ޓްރާންސްފޯ ޕްރޮޖެކްޓުގެ "އާރުވެރި މެޗިންގް ގްރާންޓް" އަށް ޕްރޮޕޯޒަލް ހުށަހެޅުމުގެ ފުރުސަތު ހުޅުވާލައިފި
2 ނޮވެމްބަރު 2026 | ހޯމަ 10:43މަސްވެރިކަމާއި ދަނޑުވެރިކަން ކުރިއެރުވުމަށް ވޯލްޑް ބޭންކުގެ އެހީގައި ހިންގާ 278 މިލިއަން ރުފިޔާގެ "އާރުވެރި މެޗިންގް ގްރާންޓް" ސްކީމުގެ ފަސް ދާއިރާއަކަށް ޕްރޮޕޯޒަލް ހުށަހެޅުމުގެ ފުރުސަތު ހުޅުވާލައިފި. ހޮވޭ މަޝްރޫއުތަކަށް 40 އިންސައްތަ ހިލޭ އެހީ ދޭ މި ސްކީމަށް ކުރިމަތިލުމުގެ ސުންގަޑިއަކީ ނޮވެމްބަރު 30 ގައި. މީގެ މައިގަނޑު މަގްސަދަކީ އަންހެނުންނާއި ޒުވާނުން ބާރުވެރިކުރުވައި، މި ސިނާއަތްތަކުގައި ތިމާވެއްޓާ ރައްޓެހި ދެމެހެއްޓެނިވި އުސޫލުތައް ގާއިމުކުރުން
ދިވެހިންގެ ލޭނާރު ކަމުގައިވާ ކަނޑުމަހުގެ މަސްވެރިކަން | ވަގުތު.އެމްވީ
ރާއްޖޭގެ މަސްވެރި ސިނާއަތް ކުރިއަރުވައި، އެ ދާއިރާގައި ހަރަކާތްތެރިވާ ފަރާތްތައް ބާރުވެރިކުރުވުމުގެ މަގުސަދުގައި ވޯލްޑް ބޭންކުގެ އެހީގައި ހިންގާ ޓްރާންސްފޯ ޕްރޮޖެކްޓުގެ "އާރުވެރި މެޗިންގް ގްރާންޓް" ސްކީމަށް ޕްރޮޕޯޒަލް ހުށަހެޅުމުގެ ފުރުސަތު ހޯމަ ދުވަހު ހުޅުވާލައިފި އެވެ.
މަސްވެރިކަމާއި ދަނޑުވެރިކަމުގެ ސިނާއަތް ކުރިއަރުވައި މާލީ ގޮތުން ބާރުވެރިކުރުމުގެ މަގްސަދުގައި، ޖުމްލަ 278 މިލިއަން ރުފިޔާގެ ބަޖެޓަކާއެކު ފަރުމާކޮށްފައިވާ މި ސްކީމްގެ ހަތް ދާއިރާގެ ތެރެއިން މިހާރު ހުޅުވާލާފައިވަނީ ފަސް ދާއިރާއެކެވެ. މި ސްކީމަށް ހުށަހަޅައިގެން ހޮވޭ މަޝްރޫއުތަކުގެ ޖުމްލަ ހަރަދުގެ 40 އިންސައްތަ ހަމަޖައްސައިދިނުމަށް ހަމަޖެހިފައިވަނީ ހިލޭ އެހީގެ ގޮތުގަ އެވެ.
