އެއްވެސް އަސާސެއް ނެތި ފަނޑިޔާރުން ވަކިކުރި މައްސަލައިގައި ޖޭއެސްސީ ޖަވާބުދާރީވުމަށް ގޮވާލައި މަޖިލީހަށް ހުށަހެޅި ގަރާރު ބޭރުކޮށްލައިފި
2 ނޮވެމްބަރު 2026 | ހޯމަ 04:33ސުޕްރީމް ކޯޓުގެ ތިން ފަނޑިޔާރަކު ސަސްޕެންޑުކޮށް މަގާމުން ވަކިކުރީ ޖިނާއީ ކުށެއް ނެތްކަން ތަހުގީގަށް ސާފުވެފައި ވަނިކޮށް ކަމަށް ބުނެ، ޖޭއެސްސީ ޖަވާބުދާރީ ކުރުވަން ހުށަހެޅި ގަރާރު މަޖިލީހުން މިއަދު ވަނީ ބޭރުކޮށްލާފަ. މި މައްސަލައިގައި ފަނޑިޔާރުން ތުހުމަތު ކުރައްވަނީ ސަރުކާރުން ކޯޓަށް ނުފޫޒު ފޯރުވި ކަމަށެވެ. އެހެންނަމަވެސް، 28 މެންބަރުންގެ އަޣުލަބިއްޔަތުން ނިންމީ މި ގަރާރު ބަލައިނުގަތުމަށް
ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހީމް (ކުޑޫ) | ރައްޔިތުންގެ މަޖިލިސް
ސުޕްރީމް ކޯޓުގެ ކުރީގެ ތިން ފަނޑިޔާރުން ސަސްޕެންޑުކޮށް އޭގެ ތެރެއިން 2 ފަނޑިޔާރަކު ވަކިކުރި މައްސަލައިގައި ޖުޑީޝަލް ސަރވިސް ކޮމިޝަން ޖަވާބުދާރީވުމަށް ގޮވާލައި ރައްޔިތުންގެ މަޖިލީހަށް ހުށަހެޅި ގަރާރު ބޭރުކޮށްލައިފި އެވެ.
ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހީމް (ކުޑޫ) ހުށަހެޅުއްވި މި ގަރާރު މަޖިލީހުން ބޭރުކޮށްލާފައި ވަނީ 28 މެންބަރުންގެ އަޣުލަބިއްޔަތުންނެވެ. ގަރާރު ބަލައިގަނެ، ބަހުސް ކުރުމަށް ވޯޓު ދެއްވީ 7 މެންބަރުންނެވެ. އެއާއެކު ރިޔާސަތުގައި އިންނަވާ މަޖިލީހުގެ ރައީސް އަބްދުއްރަހީމް އަބްދުﷲ ވަނީ އެ ގަރާރު ބާތިލް ވީ ކަމަށް އިއުލާނު ކުރައްވާފަ އެވެ.
އެ ގަރާރުގައި ބުނީ ސުޕްރީމް ކޯޓުގެ ކުރީގެ ތިން ފަނޑިޔާރުން ކަމަށްވާ ޑރ. އަޒްމިރާލްދާ ޒާހިރާއި މަހާޒް އަލީ ޒާހިރާއި ހުސްނުއްސުއޫދު މަގާމުން ސަސްޕެންޑުކޮށް، ފަހުން ދެ ފަނޑިޔާރުން ވަކިކުރީ ޖިނާއީ ކުށެއް ހިނގައިފައިވާ ކަމަށް ބެލެވެން ނެތް ހާލަތުގައި ކަމަށެވެ.
ގަރާރުގައި ބަޔާންކޮށްފައިވާ ގޮތުގައި ތިން ފަނޑިޔާރުން ވެސް ޖިނާއީ ކުށެއް ކުރައްވައިފައިވާ ކަމަށް ބެލެވެން ނެތުމުން ފުލުހުން އެ މައްސަލަ ފައިލްކޮށް، ތިން ފަނޑިޔާރުންގެ މައްޗަށް ދައުވާނުކުރަން ޕްރޮސެކިއުޓަރު ޖެނެރަލްގެ އޮފީހުންވެސް ވަނީ ނިންމާފަ އެވެ. އަދި އެކަމުންވެސް ހާމަވަނީ އެ ފަނޑިޔާރުން ވަކިކުރީ އަސާސެއް ނެތް ތުހުމަތުތަކެއްގެ މައްޗަށް ކަމަށް ގަރާރުގައި ފާހަގަކޮށްފައިވެ އެވެ.
މި ގަރާރުގައި ބަޔާންކޮށްފައިވާ ގޮތުގައި ހަމައެކަނި ކުރެވުނު ތުހުމަތެއްގެ މައްޗަށް ބިނާކޮށް ޖޭއެސްސީން ތިން ފަނޑިޔާރުން ވަކިކުރީ ޖިނާއީ ކުށެއް ހިނގައިފައިވާ ކަމަށް ބެލެވެން ނެތް ހާލަތުގައި ކަމަށްވާތީ، އެ ކޮމިޝަނުން އެކަމަށް ޖަވާބުދާރީވާންޖެހޭނެ އެވެ.
ގަރާރު ހުށަހެޅި މެންބަރު ފާހަގަކުރައްވާ ގޮތުގައި ޖިނާއީ ކުށެއް ހިނގައިފައިވާ ކަމަށް ބެލެވެން ނެތް ހާލަތުގައި ފަނޑިޔާރުން މަގާމުން ވަކިކުރުމަކީ ވަރަށް ސީރިއަސް ކަމެކެވެ. އެހެންކަމުން މި މައްސަލައިގައި ޖޭއެސްސީން ވަކިވެގެންވާ ގޮތް ސާފުކޮށް، ޖަވާބުދާރީވުމަކީ މުހިއްމު ކަމެއް ކަމަށް ގަރާރުގައި ފާހަގަކޮށްފައިވެ އެވެ.
މި ގަރާރަކީ ފަނޑިޔާރުންގެ މަގާމުގެ ހުރުމަތާއި އިތުބާރު ދެމެހެއްޓުމަށާއި، ޖުޑީޝަލް ސަރވިސް ކޮމިޝަނުން އަމަލުކުރާ ގޮތް ބަލައި، އިންސާފުވެރި ގޮތެއްގައި ކަންކަން ކުރިއަށްދާކަން ކަށަވަރުކުރުމަށް މުހިއްމު ގަރާރެއްކަމަށް ގިނަ ބަޔަކު ބުނެ އެވެ.
މި ތިން ފަނޑިޔާރުން ސަސްޕެންޑުކުރީ، މަޖިލީހުގެ މެންބަރުން ޕާޓީ ބަދަލުކުރުމުން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހާ ދެކޮޅަށް ސުޕްރީމް ކޯޓަށް ހުށަހެޅި މައްސަލަ ބައްލަވަމުން ގެންދަވަނިކޮށެވެ. މިކަމާ ގުޅިގެން ސުއޫދު އާއި އަޒްމިރާލްދާ ވަނީ، ސަރުކާރުން ސުޕްރީމް ކޯޓަށް ނުފޫޒު ފޯރުވައިގެން އެ ދުސްތޫރީ މައްސަލަ ހުއްޓުވުމަށް މަސައްކަތް ކުރި ކަމަށް ތުހުމަތު ކުރައްވާފަ އެވެ. ނަމަވެސް، ސަރުކާރުން ވަނީ އެ ހުރިހާ ތުހުމަތުތަކެއް ދޮގުކޮށްފަ އެވެ.
