ކިތަންމެ ހިތްވަރެއް ހުއްޓަސް އޮރެންޖެއް ފެލައިގެން އަންނާރު ދިޔައެއް ނުނިކުންނާނެ: ޒިޔާދު
26 އޮކްޓޯބަރު 2026 | ހޯމަ 07:06ޓެކްސް ގާނޫނަށް ސަރުކާރުން ހުށަހެޅި އިސްލާހުތަކަށް ބަދަލު ގެންނަނީ ރައީސް މުއިއްޒު އަންގަވާ ގޮތަށް ކަމަށާއި، 20 ވަނަ މަޖިލީހުގެ މެންބަރުންނަށް މިނިވަންކަމާއެކު ބަސްބުނުމުގެ ފުރުސަތު ނެތް ކަމަށް ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެ. ސަރުކާރުގެ ސިޔާސަތުތައް އަވަސްއަވަހަށް ބަދަލުވަމުންދާތީ ރައްޔިތުންގެ އިތުބާރު ގެއްލެމުންދާކަން ފާހަގަކުރައްވައި، ޒިޔާދު ވަނީ ދާއިރާތަކުގެ ތަރައްގީގެ މަޝްރޫއުތައް ހުއްޓިފައިވާތީ ކަންބޮޑުވުން ފާޅުކުރައްވާފައި
ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު | ރައްޔިތުންގެ މަޖިލިސް
ކިތަންމެ ހިތްވަރެއް ހުއްޓަސް އޮރެންޖެއް ފެލައިގެން އަންނާރު ދިޔައެއް ނުނިކުންނާނެ ކަމަށާއި 20 ވަނަ މަޖިލީހުން ރައީސް ޑރ. މުހައްމަދު މުއިއްޒުގެ ތެތް ފޮށާ އުފުލުން ނޫން ކަމެއް ނުކުރާނެ ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެ އެވެ.
ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ސަރުކާރުގެ ފަރާތުން، ކޮލަމާފުށި ދާއިރާގެ މެންބަރު އިބްރާހީމްދީދީ ހުށަހަޅުއްވާފައިވާ، މުދަލާއި ޚިދުމަތުގެ އަގުން ޓެކްސް ނެގުމުގެ ގާނޫނަށް އިސްލާހު ގެނައުމުގެ ބިލުގެ ބަހުސް ވަނީ ކުރިއަށް ގެންގޮސްފަ އެވެ.
އެ ބިލަށް ބަހުސް ކުރައްވަމުން ޒިޔާދު ވިދާޅުވީ އޮކްޓޫބަރު 1 ވަނަ ދުވަހުން ފެށިގެން ބޭރުގެ ބުކިން ޕްލެޓްފޯމުތަކާއި ޓްރެވެލް އެޖެންޓުން އަދި ޓުއާ އޮޕަރޭޓަރުން ފޯރުކޮށްދޭ ޚިދުމަތްތަކުން ޖީއެސްޓީ ނަގާ ގޮތަށް ގާނޫނަށް ގެނައި ބަދަލު އުވާލަން ހުށަހެޅުމަށްފަހު މިއަދު އެކަން ކުރަނީ ރައްޔިތުންގެ އިތުބާރު ހޯދުމަށް ކަމަށް ބުނާ ބުނުން ހަމަނުޖެހޭ ކަމަށެވެ. އިއްޔެ ރަނގަޅުވީ ކަމެއް މިއަދު ގޯސް ވަނީ ކީއްވެކަން ވެސް ރައްޔިތުންނަށް އެނގޭ ކަމަށާއި އެއީ ރައީސް މުއިއްޒު އެގޮތަށް ވިދާޅުވާތީ ކަމަށް ޒިޔާދު ވިދާޅުވި އެވެ.
މަޖިލީހުގައި ތިއްބެވި މެންބަރުންނަށް ރައީސް މުއިއްޒު އަންގަވާ ގޮތް ނޫން ގޮތަކަށް ވާހަކަ ނުދެއްކެވޭ ކަމަށާއި ކޮލަމާފުށި ދާއިރާގެ މެންބަރު މި ބިލު ހުށަހެޅުއްވީ ވެސް އެހެންވެގެން ކަމަށް މެންބަރު ވިދާޅުވި އެވެ.
