ކޮޅުފުށީ ކައުންސިލަށް ބިމު ކުލީގެ ގޮތުގައި ލިބެންޖެހޭ 2 ލައްކަ އަށް ވުރެ ގިނަ ރުފިޔާ ނުލިބި ގެއްލިފައިވޭ: އޮޑިޓް ރިޕޯޓު
13 ސެޕްޓެމްބަރު 2026 | އާދީއްތަ 08:09މ. ކޮޅުފުށީގައި ތެޔޮ ވިއްކުމަށް ބިން ކުއްޔަށް ދޫކުރުމުގެ އެއްބަސްވުމުގައިވާ ޖޫރިމަނާގެ ރޭޓު، މާލިއްޔަތު ގަވާއިދާ ހިލާފަށް ކައުންސިލުން ކުޑަކޮށްފައިވާކަން އޮޑިޓް ރިޕޯޓުން ހާމަވެއްޖެ. މި ބަދަލުގެ ސަބަބުން ކައުންސިލަށް ލިބެންޖެހޭ 297,850 ރުފިޔާ ގެއްލިފައިވާތީ، ބީލަމުގެ އުސޫލުތަކާ އެއްގޮތަށް އަމަލުކުރުމަށް އޮޑިޓަރ ޖެނެރަލްގެ އޮފީހުން ވަނީ ލަފާދީފައި
ރައީސް ޑރ. މުހައްމަދު މުއިއްޒު، މ. ކޮޅުފުށީ ކައުންސިލާ ބައްދަލުކުރެއްވުން | ރައީސް އޮފީސް
މ. ކޮޅުފުށި ކައުންސިލަށް ބިމު ކުލީގެ ގޮތުގައި ލިބެން ޖެހޭ ފައިސާގެ ތެރެއިން 2 ލައްކަ އަށް ވުރެ ގިނަ ރުފިޔާ ގެއްލިފައިވަނީ ޖޫރިމަނާ ފައިސާ ހިމަނާފައި ނުވުމުން ކަމަށް އޮޑިޓަރ ޖެނެރަލްގެ އޮފީހުން ބުނެފި އެވެ.
އެ އޮފީހުން އާންމުކޮށްފައިވާ ކޮޅުފުށީ ކައުންސިލްގެ އިދާރާގެ 2024 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައި ބުނީ، ތެޔޮ ވިއްކުމުގެ ޚިދުމަތް ދިނުމަށްޓަކައި ބިން ކުއްޔަށް ދޫކުރުމަށް 19 ޖޫން 2022 ގައި ކައުންސިލްގެ އިދާރާ އިން ކުރި އިއުލާނުގެ މައުލޫމާތު ކަރުދާހުގައި ކޮންމެ މަހެއްގެ ކުލި، އެ މަހެއްގެ 10 ވަނަ ދުވަހުގެ ކުރިން ނުދައްކައިފިނަމަ ލަސްވާ ކޮންމެ ދުވަހަކަށް 100 ރުފިޔާގެ މަގުން ޖޫރިމަނާ ނަގާނޭ ކަމަށް ބަޔާން ކޮށްފައިވާ ކަމަށެވެ. އަދި މި ގޮތުން 12 ސެޕްޓެމްބަރު 2022 ގައި ބިން ކުއްޔަށް ދޫކުރުމަށް ވެފައިވާ އެއްބަސްވުމުގައި ވެސް އެ ރޭޓުން ޖޫރިމަނާ ނަގާނެ ކަމަށް ބަޔާން ކޮށްފައިވާ ކަމަށެވެ.
އެހެން ނަމަވެސް މި ބީލަން ކާމިޔާބުކުރި ފަރާތާއެކު 12 ސެޕްޓެމްބަރު 2022 ގައި ކައުންސިލްގެ އިދާރާ އިން އެއްބަސްވުމުގައި ސޮއިކުރުމަށްފަހު 25 އޭޕްރީލް 2023 ގައި ބޭއްވި ކައުންސިލްގެ 4 ވަނަ ދައުރުގެ 102 ވަނަ ޖަލްސާ އިން ވަނީ އެ ޖޫރިމަނާގެ ރޭޓް މަހަކު 250 ރުފިޔާ އަށް ކުޑަކުރުމަށް ފާސްކޮށްފައި ކަމަށް އެ ރިޕޯޓުގައިވެ އެވެ.
އެހެން ކަމުން ޖޫރިމަނާ ރޭޓު ބަދަލުކުރުމުން ދައުލަތުގެ މާލިއްޔަތު ގަވާއިދުގައި ބަޔާންކޮށްފައިވާ، ބީލަމުގެ ކަންތައް ކުރިއަށް ގެންވާނީ އެ ބީލަމެއްގައި ބައިވެރިވާ ފަރާތްތަކުގެ މެދުގައި ހަމަހަމަކަމާއި ހާމަކަން ބޮޑު، ވާދަވެރި، އިގުތިސާދީ ގޮތުން އެންމެ ފައިދާ ހުރި ޒިންމާދާރު ގޮތެއްގެ މަތިީން ކަމަށް ބުނާ މާއްދާ އާއި ޚިލާފުވެފައިވާ ކަން އޮޑިޓް އޮފީހުން ވަނީ ފާހަގަކޮށްފަ އެވެ.
މީގެ އިތުރުން ޖޫރިމަނާގެ ރޭޓަށް މިގޮތަށް ބަދަލު ގެނައުމުގެ ސަބަބުން ކައުންސިލްގެ އިދާރާ އަށް ލިބެން އޮތް މަންފާއެއް ނުލިބި ގޮސްފައިވާ ކަމަށާއި މިގޮތުން ކުލި ނުދެއްކުމުގެ ސަބަބުން އަރާފައިވާ ޖޫރިމަނާގެ ގޮތުގައި ކައުންސިލްގެ އިދާރާ އަށް ލިބެން އޮތް ޖުމުލަ، 297،850 ރުފިޔާ ނުލިބި ގެއްލިފައިވާ ކަމަށް އެ އޮފީހުން ވަނީ ބުނެފަ އެވެ.
އެ ރިޕޯޓުގައި މިކަންކަން އިސްލާހުކުރުމަށް އެ އޮފީހުން ލަފާ ދޭ ގޮތް ވެސް ވަނީ ބަޔާންކޮށްފަ އެވެ.
