް ތާއީދު ކުރެއްވީ ކެލާ ދާއިރާގެ މެންބަރު އަބްދުﷲ ޝަރީފް އެވެ. އެ ހުށަހެޅުން މާލިއްޔަތު ކޮމިޓީ އިން އަންގާރަ ދުވަހު ފާސްކޮށްފައި ވަނީ ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާގުންނެވެ.