ބިލު ހުށަހެޅުއްވީ ކޮލަމާފުށި ދާއިރާގެ މެންބަރު. ކޮލަމާފުށީގެ ނަރުދަމާ ނުނިމި އޮންނަތާ 2 އަހަރު. ކެމްޕޭނަށް އެ ގެންދިޔަ ގޮތަށް ބިން ހިއްކުމުގެ މަސައްކަތް ހުއްޓިފަ އޮތީ. އާރްޑީސީގެ އެތައް މުވައްޒަފުންނެއް އެބަތިބި. ބޭރު މީހުން ވެސް މުސާރަ ދީފަ ބަހައްޓާފައި. އަހަރަކަށް ވުރެ ގިނަ ދުވަސްވެއްޖެ. މިވާހަކަތައް މި މަޖިލީހުގައި ނުދެއްކޭތީ އެ ބުނަނީ އެއީ ބޮޓުންނޭ. މި ނޫން ނަތީޖާއެއް ނެރެވޭނެތޯ. ގާނޫނު އަސާސީ އިން މި އޮތީ އެ ބަދަލު ގެނަސްފައި. ކިތަންމެ ހިތްވަރެއް ހުއްޓަސް އޮރެންޖެއް ފެލައިގެން އަންނާރު ދިޔައެއް ނުނިކުންނާނެ. ހެޔޮ އޮބި އެޅިޔަސް. އެކަމެއް ނުވާނެ. މި މަޖިލީހަކުން ރައީސުލްޖުމްހޫރިއްޔާގެ، ރައީސް ޑރ. މުހައްމަދު މުއިއްޒުގެ ތެތް ފޮށާ އުފުލުން ނޫން ކަމެއް ދެން ނުކުރާނެ. އިއްޔެގައި މިއާ އެއްކޮޅަށް ހެސް ކިޔާފައި ބަހުސްކުރި ބޭބޭފުޅުން މިއަދު އެ ބުނަނީ އެއަށްވުރެ މިގޮތް މޮޅޭ. އިއްޔަ. މިހާ އަވަހަށް މި ބަދަލުވީހުސައިން ޒިޔާދު
ޒިޔާދު ވިދާޅުވީ އުނބަށް ޖެހުމަކީ، ނުވަތަ ކަމެއް ބަދަލުކުރުމަކީ މައްސަލައެއް ނޫން ކަމަށެވެ. އެހެން ނަމަވެސް ތާއަބަދަށް ކުރާ ހަމައެކަނި ކަމަކީ އުނބަށް ޖެހުން ކަމަށް ވާނަމަ އެކަން މައްސަލައަކަށް ވާނެ ކަމަށެވެ. ސަރުކާރުން ކުރާ ހުރިހާ ކަމަކުން ގެއްލުންވަމުން ދަނީ ރައްޔިތުންނަށް ކަމަށާއި ރައްޔިތުންނާއި ވިޔަފާރިވެރިންނަށް ޓެކްސް އަށް ބަދަލު ގެނަސްގެން އަސަރެއް ނުކުރާނެ ކަމަށް ސަރުކާރުން ބުނި ނަމަވެސް ފެންނަމުން ދަނީ އެ މަންޒަރު ނޫން ކަމަށް ޒިޔާދު ވިދާޅުވި އެވެ.
މީގެއިތުރުން ސަރުކާރުން ފޮނުވި ގޮތަށް ޓޯކިންގ ޕޮއިންޓްސްތައް ފަސޭހަކަމާއެކު ކިޔާލެވިދާނެ ކަމަށާއި ދެ މޫސުން ބެދޭއިރު ވައި ބަދަލުވާހެން ގާނޫނުތައް ބަދަލުވާނަމަ ރައްޔިތުންގެ އިތުބާރެއް ނުލިބޭނެ ކަމަށް ވެސް މެންބަރު ވިދާޅުވި އެވެ. އަދި މި ސަރުކާރަށް ރައްޔިތުން އިތުބާރު ނުކުރަނީ އެހެންވެ ކަމަށް މެންބަރު ޒިޔާދު ވިދާޅުވި އެވެ.
