ފީވަކު ޕޮލިސް ސްޓޭޝަން އެޅުމަށް ބޮޑު ބިމެއް ދިން ނަމަވެސް މަސައްކަތް ކުރިއަށްދަނީ ލަސް ދުވެއްޔެއްގައި!
2 ނޮވެމްބަރު 2026 | ހޯމަ 11:55ށ. ފީވަކުގައި ޕޮލިސް ސްޓޭޝަން އެޅުމަށް 16,500 އަކަފޫޓުގެ ބިމެއް ކައުންސިލުން ދޫކޮށްފައިވީ ނަމަވެސް، އެ މަޝްރޫއުގެ އަމަލީ މަސައްކަތް ކުރިއަށްދާ ދުވެލި އިންތިހާއަށް ލަސްވުމުން ކައުންސިލުން ވަނީ ކަންބޮޑުވުން ފާޅުކޮށްފައި. އަމިއްލަ ކުންފުންޏަކާ ހަވާލުކޮށްގެން ކުރިއަށްގެންދާ މި މަސައްކަތަށް އަހަރެއްވީއިރު، ފެންނަން އޮތީ ހަމައެކަނި ދަގަނޑުތަކެއް ޖަހާފައިވާ މަންޒަރު ކަމަށް ކައުންސިލްގެ ނައިބު ރައީސް އަލީ ރިޒާ ވިދާޅުވި
ށ.ފީވަކުގެ ޕޮލިސް ސްޓޭޝަންގެ މަސައްކަތް ކުރިއަށްދާ ގޮތާ ގުޅޭގޮތުން އެރަށު ކައުންސިލްގެ ނައިބު ރައީސް އަލީ ރިޒާ ރާއްޖެޓީވީއަށް އިންޓަވިއު ދެއްވަނީ | ރާއްޖެއެމްވީ
ށ. ފީވަކުގައި އިމާރާތް ޕޮލިސް ސްޓޭޝަންގެ މަސައްކަތަށް އެ ރަށު ކައުންސިލުން ބޮޑު ބިމެއް ހަމަޖައްސައިދީފައި ވީނަމަވެސް، އެ މަޝްރޫއުގެ މަސައްކަތް ކުރިއަށްދަނީ ވަރަށް ލަސް ދުވެއްޔެއްގައި ކަމަށް އެ ރަށު ކައުންސިލުން ބުނެފި އެވެ.
މި މަޝްރޫއާ ގުޅޭގޮތުން މައުލޫމާތު ދެއްވަމުން ފީވަކު ކައުންސިލްގެ ނައިބު ރައީސް އަލީ ރިޒާ ވިދާޅުވީ، ޕޮލިސް ސްޓޭޝަން އެޅުމަށް އެންމެ ފުރަތަމަ އެދުމުން ކައުންސިލުން ދޫކުރީ 10,000 އަކަފޫޓުގެ ބިމެއް ކަމަށެވެ. ނަމަވެސް އެ ބިން ކުޑަވެގެން އަލުން އެދުމާ ގުޅިގެން، ކައުންސިލުން ފަހުން 16,500 އަކަފޫޓުގެ ބޮޑު ބިމެއް އެ މަސައްކަތަށް ދޫކޮށްފައިވާ ކަމަށެވެ.
އަލީ ރިޒާ ވިދާޅުވީ، އެ މަޝްރޫއުގެ ބިންގާ 14 އޮކްޓޫބަރު 2025 ގައި އަޅައި އަމަލީ މަސައްކަތް ފެށި ނަމަވެސް، މަސައްކަތް ކުރިއަށްދާ މިންވަރު ފެންނަނީ ވަރަށް ދަށްކޮށް ކަމަށެވެ. މަސައްކަތް ހުއްޓުމެއް ނެތި ކުރިއަށްދާ ކަމަށް ފެނުނު ނަމަވެސް، މުޅި މަޝްރޫއުގެ ދުވެލި ހުރީ ވަރަށް ބޮޑަށް ލަސްވެފައި ކަމަށާއި، އަހަރު ދުވަސްވީއިރު، ދަގަނޑު ކޮޅެއް ޖެހުން ފިޔަވައި އެއްވެސް މަސައްކަތެއް ކުރެވިފައިނުވާ ކަމަށް އޭނާ ވިދާޅުވި އެވެ.
މީގެ އިތުރުން އަލީ ރިޒާ ވިދާޅުވީ، އަމިއްލަ ކުންފުންޏަކާ ހަވާލުކޮށްގެން ކުރިއަށްގެންދާ މި މަސައްކަތުގެ ސައިޓުގައި އާންމުކޮށް ހަރަކާތްތެރިވަނީ ބިދޭސީ މަސައްކަތްތެރިން ކަމަށާއި، ގާތްގަނޑަކަށް 10 މީހުން މަސައްކަތުގައި ހަރަކާތްތެރިވާ ކަމަށެވެ. އަދި ޕޮލިސް ސްޓޭޝަންގެ މަސައްކަތުގެ ސްޕީޑާމެދު ކަންބޮޑުވުން އެބައޮތް ކަމަށާއި، މިސްޕީޑްގައި ކުރިއަށްދާނަމަ މަސައްކަތް އަވަހަށް ނިމޭނެ ކަމަށް އުންމީދު ނުކުރާ ކަމަށް އޭނާ ވިދާޅުވި އެވެ.
