ށ ފީވަކު މޫދަށް އެރޭ ސަރަހައްދު ތަރައްގީކުުރުމުގެ މަޝްރޫއު: ޖުމްލަ 5 ދުވަހު މަސައްކަތް ކުރުމަށްފަހު ހުއްޓިފައި!
29 އޮކްޓޯބަރު 2026 | ބުރާސްފަތި 14:06ށ. ފީވަކު މޫދަށް އެރޭ ސަރަހައްދު ތަރައްގީކުރުމުގެ މަސައްކަތް އެމްޓީސީސީން ފެށުމަށްފަހު ހުއްޓިފައިވާތީ، އެކަމުގެ ސަބަބުން ތިމާވެއްޓަށް ބޮޑެތި ގެއްލުންތަކެއް ލިބެމުންދާ ކަމަށް ބުނެ އެ ރަށު ކައުންސިލުން ކަންބޮޑުވުން ފާޅުކޮށްފި. މި މަޝްރޫއުގެ އަމަލީ މަސައްކަތް އެކަށީގެންވާ ގޮތެއްގައި ކުރިއަށް ނުދާތީ، ކުރިން ކޮނުނު ސަރަހައްދަށް އަލުން ވެލި އަރައި ރަށުގެ ގޮނޑުދޮށަށް ގެއްލުންވަމުންދާކަން ކައުންސިލުން ފާހަގަކުރޭ
ށ ފީވަކު މޫދަށް އެރޭ ސަރަހައްދު ތަރައްގީ ކުުރުމުގެ މަޝްރޫއު: ޖުމްލަ 5 ދުވަހު މަސައްކަތް ކުރުމަށްފަހު މަޝްރޫއު ހުއްޓިފައި! | ރާއްޖެ އެމްވީ
ށ. ފީވަކު މޫދަށް އެރޭ ސަރަހައްދުގެ މަޝްރޫއު ތަރައްގީކުރުން ކުރިއަށް ނުދާތީ އެރަށު ކައުންސިލުން ކަންބޮޑުވުން ފާޅުކޮށްފި އެވެ.
މިކަމުގެ ކަންބޮޑުވުން ފާޅުކުރައްވާ ރާއްޖެޓީވީއަށް ފީވަކު ކައުންސިލްގެ ނައިބު ރައީސް އަލީ ރިޒާ ދެއްވި އިންޓަވިއުގައި ވިދާޅުވީ މި މަޝްރޫއުގެ މަސައްކަތް ފެށުނީ 2025 ވަނަ އަހަރުގެ އޮކްޓޫބަރު މަހުގެ ތެރޭގައި ނަމަވެސް އަމަލީ މަސައްކަތް ފަށާފައިވަނީ ނޮވެންބަރު މަހުގެ ތެރޭގައި ކަމަށެވެ.
އެގޮތުން، ދެތިން ދުވަހު މަސައްކަތް ކުރުމަށްފަހު މަގެއް ހިއްކުމަށް އެތަނުން ނެގި ވެލިތައް އަޅާފައިވާ ކަމަށް ރިޒާ ވިދާޅުވި އެވެ. އަދި އޭގެ ފަހުން މަސައްކަތެއްނުކޮށް ހުރުމަށްފަހު މިއަހަރުގެ މެއި ހިސާބުގައި މަސައްކަތް ފަށައި ކޮންމެވެސް ވަރަކަށް މަސައްކަތް ކުރުުމަށްފަހު ހުއްޓާލާފައިވާ ކަމަށް ރިޒާ ވިދާޅުވި އެވެ.
މިހާރު މިއޮތީ އަނެއްކާ ވެސް އެ ކުރިން ކޮނުނު ވަރަށް ހަމަ ކޮންނަން ވެފައި، އެއީ މިރަށަކީ އެއީ ވެލިގަނޑަކީ އަބަދުވެސް ދައުރުވަމުންދާ ވެލިގަނޑެއް ވީމަ މޫސުމީ ބަދަލުތަކާއި އެކީގައި އެ ހުރިހާ ވެލި އައިސްފައި އަނެއްކާ ވެސް އެ އެޅެނީ މިތާ އެތެރެއަށް، އެޅުނީމަ އަނެއްކާވެސް ރަށުގައި އިންނަ ވެލިކޮޅު ކުޑަވެ އެ އެއްޗެހިތައް އެއްގަމަށް ނަގަން މި ޖެހެނީ އަނެއްކާ ވެސް މިކަން ކުރަން ބޭނުމިއްޔާމުއަލީ ރިޒާ
މި މަސައްކަތް ފަށަން ޖެހޭނީ ތަން ހިމާޔަތްކުރުމަށްފަހުގައި ކަން ފާހަގަކުރައްވާ ރިޒާ ވިދާޅުވީ މިހާރު އެކަން ކޮށްފައި އޮތްގޮތުން ތިމާވެށީގެ ގޮތުން ވަރަށް ބޮޑެތި ގެއްލުންތަކަކާއި ކުރިމަތިލާން ޖެހިފައިވާ ކަމަށެވެ.
މި މަސައްކަތަށް ގެނައި ވެހިކަލްތައް މިހާރު ރަށުގައި ނެތް ނަމަވެސް މަސައްކަތަށް ރަށުން ނަގާފައިވާ މީހުން ކޮންމެ ދުވަހު މަސައްކަތަށް ނުކުމެ ވިނަކޮޅެއް ނޮޅާލުން ފަދަ ކަންކަން ކުރާ ކަމަށް ރިޒާ ވިދާޅުވި އެވެ.
މި މަޝްރޫއަކީ ރައީސް މުއިއްޒު 2025 ވަނަ އަހަރުގެ ތެރޭގައި ފީވަކަށް ވަޑައިގެން އިފްތިތާހުކޮށްދެއްވި މަޝްރޫއެކެވެ. މި މަޝްރޫއު ހަވާލުކޮށްފައިވަނީ އެމްޓީސީސީއަށެވެ.