މި ފަހަރު ފުރުސަތު ހުޅުވާލެވުނު 5 ދާއިރާއަކީ:
• ފިޝިން ފްލީޓް ޑީކާބަނައިޒޭޝަން ގްރާންޓް: މަސްދޯނިފަހަރުގައި ހަކަތައަށް ކުރާ ޚަރަދު ކުޑަކުރުމަށްޓަކައި ތިމާވެއްޓާ ރައްޓެހި ނިޒާމުތައް ގާއިމުކުރުމަށް ދޭ އެހީ
• ސާކިއުލާ އިކޮނޮމީ ޑިވެލޮޕްމަންޓް ގްރާންޓް (ދަނޑުވެރިކަން): ދަނޑުވެރިކަމާއި މަސްވެރިކަމަށް ދޫކޮށްފައިވާ ފަޅުރަށްރަށުގެ އުމްރާނީ ތަރައްގީއަށާއި، މީހުން ދިރިއުޅޭ ރަށްރަށުގައި ލައިސަންސް ލިބިގެން ހިންގާ ދަނޑުވެރިކަމުގެ ވިޔަފާރިތަކަށް ބޭނުންވާ ނިޒާމުތައް ތަރައްޤީކުރުމަށް ދޭ އެހީ
• މެރިކަލްޗާ ޑިވެލޮޕްމަންޓް ގްރާންޓް: މެރިކަލްޗަ ދާއިރާއަށް އަލަށް ވަންނަން ބޭނުންވާ އަދި މިހާރުވެސް އެ ދާއިރާގައި ހަރަކާތްތެރިވާ އަމިއްލަ ފަރުދުންނާއި ކުންފުނިތައް ކުރިއެރުވުމަށް ދޭ އެހީ
• ސާކިއުލާ އިކޮނޮމީ ޑިވެލޮޕްމަންޓް ގްރާންޓް (ޕްރޮސެސިންގ): މަހުގެ ބާވަތްތައް ޕްރޮސެސްކުރާ ފަރާތްތަކުގެ މެދުގައި ވާދަވެރިކަން އިތުރުކޮށް، ދެމެހެއްޓެނިވި ގޮތެއްގައި އުފެއްދުންތެރިކަން އިތުރުކުރުމަށް ދޭ އެހީ
• އެސްއެމްއީ ޑިވެލޮޕްމަންޓް ގްރާންޓް: ކުދި އަދި މެދު ފަންތީގެ ވިޔަފާރިތަކުން މަހުގެ އަގު އެއްކުރި (ވެލިއު އެޑެޑް) އުފެއްދުންތައް އިތުރުކުރުމަށާއި ވިޔަފާރިތައް ސިންދަފާތު ކުރުމަށް ދޭ އެހީ އެވެ. އަދި މި ދާއިރާއިން ޚާއްސަކޮށް އަންހެނުންނާއި ޒުވާނުން ހިންގާ ވިޔަފާރިތަކަށް އިސްކަންދެވޭނެ
މި ސްކީމްގެ މައިގަނޑު މަގްސަދުތަކުގެ ތެރޭގައި މަސްވެރި ސިނާއަތުގައި ބޭނުންކުރާ ހަކަތަ ސަމަކާރަކުރުމާއި، ދެމެހެއްޓެނިވި އުސޫލުތައް ކުރިއެރުވުމާއި، ވިޔަފާރިތަކަށް ފަހި މާހައުލެއް ގާއިމުކޮށްދިނުން ހިމެނެ އެވެ. އަދި މީގެ އިތުރުން ނަފާވެރި ސިނާއަތެއްގެ ގޮތުގައި މެރިކަލްޗަރ ތަރައްގީކޮށް، އަންހެނުންނާއި ޒުވާނުންނަށް ވިޔަފާރިއާއި ވަޒީފާގެ އައު ފުރުސަތުތައް ފަހިކޮށްދިނުން ވެސް ހިމެނެ އެވެ.
މި ގްރާންޓަށް ކުރިމަތިލުމުގެ ޝަރުތުތަކާއި އިތުރު މައުލޫމާތު މި މަޝްރޫއުގެ ރަސްމީ ޕޯޓަލް މެދުވެރިކޮށް ލިބެން ހުންނާނެ އެވެ. މިކަމަށް ޝައުގުވެރިވާ ފަރާތްތަކުން ނޮވެމްބަރު 30 ވާ ހޯމަ ދުވަހުގެ މެންދުރު 12:00 ގެ ކުރިން، ބޭނުންވާ ލިޔެކިޔުންތަކާއެކު ޕޯޓަލް މެދުވެރިކޮށް ޕްރޮޕޯޒަލް ހުށަހެޅުމަށް ވަނީ އިލްތިމާސްކޮށްފަ އެވެ.
