ރަކީދޫ ކައުންސިލްގެ އިދާރާ އިން 2024 ވަނަ އަހަރުގެ މާލީ ބަޔާންތައް ތައްޔާރުކޮށް އޮޑިޓުކުރުމަށް ހުށަހަޅާފައެއް ނުވޭ: އޮޑިޓް ރިޕޯޓް
10 އޮކްޓޯބަރު 2026 | ހޮނިހިރު 13:50ވ. ރަކީދޫ ކައުންސިލުން 2024 ވަނަ އަހަރުގެ މާލީ ބަޔާންތަކާއި އަހަރީ ރިޕޯޓު ތައްޔާރުކޮށް އޮޑިޓަށް ހުށަހަޅާފައި ނުވާތީ، އެ އިދާރާގެ މާލީ މުއާމަލާތްތަކުގެ ސައްހަކަން ކަށަވަރު ނުކުރެވޭނެ ކަމަށް އޮޑިޓް އޮފީހުން ބުނެފި. މިއީ މާލިއްޔަތު ގާނޫނާ ހިލާފު ކަމެއްކަން ފާހަގަކޮށް، މާލީ ކަންކަމުގައި ޖަވާބުދާރީވުމަށްޓަކައި އެ ބަޔާންތައް ގަވާއިދުން ފޮނުވުމަށް އޮޑިޓް ރިޕޯޓުގައި ވަނީ ލަފާދީފައި
ރައީސް ޑރ. މުހައްމަދު މުއިއްޒު ވ. ރަކީދޫ ކައުންސިލާއި ބައްދަލުކުރެއްވުން | ރައީސް އޮފީސް
ވ. ރަކީދޫ ކައުންސިލްގެ އިދާރާގެ 2024 ވަނަ އަހަރުގެ މާލީ ބަޔާންތައް ތައްޔާރުކޮށް، އޮޑިޓް ކުރުމަށް ހުށަހަޅާފައިނުވާ ކަމަށް އޮޑިޓް އޮފީހުން ބުނެފި އެވެ.
އެ އޮފީހުން އާންމު ކޮށްފައިވާ ރަކީދޫ ކައުންސިލްގެ އިދާރާގެ 2024 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައި ބުނީ، އެ ރަށު ކައުންސިލްގެ އިދާރާ އިން 2024 މާލީ ހިސާބުތަކާއި އެ އިދާރާގައި ހިނގި ކަންތައްތަކުގެ ރިޕޯޓް ހިމަނައިގެން އަހަރީ ރިޕޯޓެއް ތައްޔާރުކޮށް، އޮޑިޓް ކުރުމަށްޓަކައި އޮޑިޓަރ ޖެނެރަލް އަށް ހުށަހަޅާފައިނުވާކަން ފާހަގަކުރާ ކަމަށެވެ.
އެ ރިޕޯޓުގައި ބުނީ ދައުލަތުގެ މާލިއްޔަތުގެ ގާނޫނުގެ 35 ވަނަ މާއްދާގެ (ހ) ގައި، ދައުލަތުގެ ކޮންމެ މަސްއޫލު އޮފީހެއްގައި އެ ގާނޫނުގެ ދަށުން ކަނޑައަޅާ ޒިންމާދާރުވެރިޔާ، ކޮންމެ މާލީ އަހަރެއް ނިމޭތީ 3 މަސް ދުވަހުގެ ތެރޭގައި، އެ މައްދާގައި ބަޔާން ކޮށްފައިވާ މާލީ ހިސާބުތަކާއި، އެ އޮފީހަކުން ހިންގި ކަންތައްތަކުގެ ރިޕޯޓް ހިމަނައިގެން، އަހަރީ ރިޕޯޓެއް ތައްޔާރުކޮށް، އޮޑިޓަރ ޖެނެރަލް އަށް ހުށަހަޅަން ޖެހޭނެ ކަމަށް ބަޔާން ކޮށްފައިވާ ކަމަށެވެ.
އެގޮތުން ރަށު ކައުންސިލްތަކުންނާ އަތޮޅު ކައުންސިލްތަކުންނާއި ސިޓީ ކައުންސިލްތަކުން މާލީ ހިސާބު، ތައްޔާރު ކުރަން ޖެހޭ ގޮތް މިނިސްޓްރީ އޮފް ފިނޭންސްގެ މާލިއްޔަތާ ބެހޭ ސަރކިއުލާގައި ކަނޑައަޅައި އާންމުކޮށްފައިވާ ކަމަށް އެ ރިޕޯޓުގައިވެ އެވެ.
އޮޑިޓް އޮފީހުން ބުނީ އަހަރީ މާލީ ބަޔާންތަކަކީ ކައުންސިލްގެ އިދާރާ އަށް އަހަރު ތެރޭގައި ލިބުނު އާމްދަނީ އާއި ކުރެވުނު ޚަރަދާއި، ބާކީ ހުރި ފައިސާ އަދި އަހަރު ނިމުނު އިރު މިލްކިއްޔާތުގެ ގޮތުގައި ހުރި ހަރުމުދަލާއި ލިބެންޖެހޭ ފައިސާ އާއި އަތުގައި އަދި ބޭންކުގައި ހުރި ފައިސާ އާއި އެހެނިހެން މުދަލާއި ތަކެއްޗާއި، މާލީ ޒިންމާތަކުގެ ގޮތުގައި ހިމެނޭ ދައްކަން ޖެހޭ ފައިސާ އެހެނިހެން މާލީ ޒިންމާތައް ދައްކުވައިދޭ ވަރަށް މުހިއްމު ބަޔާންތަކެއް ކަމަށެވެ.
އެހެންކަމުން މި މާލީ ބަޔާންތައް ނެތުމުން ކައުންސިލްގެ އިދާރާގެ ކުރިން، މާލީ މުއާމަލާތްތައް އަހަރު ތެރޭގައި ހިނގާފައިވާ ގޮތާއި، އަހަަރު ނިމުނު އިރު މާލީ ކަންކަން ހުރި ގޮތް ފުރިހަމަކަމާއި ތެދުވެރިކަމާއެކު ފެންނަން ނުހުންނާނެ ކަމަށް އެ އޮފީހުން ވަނީ ވަނީ ބުނެފަ އެވެ. އަދި މާލީ ޒިންމާދާރުވެރިޔާގެ ޒިންމާގެ ތެރެއިން މުހިންމު ޒިންމާއެއް އަދާކޮށްފައި ނުވުމާއި އޮފީހުގެ މާލީ ކަންކަމުގައި އެދެވޭ ގޮތެއްގައި ޖަވާބުދާރީ ނުވެވޭނެ ކަމަށް ވެސް އެ ރިޕޯޓުގައިވެ އެވެ.
އޮޑިޓް އޮފީހުން ވަނީ އެ ކަން އިސްލާހު ކުރުމަށް ލަފާދޭ ގޮތް ވެސް އޮޑިޓް ރިޕޯޓުގައި ހިމަނާފަ އެވެ.
